#كحل_عرب
( الفوضى )
((( بقلم زينب ماجد )))
الحلقة_71
(مرض الطفل )
طوينة ايام ماضينا
نسينا شلون چنة بشوگ
نفرح لو تلاگينا ..
نسيتك يالهويت الغير
و بظهرك تخلينا ..
لــِ عريان السيد خلف ||🖤
قفل الخط من عدي بعد ما نهاها وياي ..
كمت اصرخ ابجي واصيح ( اريد ابني ، ليش تحرمني منه حمززززة ، ربي دخيلك باوع حالي تعبت ... الله يطلع حوبتي بيك حمززززززززة )
ونانة واني ونهاد يجرن بيه ويكعدن ، حجت امي : ما دامه ما لازمته وحاضنته خلي ياخذه لا تعلعلين كلبج بيه ، احسبي نفسج ما جبتي .
كواغد :، يااااع خايبة من فلك الفلكج بت تريد ضناها شلووون
ايمان : رجعت لضناها المن ترجع ام ستار ليا ضيم ، لقهره لقهر اهله لو لضرته .. بعدها زغيرة والعمر كدامها وما طول الطلاك اجا منه ، هلا بيه خل يطلك قابل بتنا متعاجزين منها .
نانة : احسن والله يوم يومين تنسى ، هي لو شايفته وخاطته بحظنها جان صعب بس مدامها مشايفته خل تعتبر روحها جابت ومات .
الاء: انتم شلون تحجون هيج ، طفل شلته ابطني ٩ اشهر ومنتظرته ومتحمله ثكل ووجع حتى اشوفه ، شلون تحجون هيج ، ابني هذا مو ابنهم
نهاد : زين الحل شلون الاء انت مريضة وجرحج ينز دم ؟ حجاية امي صحيحة اطي وعيشي
- وشلون اعيش وهو عدهم ؟ شيعيش يتيم لو عد مرت ابوه ؟ اذا اني الجبيرة وما تحملت ضيمهم وحقدهم ، طفل زغير شلون يعيش بيناتهم .. كوثر تكل للحية اني سمي اقوى منج ، جا شلون اختها ؟ وشلون امن ابني عدهن ؟ ما اكدر والله ما اكدر .
ايمان : اي لعد شلون يا بتي ؟ هالتشوفينه النذل سده بوجهج ولا ينرد من ابو ولا عمام بيش نرده ؟
ظليت كاعدة وكاضة باطراف الجرباية ومدنكة ، حجت امي : تمددي ونامي جرحج اخضر ، لا تضطين على روحج نامي .
حاجتني وكضت ايدي وساعدتني ارجع ظهري للسرير واتمدد ، كالتلهن ( خلنها تنام امشنا هناك ) عافني وطلعن ..نايمة والدموع تجري منا ومنا اطيح .
ما شفت كدامي غير رب العالمين
ظليت احجي وياه واناشغ
ربي ترضى ع الجاي يصير بيه ، شذنبي وشنو السويته حتى يسوي بيه كل هاي ، ربي تعبت الهي دخيلك اشملني برحمتك .. اذا هو ظالم انت فوك كل ظالم ، اريد ابني منك مو من غيرك ، والله ربي تعبت .
درت راسي وكمت اشهك وابجي بكل قوتي
الحرارة البكلبي لو ماي الدنيا كله ما يطفيه .. ما ادري شسوي وارتاح .. من افكر ارجعلهم الاكي روحي بنص القهر ومدري الياهو منهم اتحمله ، ومن اصد واتذكر حجي امي .. افكر بهالطفل شذنبه يعيش تحت رحمة العمام ومرت الأب بلى كل اهتمام واني ادري ابوه ما يلفي لببيت غير من ينام لو ع الاكل بغيرهن ماله غرص ولا يكعد ولا حتى يشارك كعدات اهله .. شيدري عن ابنه لو ظل عدهم ؟ .. تمرض برد ، انضرب صار ما صار شلون . ما اكدر .
