#كحل_عرب
(احضان باردة)
((( بقلم زينب ماجد )))
الحلقة_٤
( غيرة نسوان )
شكثر ليلك چـواني
و روحي عطـابة
اعلـى جرحك ..
لــِ عريان السيد خلف ||🖤
وسن : من بعد الفاتحة مروان لح وهو يتقرب من عدنا ، واني كشت روحي منه كلش .. اكثر من مرة تعاركت وياه ، وبعده يرجع يحاول .. بعدها كام يتهمني اني اريد اعوفه حتى لشوفلي واحد .. طكت روحي ردت الطلاك منه بكل وسيلة منه لازك .
خليت واتصلت بالشخص الودالي رقمه ، الرقم ظل عدي بس طولت فوك الشهر يلا دكيت عليه ، رد : الو
- الو اهلا وسهلا منو
- انت مو التشتغل بالمحكمة مال مدينة الصدر
- اي تفضلي اني
- اذا رجال ما يرضى يطلك ، شلون اكدر اطلك منه
- تقدمين دعوة للمحكمة واطلبين طلاك ، اذا اكو اسباب مقنعة للطلاق القاضي يجري التفريق واذا لا ، تتنازلين عن حقوقج وتطلكين .
-- اني ما رايدة لا حقوق ولا شي بس اريد طلاك .
- اي سهلة ..تريدين اتوكلج بالقضية
- تتوكل شلون
- يعني تسويلي توكيل رسمي واني امشي بالقضية وانت ابيتج ، بس ما عرفت الاسم بالخير
- ام نور
- يا اهلا وسهلا ، سهلة ام نور تعاي للمحكمة باجر وخابريني ويصير خير .
سديت الخط منه واني افكر اخطيها لو ما اخطيها ؟
الى متى ابقى معلكة بأنسان يومية خايني ومعذبني بسوالفه ولاحكني وما فاك مني .
بس وعمي سرحان ؟
عمي سرحان ما يكدر يطلكني ولا راح يقبل من احجي بطاري الطلاك ، ما كدامي غير اقدم دعوة واتنازل واليصير يصير .
خذيت جهالي خليتهم يم جارتي دائما تجيني وتكعد وياي ، وطلعت للمحكمة خابرت على الرجال ، اجا من شافني عرفني : انت مو بت الشيخ سرحان
- بت اخوه
- يا هلا ومرحبا ، اني خادم
- الله ينطيك ، بس اني ما افتهم بهاي الامور اشلون
- هو طبيعي ما تعرفين ، تمشين وياي نقدم دعوة وتسويلي توكيل ونظل على الاتصال يمتى ما احتاج جيتج اكلج تعال
- شكثر اطول واطلك
- ما اطول هواي
خذاني ورحت سويت دعوة وقدمت تبليغ بالطلاك لبيت عمي ، كالو التبليغ يطلع باجر ، سلمت على الرجال ورجعت .
لكيت مروان واكف بسيارته كدام باب البيت ، من شافني تعدل من وكفته ، تعديته وجاي اطبن للبيت صاح : وين جنتي ولج
