#كحل_عرب
(أحضان باردة)
((( بقلم زينب ماجد )))
الحلقة_١٢
(ثار ال صياد )
وانتشيت استاهلك ، شهكة عوافي
لــِ عريان السيد خلف||🖤
نانة : صعدت فوك السطح .. رغم رمي واشتباكات و هوسة ، بس مختنكة حيل مختنكة ..
موت ابوي كلش كسرني
رغم جان بس روح ونايم مشلول ، بس روحه جانت مدفيتنا ، جنت من احتار لو اضوج اجي اباوعله ، لو اخدمه ، اشربه المي .. اوكله الشوربة شوية شوية
نظراته .. دفو اديه واني اكضهن
وجوده ... كلهن جانن سند وشعور امان احس بيه
من راح احس روحي ظليت بلا امان .. تحت رحمة عباس يمتى ما عجبه سكت ولهى عني ولما اطك براسه يتولاني ...
كعدت ع الدرج الفوك ..
البيت ما اكدر اتحمله
كسرة امي ، و نعاوي يمه كواغد .. يهدم الحيل
اريد بس بالي يرتاح ..
عندي رغبة ابجي .. بس خنكة بصدري ما جاي اكدر ابجي .. اني مو من النوع الابجي بسرعة بجيتي كلش صعبة .. بس هالشي مؤذي حيل لإن ابقى كاتمة بصدري شهكة ما تطلع .
اباوع بالسما .. واتنفس وارد اتنهد بحسرة
دك التليفون باوعته (ابو الاكبر )
رديت بلا ما اكو الو ، حجه هو : كبل لا اطب محتاجة شي للجهال ؟
- لا نرجس يمكم راحت تلعب ويا جهال الاء وحيدوري نومته كبل شوية .
- شبيج
- شبية ؟
- ما ادري حسيت من صوتج بيج شي
- لا ما بيه .
تنهد وسد باب السيارة : شنو البكلبج باباتي .. احجيلي اكو شي .
من كال هالكلمة بسرعة تجمعت الدموع بعيوني .. وسكت بقى بس الصوت يطلع .
حجه : شبيج اكو ، احجي .
- لا ماكو بس مختنكة حيل
- من شنو
- مأمون اريد ابوية البيت ما ينحمل بلياه ، حتى لو مشلول اني احتاجه .
- اصيرلج ابو .
ابتسمت بعز دموعي : الله يخليك
مأمون : لا مو يخليني صدك ترا ابوج ما شالاج بكدي ، ولا صرف عليج بكدي ، اسمحيلي اعيرج بس ترى ما ارضى تبجين على ابوج واني الكل عمري حاطج على اجتافي وامشي بيج .
- مأمووون
- دسمعي سمعي .. مرة من المرات جنه بايتين بقصر جلوب .. بالسماوة وامج ما جانت ويانا فانت لازكة بيه وين ما اروح ، فنومتج بفراشي ونمت واني اتحلم ابطة
- هاي من جنت تحبها
- لج بابا اني احبها من جنه نلعب بيت بيوت ما ارضى الا تصير مرتي باللعبة ، دسمعي خل اكملج
