حب وحرب( في ليبيا يحرم العشق )
البارت 3 ..الكاتبه mona alzwiy
سالمه : سترك يارب ، من جاينا في هالقوايل ..
مشيت دعاء اتشوف من ،،من روشن المطبخ ،،واتجينا تجري : حي عليك ياغاليه عمك برا وقالب الدنيا، ايقول توا اتطلعوها .
معش عرفت شنو اندير ، حسيت روحي حطيت عيت عمي خليفه في مشاكل، وانا عمي ما يخاف ربه ،مافي غير حافظ في البيت عمي خليفه طالع متغدي في عزا صاحبه .
الصوت بدا يعلى ، وعمي سالم يسب ويغلط ، قلت خلاص هذي هيا ، نطلع والله غالب عليا ، ما انسببلهم مشاكل وعمي سالم يقتل القتيل ويمشي فجنازته مايخاف ربي وديما طافي سكران ،،، طلعت وتمسك فيا عمتي سالم : غير اصبري بس يا بنتي تو يجي عمك خليفه ، واتعطيك على دعاء اتصلي على باتك بسرعه قوليله ايجي
- انحاول فيه يا امي خارج التغطية
باعدت عمتي سالمه من الباب، وطلعت لعمي وحافظ برا صوتهم عالي والتمو الجيران، نبي نمشي مع عمي سالم وحافظ يعيط عليا : ادخلي جوا غاليه ادخلي جوااااا ،، طلعت مارديت عليه ساد درتلهم مشاكل ، من قربت من عمي يعطيني كف ، صوته بروحه يهز الوذن هز ، خدي تبنج ...
يهجم حافظ على عمي سالم ويبدا فيه ، لين دمه سال والجيران يباعدو في حافظ من عمي ، حافظ طويل وعريض وبجهده مش زي عمي اللي السكير هد حيله ،،، الجيران يباعدو في حافظ من عمي، وعمتي سالمه عند الباب وتبكي : ينعلي يا اوليدي ما اتوسخ ايديك بيه يمي نوض نوض تبكي وماسكتها دعاء بنتها ،، رفعوا حافظ من عمي ،،يتنفس بقوه وعرقان رغم الجو امصقع،، وانا مزلت على وقفتي بلا صوت بس دموعي شلال ، ونرجف خايفه من اللحظه اللي انا فيها واللي راح انكون فيها في بيت عمي، وخايفه من المستقبل المجهول اللي يستنا فيا..
جا عمي خليفه، نزل من السياره بسرعه: خير شنو في شنو صاير ،، تلفت شاف عمي سالم وجهه كله دم : شنو صاير حد يحكي
الشيخ محمد: سوء تفاهم وان شاء الله ينحل .
عمي سالم: لا سوء تفاهم لا*** بنت خوي اتجي معاي توا ، غير هكي لا .
الشيخ محمد: ان شاء الله تمشي معاك غير نفهموا ليش هيا هربت منك ولكل حادث حديث.
دخلوا الرجاله للمربوعه ، وانا دخلت مع عمتي سالمه ..
تفاهموا الرجاله ، اني نمشي مع عمي ، لاني ماعندي غيره ،،، حافظ رفض وعارض ، قاللهم راجل ديما طافي سكران ، كيف انأمنوه على بنت ، ويضرب فيها ، والعار يخلي فيها تمشي للمدرسه واتجي كعابي ، لا راجل ولا عنده غيره على عرضه .
تعصب عمي سالم ،،، ويبدو في عركه جديده مني منك مني منك ،،، اخرها قال الشيخ محمد ، البنت تمشي مع عمها ، وانت ياحافظ مالك دخل بيها ،
وانت يا سالم ،، نسمعوا انك ضارب البنت او معتدي عليها ،،، نعرف كيف انتفاهم معاك ..
اعتذر عمي خليفه لعمي سالم على ضربة حافظ له: معلش سامحنا وامسحها فوجي هالمره ، وان شاء الله ماعاد في الا الخير ، ونحن خوت ..وكان انا كنت قاعد را طلعتها لك بدون هذا كله .
حافظ :اسمحلي يا باتي ، غاليه من هنا ما تطلعش ، كيف انأمنوا عليها عنده .
خليفه: حافظظظظ ...بعد انا انتكلم انت تصكر فمك ، وصوتك مايعلى .
