#كحل_عرب
(احضان باردة )
(((بقلم زينب ماجد )))
الحلقة_٢٧
( خطبة على غير هواة )
يكضيني الشرار وطبعي اضل بارد
(عريان السيد خلف )
دخلت لبست عباية وامي واكفة تخزرني تكلي اطلعي، همست الها : عوفيني والله اندمه
- شتسوين
كعد اخو ميادة وعباس يخزرني وامي تكله : عباس
يخزر بامي واجا يريد يطلعها انداريت للسيد ، حاط عمامة على راسه .. حجيت : السلام عليكم سيد بس اريد استفسر عن شي ما طولك حاط عنامة رسول الله فوك راسك .. الرسول يرضى بظلم ؟
يرضى باخ يكتل اخته حتى يغصبها على اخو مرتى
بس كلي فدوة سيد الله يرضى بالجاي يسوي بينا اليتسمى اخوي .
صاح عباس : طبي جوا لج
وكف السيد : سلامات صلوا على محمد
عباس : طبي اليوم محد يخلصج مني
- انت الجبرتني واذا الدين يرضى يغصبني اني موافقة .. واذا تريد اطكني كدامهم طلع مراجلك واضربني
جراني من جتفي امي كامت ادفع بيه والسيد يجره هو واخوه مياده صارت هوسة اني طلعت من كدامهم بعباتي طلعت من البيت راد يلحكني وهو يصيح .. عفت البيت وطلعت لبيت هدوة .
طبيت الدموع تجري عشرة عشرة ..
مامون ما جان موجود .. علي هستوة جاي من الكلية العسكرية ومروان هستوة كاعد من النوم الصينية جاي تحطها اله نوسة ، من شافني عكد حاجبه وهدوة صاحت : ها ولج
- والله طكت روحي من عباس كافي تعبت
احجيها ببجي فز مروان :
- شبيييي ؟
- ما خلا عظم بجسمي صاحي كتلني كتل امي الاء تعاي الا توافقين على اخو ميادة .. مرته تحجي براسه وهو وهو وراها مثل الأعمى شسووووي تعبت
كام مروان : لا ما اعلمه اليوم
هدوة : اصطبر يمه .. حتى عيب من الوادم يوميه هوسة ويومية ربدة .. اكعد
مروان : واسكتله دباعي شمسوي بيها هذا حسباله ماله رداد
- وهو صدك ماله رداد .. خلني امش واشوف سالفته شنهي
بعدها جاي تحجي وبابهم انهجم بالطابوك وهو يصيح : اطلعونها لا اليوم اهجم البيت والله ، طلعووووها
كام مروان من حيله ركضله .. كضاه وجراه للبيت كاض راسه مثل الجريذي ويكله : خب دخل اشوفن اليهجم بيتنا ياهو .
ويجر بيه للتواليت يريد يحط راسه بالبلوعة وعباس يرافس ويدفع بيه ومروان كاضة من علباته ويجر بيه ... وهدوة ونوسة يفاككنه من عند
فك روحه وطلع وهو يفشر على مروان ويصيح : نانة اذا ما ردت اليوم والله اهجمكم هجم واااااااالله
