#كحل_ عرب
( الفوضى)
((( بقلم زينب ماجد )))
الحلقة_70
( نذالة )
و گلبت كل ورقة من عمر المَحبة
لنّي بليالي العِشگ مايوم عايل
لــِ عريان السيد خلف ||
مأمون : نزلت من السيارة وفتحت الباب الورى ، شلت العلاليك و قفلت السيارة .. دخلت البيت وصعدت ليفوك .. السطح مغسول بعدها الكاع رطبة ، فتحت باب البيت وطبيت كفختني ريحة البخور والهوى البارد .. وجهالي بالهول اكبر كدام التلزيون صافن يباوع فلام كارتون ، ونرجس اطشر بالمكعبات وتلعب .. شافون بساع فزوا ( باباااااااااا)
ذبيتوالعلاليك ع التخم وكعدت الهم واني اصيح وافتح اديه الهم ( هلا .. هلا ) خذيتهم بحضني ابوس بيهم ، حجه : اجبتنا بابا
- جبتلكم موز .. هاك
اطيتهم كل واحد موزة وكمت ، بطة ماكو ، خذيت العلاليك للمطبخ واني اصيح : ام الأكبر ... بطوووووط وينج حبيبي
سمعت من الحمام تصيح : اجيت حياااتي ، هسه طالعة
- على راحتج عمري
حطيت العلاليك ع الطبلة و كمت افتك برباطي وانزله وانزع بسترتي ، ريحة الأكل طيبة ، تمشيت فتحت الجدورة مركة بامية بلحم وتمن ابيض ، ومكمله الزلاطة ومخليتهن على صفحة ، ظليت امد ايدي واضوك .. طبت هي : الله يساعدك حبيبي
- يساعدج عمري ، نعيما
- اصبلك جوعان
- اي والله حيل جوعان ، بس السترة هاج ضميها ، وجايبلج شي راح يفرحج
- شنو ؟
- كملي وتعرفين
خذت السترة وراحت للغرفة طلعتلي ملابسي مال البيت مصفطات حطتهن ع الجرباية ووكفت على المرايا تمشط شعرها : ما مريت ابيتنا هناك
: لا والله هاي جيتي تعبان عود العصر امرلهم
- ظال بالي على الاء سودة عليه امي ، متزوج عليها العار وضامين عليها .
- هو من الأول ما بيه حظ يمعودة
احجي واني ابدي ، لفت شعرها واجت باست خدي : كمل ملابسك عمري على ما اصب حتى نتغدى .
- ماشي كلبي .
بدلت ومشيت للهول ابوس بجهالي واكعدهم بحضني ، وبطة من المطبخ تصيح : مأمون اذا العصر فارغ اخذني لاهلي ساعة زمان بس اشوفهم .
- الله كريم
طبت وهي شايلة الصينية حطتها بالكاع ودنكت لالعاب نرجوسة تلمهن ، كعدنا على الغدا ، هي حاطة نرجوسة بحضنها توكلها واني اكل واحط لاكبر ، حجيت : عمي زناد راح يرشح للأنتخابات
- مبارك .. يلوك لم اشلوك
ابتسمت : يفيدنا بالعكس
- ابيش يفيد هسه يحط كورة ويا عمي وتعال شيلني .
