#كحل_عرب
(الفوضى)
((( بقلم زينب ماجد )))
الحلقة_48
(ورقة تهديد)
إلك بينه...وإلك بينه....
ومشه المصيوب يتوجّه اعله عشرينه....
يحشّم وين المحبين...
وين الوفي اليوفينّه؟؟؟
يخوّتنه...يعشرتنه...
يشامتنه...ويواشينه...
وتبرّوا واليطيح ايكوم...
كون المستحه ابعينه...
يتل سنته ويدك الشوك....
وج يسنينّه اشبينه...؟؟؟
نشفنه ولا نداوة فيض...
بعد الموت تحيينه...
للشاعر(عريان السيد خلف)
حمزة: يم كصيبة، ضمي كصيبتج واتستري
- ليش ؟
ظل يباوعلي ، عفته ومشيت : شكد عيب واني اتعدل كدام الجامة وتالي الرجال كاعد بيها.
انفتح باب السيارة واني دايرة ، عرفت نزلمن السيارة من ضربت الباب ، انداريت اباوع وراية ، شفته انتجه على السيارة و يطلع باكيت جكايرة ، ورث جكارته ودفع الدخان .. اني واكفة اباوع .. دار راسه و هو يزغر عيونه بنظرة تركيز يباوع وراي .
درت اكمل طريقي وبالي بقى بنظراته ، رجعت اباوع ، لكيته داير ليغاد .. مشيت بطريقي ومواصفاته انرسمت ابالي .. صح شكله مو ذاك الجمال بس المواصفات التعجبني ارسمها بشخصيات الرجال موجودة بيه ، جتف عريض وخصر ضعيف ، عضلة ايده ، مسكت الجكارة .. دورت الراس .. اللحية الغترة الملفوفة على رگبته .. كل هالتفاصيل ظلت تتشكل براسي وتنرسم ، ما اعون اوصل للبيت حتى اخطهم .
وصلت لبيتنا ، عبدلله ابن ستار واكف ابمكان يمه كواغد ، تعديته و دخلت سلمت على امي كاعدة على الجولة تطبخ ، ومشيت صاحت وراي
- نانة وينها لعد
- شمدريني غير تطلع ويا صديقاتها
- كملي وتعاي ركبي التمن بمكاني بساع
- ماما عدي إمتحان شنية
- راح يصير الاذان واني خبز بعدني ما خابزة شلووون ، حتى عيوني راحت من الجولة .
عفتها ورحت للغرفة ، جريت دشداشتي لبستها وطلعت دفتر الرسم و كعدت ، خطيت هيئة السيارة ، وكعدت اخط تفاصيله وارسمها ، الوكفة الصفح وشلون ماد ايده لحلكه يدخن ، الساعة السودة بيدة .. شكلت اللحية على وجهه ، وظليت اصفن واتذكر التفاصيل .
نسيت اني كاعدة وظهري للشباك مال الممر ، طلعت ماما واكفة جاية وتباوعلي من الجامة تريد تشوفني صدك اقرأ لو اسخت وارسم ، دكت ع الجامة فزيت و كمت اطلع بكتابي .
طبت للغرفة: يعني كلت خطية تقرأ و حطيت التمن وصعدت خبزت بتنور الطين وخدي ، تالي كاعدة ترسمين الاء ؟
- لا هسه راح اقرا والله .
ارتبكت وهي اجت بعصبية جرت دفتر الرسم والقلم الخاص بالرسم وكل الألوان ، وصاحت : اقري يلا ادب سززززز .
