#كحل_عرب
( احضان باردة )
((( بقلم زينب ماجد )))
الحلقة_١٤
( لعب الكبار )
وحدك
خيط شمعه ولاحها النسيان
تتفت رماد اوهام من تنجاس
مامشً ناس
لــِ عريان السيد خلف||
سد التليفون سرحان ، مأمون واكف يمه بادر بالسؤال فورا : ياهو هاذ ، شني ؟
سرحان : الجلب يطلبني ثار لجنة موش كدي وياخذ ثاره وجه بوجدة يلتف بدروب عوجه ويلاويني .
- ياهو ؟
- كاظم ال صياد ..
- خابراك ؟
- خابراني جبيرهم يكلي حول عدنا اخذ عطوة .
- ايبااااه هاذ يعرف ويامن يحجي لو يغشم روحه .
- ذول ما يعرفون ويامن جاي يلعبون عدالهم بملاعيبهم هاي ، يغلبون شيباتي .. ما يدرون اتعداهم وانا جويعد بمچيني .
اسمع يبو الاكبر تاخذ رقمه بعد ابوك وادزله رسالة حتى لا تخابرهم وتكبر روسهم ، وتكللهم : مو ال ضاحي الساخذون عطوة من احد ، نعرف ارواحنا والعده ويانا يندل مضيفنا
مأمون : على امرك تم ...
طب مروان ، حجه سرحان : كون تعديت ع البيت ولك
- لا شتعديت رجعنا والله .
- اي ها هيه عفية ، حظر روحك راح يطلبونك مركز الشرطة .
- اي ويطلبون قابل شمسوي غير *****
- ظل بفشارك هاذ محد عمى علينا غير سوالفك هاي ، لو محترم روحك وكاف اعلى مريتك وجهالك يصير كل هاذ .
مروان : ديلا هسه فد مندلة وراحت ، تجي الف وحدة غيرها .
ندسه مأمون وغمزله : دكافي
سرحان : مروان يكف هههههههي شمالك بوية ، الماي يروب والكح**** ما اتوب .
- اشكرك حجي اشكرك ، كلامك هاذ الله شاهد شعادة اعتز بيها .. وسام شرف .
ضحك مأمون و سرحان يهز بيده ويكله : طيح الله حظك كون .
دك الباب شرطي ، بلغاه بالدعوة ، طلعله سرحان كاله : احنا بخدمة الشرطة ، هسه اجيبن ولدي واجي ، والعايل بيهم تاخذون الحك من عيونه .
اندار على مأمون كاله : خابر على ياسر وازلامنا خلهم يحضرون هالساع
- بس ياسر شنهو لازمته .. انروح اني وياك و مروان .
- الكثرة هيبة ان ما هبت الجدامك .. ما يخافك ولا يحطلك قيمة .
- هسه اخابرنه .. تأمر .
اتصل بياسر كلاله (ابوي رايدك هسه )
ياسر وازلام منهم ما قصروا خلال ساعة كلهم حضروا عد باب الشيخ نالهم ، ركبوا سياراتهم .. ٧ سيارات ... صفوهن كبال مركز الشرطة ، نزل سرحان وعوجيته بيده وولده وازالمه داير ما دايره .
