#كحل_عرب
(أحضان باردة )
(((بقلم زينب ماجد )))
الحلقة_١٧
(مكيدة حاضرة )
اشيلك من خَيالي وترد مثل الشيب
تعبت وياك كل ما تنشلع تكثر ..
لــِ عريان السيد خلف ||
نانة : جان اول يوم امتحان بكلوريا صف سادس علمي ، وكلش خايفة ومتوترة لا تكون الاسئلة صعبة وما اجيب المعدل الاطمح له .
كلش متوترة كعدت من الخمسة اقرأ ، ومن اصفن احس ولا معلومة بمخي هنا تسود الدنيا بوجهي وبودي ابجي ..
اباوع الكل نيام بس اني افتر بالبيت واردد بالايات واحفظهم .. شكد احسدهم جيف ما عدهم امتحان .. وصلت بيه اصفن بالحايط واكول (هنياله الحايط ما عده امتحان )
صارت ب٧ صعدت ابدل حتى اروح للمدرسة ..
جاي البس بحجابي ، دك التليفون ... باوعتله ( مأمون ) .. بسرعة رديت : الو
- الو هلو نانة ، كاعدة لو كعدتج
- لا كاعدة جاي اروح لمدرستي ، كول
- فتحيلي الباب مالكم .
- انت جوا
- اي بالباب
نزلت ركض فتحتله الباب شافني لابسة الصدرية والقميص : عدج مدرسة
- مو كتلك اليوم امتحاني
- جيبيلي فراش
رحت جبتله فراس وفرشتله واني اسئلة : وين جنت بايت
- وين يعني اكو غير ببيتي
- يا بيت تحجي صدك انت ، ترا جاي تموت روحك مأمون ، راح تتسودن .
- هناك ترتاح نفسيتي اتخيلهم واسمع اصواتهم
- عود صدك تحجي ؟
- اي والله
- عزا مأمون لا ادور راكبك جني ؟
- جني براسج ، دفرشي
- ذبيتله الغطا ع الفراش ، اتمدد وهو يكلي : جيبيلي نرجس بحضني .
- نايمة يمعووود دعوفها
- لا بروح ابوج ، جيبيها بحضني .
- ما اداوم انت اليوم ؟
- سبت اليوم شبيج ماكو دوام
- يا طلعت احنا امتحانات مداومين السبت .. عبالي الكل مثلنا ..
- دجيبيها .
صعدت خلصت حجابي ، وحطيت عطر ، وشلت الكتاب والجنطة ونرجس ، نزلتها حطيتها بصفه هو غافي ، كعدت يم راسه اقرا وانتظر الخط .
كام يتكلب بفراشه ومغمض عيونه ، حجيت : اكوم خاف دا اضايقك ؟
هز راسه : لا
ظليت اقرأ ، ٧ ونص وخمسة وابو الخط ما جاي .. كلت خل انتظرة ١٠ دقايق .. ظليت اقرا واباوع للساعة .
