#كحل_عرب
(الفوضى)
((( بقلم زينب ماجد )))
الحلقة_65
(إنكسار الشيخ )
انه بلا صبر
والضيم مد الشوف
ومحمل هضيمه وما بگالي معين
تبعد معتمد
وتوز عليه الشيب !!
يطفه اسود ربيعي ويشعل التلوين
لـ عريان السيد خلف||
تخربط سرحان وطاح من طوله ، تلكاه مأمون و هو يصيح : بووووووية ، حاجيني بوووووية
باوع بيه انتهى وجه اصفر وشفايفة صارن بيض ، ظل يحشم بالناس : ساعدوني ابوي طااااااح ، يا نااااااس
كلها تراكضتله .. شيخ
سلامات
ابو مأمون .
شالوه للسيارة ممدوه ، ضربوا على وجهه ، فاقد ما يحس ، ومأمون يصيح : دخيلك ياااااا علي
اريد اندل جيبي وين واكض تليفوني ماكو ، ادور ماكو انخضيت خض وابوي امدد بالسيارة : تليفوني وين يا اااااااالله .
صاح ولد : هاذ بالكاع خوية بس على كيفك
الشيخ مال الجامع يبلل وجه ابوي بماي وانا اعاينله وبس اريد الكط رقم مروان ما جاي اركز .. دست على رقمه اتصال ، رد : ها مأمون اجا علي
- مروان ابوي طاح راح اطلع بوجهي لمستشفى القادسية الحك وراي .
- شتحجي ، شبي ابوي
- الحكنيييي
سديت الخط وزلمه صعد يم ابوي وياي، واني كضيت الستيرن و دست لها .. راسي اشتعل نار ما ادري افكر بابوي لو بعلي اللي ليهسه ما رد .
احتاريت اخابرمن من البيت .. محد عدها موبايل والارضي ما جاي يحصل .. رديت خابرت مروان : الو
- شلونه ابوي مأمون
- عوف ابوي رد للبيت ، شوف علي
- بس كلي ابوي شبيه
- تضعضع من تأخر علي .. انت بس روح للبيت يمعووود ..
- رايح بس مأمون بلغني بكلشي يصير كفيلك العباس رجلي ما جاي احس بيهن ، وراسي اشتعل .
- روووح
كمت افرك بوجهي .. بس اريد اركز بدربي انتهيت .. دخيلك يا ابو فاضل حلها .. رديت وانا اعاين بالمرايا امدد فاقد لهسه .. وصلت المستشفى وصفيت السيارة بالباب و صحت على الحراس يساعدوني ، كلها همت للمساعدة تتراكض
ناس جابت كرسي متحرك وناس ساعدتني انزل ابوي من السيارة ، وتراكضنا بيه جوا .
مروان : صفيت السيارة ونزلت اركض ، نوسة وامي هدوة واكفات بالباب : ها شني وليدي وين مروان يمه
- ما رد ؟
هدوة : ما رد شني انتم موش رحتوا تجيبونه
كضيت راسي ، احس قبق راسي راح يطير ، دمعن عيوني وبس نسوان كدامي ، جريت التليفون ، وخابرت على مأمون : هاااا
