عداله ظالمه⚖️
بقلم : منى الزويᥫ᭡
[مشهد من مستقبل الروايه]
____
الكفره ستينات القرن الماضي.
رودس: الدنيا ظلمت والناس همدت والعيون غمضت ماعدا عيوني الساهره تبي تشوف وليف الروح
صبيت من الدار بشويش رفعت حدايدي الذهب لفيتهن في محرمتي بشويش بيش ما يديرن صوت لفيتهن وقرصت خدودي بيش يقعدن حمر وطلعت كحل سرقته من امي كحلت عيوني ياليل الليل بتشوفن وليف الروح
طلعت من البيت بهداي وبدون صوت
نسلل بين اشجار النخل العاليه قريب نوصل لمكان لملاقى وقفت وطلعت حدايدي عشره ولبست في كل ايده خمسه عشان نعرف عددهن انحط كل حديده في اصبع وكان تعبن كل اصابعي نعرفهن ما ناقصات
قرصت خدودي ومشيت بهداي لورا البير وانشوف طوله
_خيرالله: يا هلا بسبب حيرتي
_ايشحالك ياك طيب
_ياكلا مانقعد طيب بعد هالشوفه..هكي اتغيبي علي يومين
_ياودوي ماباتي جاب خواتي ماقدرت نطلع منهن
_خلاص يا سبايبي معادش مزال بالحيل وتلتم غيتنا
_في كل ملاقى نفس الكلام يتعاود،،هالنهار عمري 14 وكثرو الخطابه
_يا سبايب قلبي انخاف لو جيتك ما يعطوك لي
_شوف الشيخ امحمود وهو حلالها
_نبيدي كلمت عمي عمر وهوا قال اليوم يكلم باتي،، مرايف على هالعيون الكحيله
رودس:خلاص نبيدي ماشيه توا باتي يتفقدني
خيرالله: ماتقطعيني نا كل يوم نرجاك
رودس: مشيت نجري في الظلمه وين ما قربت من الدار فكيت حدايدي وربطتهن في محرمتي ودخلت بركاحه شفت ضي الشمعه والع عرفت الكويه جايتني
امي متقعده في الصاله وين ما شافتني صبت مسكتي من يدي
فجره:وين كنتي؟
رودس:ما نعسانه طلعت برا للشجر
فجره:طلعتي للشجر في نص الليل ومكحله عيونك؟كنتي مع ولد صالح صح؟
سكتت وقلبي خلاص انتهى كرتني من يدي سخنت كاشيك ع الشمعه وانا نبكي: خلاص وسيدي المهدي ماعاد انشوفه يمي
فجره: معادش في دلع البنات وترضي الزيزه اول حد يدق الباب تمشي معاه الحق مش عليك على باتك اللي يشاور فيك
سخنت الكاشيك وحطاته ليا على كف يدي روحي طلعت مانبي انطلع صوت ويجي باتي يعرفني
___
عام 2003
حُسام يبكي من المنظر اللي قدامه وايديه على راسه: قتلته يا اشرف قتلته
اشرف قرب من حسام يصكرله في فمه: اسكت الناس يسمعوك
خالهم احمد: بسرعه اشرف احفر وادفنه
حسام باعد منهم يبكي ويتنجب في منظر عابد المقتول بينهم والرصاصه حافره راسه
