حب وحرب( في ليبيا يحرم العشق )🔥🇱🇾
البارت 36
" بقلم: منى بن محمد الزوي
_________________
وقفت سيارت نضال في الجنان ،، قربت من روشن دار الضيوف شفت سوسن وامها نزلن ومعاهن شناطي ،،، سوسن بطنها قدامها في الشهر الثامن غمتلي رقيت فوق ،،،فكيت شعري وصلحته بإيديا وبخيت عطر وجيت نبي ننزل شفت بجامتي طويله رديت لبست جلابيه قصيره حمرا ،،نضال شرالي دبش اول تحويلتنا هنا،،
نزلت لقيتهن في الصاله ويشوفن في البيت روسهن يبرم كيف الهبل ايشوفن في الديكورات والإضاءه،، نمشي ع الدورج براحه: اهلا اهلا بالست سوسن
اتشوفلي والغيره عاميه قلبها واضح عليها...نضال بعد شاف لبستي قريب مات ،،ياشرلي بعيونه ماعدلت عليه مديت يدي من بعيد لسوسن سلمت باطراف أصابعي وكذلك مع أمها ....
قلتلهن : تفضلن لغرفة الضيوف اترقدن فيها تو ناخذلكن فراشات
حسنه: شني نضال تسمع فيها ..هوا بيت بنتي كيف ماهو بيتها
فنصت فيا سوسن وخلت الشنطه من يدها قربت من نضال :،، نضال وين داري؟؟
_ ماعندك دار،،، مش مأثث غير دارين غرفة غاليه وغرفة الضيوف ،،رقدن فيها اليوم
عيونها دمعن واابحت في نضال بلوم ،، هوا شافها وطلع الدخان ماقدر يفتحه يده اليسار مربوطة قربت منه فتحته له طلعتله طرف حطه في فمه وابتسملي ولعه وقالي ديريلي قهوه...
رقا فوق وانا امصبيه في مكاني خليته لين دخل للدار لفيت لسوسن وامها يشوفلي بكره،، قلتلهن عشان نقهرهن: تفضلن لغرفة الضيوف علاااش واقفات اهني
تعمدت نحكي غرباوي ،،،ضحكت ومشيت للمطبخ قبل ما ندخلها قالت سوسن: اني اللي نعرف انأدبك يا سحاره يا بنت المصريه
رديت عليها: بنت المصريه والمصريه يسونك ويسون هلك،، انتي شنو ماعندك كرامه مافي إحساس الراجل مايبيك ،،هاااجرك ،،كاره وجك تحشمي اجعري اشويه..
_ اسمع من يحكي ع الكرامه انتي اللي يمسي فيها بطريحه ويصبحها بطريحه ومزلتي قاعده،،،اصلآ مش عارفه ليش صابر عليك هوا كيفك كيف الارض الخاربه مايصلح فيها شي
قالتها وحطت يدها على بطنها وضحكت امها قعدت اتقول قول هو الله أحد....
كلامهن قهرني معش تحملت رقيت فوق بسرعه لنضال دموعي تجري معش تحملت فتحت الباب وصكرته بقوه حطيت ايديا على وجي ونبكي كان يتكلم بالتلفون صكرته وجاني..
_غاليه خيرك شنو دارولك ،،غلاي تكلمي والله حقك ناخذه من عيونهم
يباعد في ايديا من وجي ويسأل حضنته بسرعه وشارقه في بكاي نبكي بصوت مخنوق مسك وجي بإيديه الإثنين وقالي: احكيلي بس شنو دارولك
