حب وحرب ( في ليبيا يحرم العشق )🇱🇾🔥
البارت 45
بقلم" منى بن محمد الزوي"
______________
اشتقت إليك فعلمني كيف لا اشتاق
علمني كيف اقص جذور هواك من الاعماق
علمني كيف تموت الدمعه في اعين الأحداق
علمني كيف يموت القلب وتنتحر الأشواق
~~~~~~~~~~~
صدمني كلام حافظ قعدت انبحت فيهم وعمتي سالمه تفنص فيا رفعت رعد ونبي انصبي تكلم عمي خليفه
_ اقعدي
رديت قعمزت والدموع في عيوني واضحات
حافظ: باتي انا نبي غاليه ومن زمان ...وكلكم عارفين...انا توا مش صغير ولا غاليه صغيره
..بيت وعندي شغل وعندي مافي شي يمنع
بحت فيا عمي خليفه وباين عليه مش عاجبه الوضع: انتي موافقه يا غاليه
سكتت ماعرفت شنو انرد عليه حافظ حطني في موقف محرج قبل ما انا نرد تكلم حافظ:
_ انا حكيت معاها وهيا موافقه نبو موافقتك انت وامي بس
عمتي سالمه: ليش جاي تشاور فينا ما انت وياها متفقين خلاص...كان خذيتها ودخلت علينا بعيالك مره وحده
_ امي وسعي بالك معاي.. انتي عارفه انا من زمان نبيها واهي توا ردت
عمتي سالمه بصعبيه: ردت لكن مش كيف قبل معاها عيل تعاني فيه...انا نبي نفرح بيك وانديرلك فرح نبي انجوزك على كيفي ولدي وحيدي
تنهد حافظ وبحت فيا زين شافني نبكي ..رد بحت في امه : امي كان مشكلتك في رعد انا ماعندي مشكله عادي عندي
_ وانا عندي مش عادي...نبي نفرح بيك نبي انشوف عيالك انت
_ عيالي ان شاء الله تشوفيهم ربي يعيطك طولة العمر...امي ساد قبل غاليه راحة مني مانبيها تريح مني مره ثانيه
انا نسمع وساكته بس دموعي ينزلن وماسكه رعد اللي مصدوم في الهرجه اللي صايره...صبت عمتي سالمه اتعيط:
_ انت عارف من راجلها هذي ..ولا نسيت شنو دار فيك بعد هربت معاك..توا تبي تاخذها عشان يقتلك وينهي عليك
عمي خليفه: خلااص سالمه اقعدي مش هوا يبيها وهيا موافقه خليه ياخذها
_ والله ما ياخذها...بحتت في حافظ وقالت: كان خذيتها لا انت ولدي ولا نعرفك
_ مش ديما اتقولي غاليه بنتي وعلى اساس شاغلتك واتخافي عليها كيف صار ولا كله نفاق وين عدا كلامك قبل ...خلاص شفتيها ماعندها حد تبي تستقوي عليها حتى انتي...انا غاليه ناخذها ناخذها تبي ولا ماتبي
