#كحل_عرب
(أحضان باردة )
((( بقلم زينب ماجد )))
حلقة_٢٠
( فتنة ميادة)
شني فضلك عليّ
وحاطني ويَّ الريح؟
خانگ فرحتي و رَملاتك تذري ..
لا مِثل الخلگ و تدگ عليّ الباب
وتسرّ خاطري .. ولا گلت متبرّي
معلگني بأمل يادوب يشفع بيك
و اتأمل حلاتك و أحتمل مُرّي ..
لــِ عريان السيد خلف ||🖤
الاء : علاء تغير عليه .. مو مثل اول ..
يوم لليجي يمي متململ ، ويخلصها يتأفأف وماله خلكي وخلك جهالي .
حتى كمت وكت اليجي ما اخلي هوسة جهالي يمه ..
اذا يكعد بالصالة اخليهم بالغرفة واذا يكعد بالغرفة افتحلهم التلفزيون بالأستقبال .. مع هذا احسه ما راضي .
احاجي يكلي ما متغير
اكله : لعد شبيك صاير خلكك ضيك ويانا.
يكلي : انت تموتين ع النكد ، وما مهتمة بروحج و ومكضيتها بالاسود .
اكله : شسوي لعد حفافة ما اكدر احف ابوي ميت ولا اكدر انزع الاسود .
ما يرضى ..
حتى ما كمت احاسبه ولا اكله ليش رحت ووين جنت وليش تأخرت ، مرات حتى اليوم الألي ما يجيني بيه يضل بيه هناك يم اهله .
وهم اسكت ما احجي
بس اضم بكلبي .. انقهر
ناس تكول عمل ناس تكول مسواله وروحي سيد ومدري شنو بس اني ما ارغب بهالامور اكول الله موجود وهو يتكفلني اذا احد ناويلي بشر .
بس تعبت ونفسيتي كلش صعبت
اباوع لروحي اكول شنو الجنيته ؟
حبيت حمزة وعشت وياه ع الحلوة والمرة تاليتها حتى يرضي امه اتزوج عليه وعافني بضيم .. عافته مرته وكلت يا الله اندارلي ، مات !
عشت بضيم عباس يومية مهجولة من بيت لبيت اني وجهالي ، وكلت الله فتحها عليه وكعدت ابيت واتزوجت علاء وراح ارتاح .. ما ارتاحيت .
من ضيم امه
لضيم مرته
لطيحة حملي .. لحالتي وهسه علاء ما يطيقني احسه
اشفت من حياتي .
لو بيدي اكض كل بنية واكلها ديري بالج تغلطين مثلي وتدورين حب وانت زغيرة وتلتهين عن مدرستج ، كل يوم اتندم الف مرة ، لإن انجرفت لسوالف الحب واعتقدت الزواج فد متنفس وخلاص من تشدد اهلي وفقرهم .
شجنيت من الزواج ؟
شحصلت من الخلفة
البعمري بالكلية عايشات وقتهن وكل همهن دراستهن واني همي جهال ، ورجال ما داري عني .
صح اشكي لخواتي واحجيلهم
بس كلبي ما يرتاح غير يم امي .. احجي ابجي بالتليفون وهي تحاول تنصحني وتهديني وماما ميخالف واصبري ، وشتسويله ومعليج بيه .
اخيرها من كد ما لح بسالفة الأسود ..
كالتلي ماما نظفي حاجبج والبسي الوان بالبيت شتسوين ، الاسود شيفيد هو ابوج وراح يرجعه اسود لو حاجب ، اقلها اكسبي رجلج ، وامشى على رايه .
