حب وحرب( في ليبيا يحرم العشق ) 🔥🇱🇾
البارت 37
# قاعده نضغط على روحي ونختصر في الأحداث وهذي مش عادتي عشان نوفي بالوعد واقل شي يوم 15 يكون الختام...ولو ماقدرت سامحوني لان والله القصه مزال طويله.🖤
☆ منى بن محمد الزوي
________
واعتني رزان ع الغداء،، نضت راسي ثاقل وكبدي تلعب...قالتلي تعالي تغدي قتلها مانبي دخلت عليا عمتي غدير
: صبي سلم بنيتي ماتخلي الناس يقولوا حسوديه وحقدها مرضها،،، عارفتك مكسوره يا امي اغسلي وجك والبسي احلا ماعندك وانزلي،، مزلتي صغيره والعمر قدامك
_ انا صغيره لكن نضال كبير يا عمتي عمره 40
_ عادي والله ما يأثر اللي من عمره دوبهم قاعدين يتجوزوا الراجل طول عمره يضنا مش كيف المرا ماتخافي
صبيت توضيت وصليت الظهر،،عمتي غدير ورزان نزلن غيرت دبشي شتاء لبست بجامه دافيه ونزلت....
لقيت اقارب سوسن في الدار وأقارب نضال ،، دخلت سلمت عيون الصبايا عليا قويت روحي وابتسمت ...سألت وحده سوسن:
_ شنو بتسميه اوليدك
_ بوه يبي رعد
_ ههه غريب اشويه لكن حلو
اول ما سمعتها قالت رعد النار ولعت فيا طلعت من الدار عمتي غدير في الصاله قتلها وين نضال قالتلي مش عارفه
رقيت فوق بسرعه اتصلت بيه اول مارد فصلت فيه وانا نبكي ؛ وينك انت تعال توا بسرعه
_ غاليه خيرك
_ تعال توا والا وربي نطلع اندورك انا في الشارع
_ جايك خلاص اهدي
عزقت التليفون وقعدت ماشيه جايه في الدار متوتره ونضرب في كف بكف...دخل نضال لفيت عليه معصبه
_ تبي اتسمي ولدها رعد... رعد ولدي انا اناااا ،كان في بطني انا رعد ،، ولدي انا مش هيا
صكرلي فمي بيده: اسكتي اسكتي خيرك هبلتي انتي
حولت يده مني : والله كان تسمي ولدها رعد انهج ماعاد تلقاني ،،،انا اللي حملت برعد اربع مرات ومات...رعد ولدي انا فاهم
مسك وجي بإيديه الإثنين: اهدي وغلاتك ما نسميه رعد،، ولدك انتي رعد ماتزعلي
حولت ايديه وقعمزت ع السرير نبكي وايديا على راسي،، قعمز يالاي تنهد وسحبني لصدره كملت بكاي...
هديت اشويه صبيت غسلت وجي ونزلت نزل هوا من الدورج ع الباب الوراني طلع منه....قعمزت في الصاله مع رزان وخديجه حاطات سفره يرجن فيا....
قعدنا ناكلوا قالتلي خديجه: غاليه اطلقي وجك واضح عليك متعقده..
تنهدت وكليت اشويه قالتلي خديجه: صار منها خطبتي ردينا عليهم ورضا وافق
