حب وحرب( في ليبيا يحرم العشق ) 🔥🇱🇾
البارت 35
كتابة : منى بن محمد الزوي
~~~~~~~~
نضال منضره مبهدل ورضا نفس الشي ،، السكوت عم المكان ،، الكل خايف يسأل واتطيح الكارثه على روسنا،، سمر الوحيده اللي تبكي وكلناا مصدومين ونرجوا حد يتكلم،، تكلمت سمر :
_ ياخوي ماتحرق قلبي قولي الاء وين نضال قوللي
صوتها تقطع من البكاء،،، نضال رفع رأسه وقاللها قتلها
جسمي قعد يرجف ودمعي يطيحن غصباً عني،، سمر انهارت والبيت كله يبكي،، صبا نضال بصوت عالي: خلاااص ياويلكم انشوف حد يبكي،،وانتي( شير على سمر) غدوا اتديري عشاك كل شي يمشي عادي،، الكلبه اللي ماتت تستاهل الموت وسيرتها معش نسمعها
سمر حطت يدها على فمها وتبكي بصوت مكتوم،، ونضال مزال معصب وصوته يهز هز طلعت بسرعه للصاله حطيت ايديا على وذاني ونزلت راسي نبكي ،،جا نضال مسكني من كتفي قالي امشي البسي هيا ماشيين
فكيت يدي منه وجريت للدار عزقت روحي على سرير رزان وانعيط البيت كله عياط ونضال كل شوي يهزب ،، قعد يقول : بنت الكلب وينك هيا
صبيت بسرعه لبست عبايتي وخذيت دبشي وطلعت ،،، قالي هيا ،،وهوا مصعب طلعت معاه بدون ما انشوف سمر ولا البنات ركبت في السياره ومزلت نبكي ماقدرت انوقف ،، عيط عليا عشان نبكي قعدت نكتم في صوتي ونسمح في دموعي ويردن ايطيحن
وقف في اوتيل قالي انزلي نزلت نبي انزل الشنطه كرها من يدي،،، هوا يد وحده بس يحرك فيها ،، قفل السياره ودخل للأوتيل الناس امركزين علينا من شكله واضح ارهابي لبسه كله اسود وملامحه حاده،، وانا وراه نبكي،،، دخلنا الاصنصير فيه بنات امركزات علي نضال و هوا فايتهن ماسك يدي زين وعاقد حواجبه ،، رقينا للطابق الرابع فك يدي ومدلي طرف جاكته قالي امسكي مسكت في دبشه وهوا رفع الشنطه بيده اليمين اليسار مضروبة،، دخلنا لغرفه واسعه حط الشنطه وسلح جاكته عزقها في الوطا سوريته فيها دم حطيت يدي على فمي وانوخر نبكي بحت فيا زين وقرب مني،، انوخر لين خبطت في الساس مسك راسي وحطه على صدره ،، حبني من خدي نزل راسه حط جبهته على جبهتي ،، قال : تعباااان يا غلاي تعبان
مسكت وجا بإيديا الاثنين فتح عيونه شافني مزال نبكي قالي : امسحي دموعك ياغاليه ماتبكي
مسحت دموعي وقتله بصوت متقطع: كيف قتلتها ؟!
حط يده على خدي وقرب يبوس فيا ماوقف الا عشان ياخذ نفس،، باعد مني وقال: ماتشغلي بالك بيها ،،،طلعليلي دبش اندوش
رفعت الشنطه وانا نبكي طلعتله بجامه خذاها من يدي ويشوفلي بطرقة مش عاجبه اني نبكي عليها،، قعمز يسلح في سوريته براحه عشان كتفه قربت نبي انساعده وايديا يرجفن ،، ساعدته لين سلحها رفع دبشه ودخل للحمام ،،، قعمزت نحرق ونبكي مقهروه يعني خلاص قتل اخته هانت عليه موتها بيده،،، طلع شافني متكوره على روحي نبكي،،، جا تمدد يالاي وحط يده على عيونه قعمزت وحولتله يده فتح عيونه وقالي: خيرك
