#كحل_عرب
(احضان باردة)
((( بقلم زينب ماجد )))
الحلقة_٧
(عقد )
الله كريم نگول بس هذا روتين
صح نمشي فوك الگاع بس احنا ميتين
(( عريان سيد خلف))
الاء: فزينا كلنا على صوت الباب وعباس يدفر بيه ويصيح ( الكاولييييييييييه فتحي البااااااااب)
كضيت جهالي وسن صاحت: طبي بالغرفة الجوا وسركي الباب .
خذيت جهالي وركضت بيهم للغرفها سركيتها وكعدت اتنخى بالله واهل البيت ، ما خليت امام ما دعيته روحي راحت من الخوف ، هرج البيت هرج ..
اتصلت وسن بمامون .. دفر الباب عباس ووكف اباب الصالة يصيح :وينها خل تطلع لا تخلوني افوت اسحلها ، وينهاااااا.
وسن : ما تستحي تدفر باب بيت بس نسوان بيه كدرتك ع النسوان والله هسه خابرت عمي اليجي يسحلك مو انت التسحل
- طلعيهااااا
- اطلع من بيتي لا تسويلي هوسة ، ودز مؤيد هو الياخذ الاء
جاي يحجون وهو ع الباب ما نحس الا مروان دفر الباب وطاحلك على عباس .. كضاه وحط راسه حدر اباطه ولوا راسه طيحه للكاع كعد عليه بوكسيات وهو يصرخ : ولك تهجم على عائلتي ك****** م***
عباس لا شال ايد ولا شال رجل بيد مروان كضاه كضيان ، طب مأمون مستعجل ، لكى عباس بالحلقة الاخيرة بينه وبين الموت شعرايه هو و مروان .. جراه من اديه .. طاح عباس بالكاع ومروان يصرخ بكل حيله ويريد يذب بروحه على عباس .
كتم يجر بيهم ...طلعاهم من البيت وعباس يتفل دم من سنونه .. تجى وكام على حيله ومروان يصرخ ، زرك من ادين مأمون ودفره دفره على ظهره طيحاه كبل على خشمه الدماية صارت تجري جريان من خشمه .
خابر مأمون على ايمان وكال الها : دزي مؤيد على عباس ، راح يموت اذا بقى كبال مروان
يحجي وايمان تريد تفهم شي من صوت مروان ما تكدر بالكوات كاضه مأمون .. بس السمعته عباس راح يموت .
دقايق وهي ع الباب .. جرت عباس ومؤيد لحكها وشالوه للمستوصف جنازة .. اندار مروان وهو يصرخ بنور بته : قفلوا الباب بسرررررررعة .
قفلنا الباب وظلينا ناكل بارواحنا .. اذا مروان دمى عباس ادمي شراح يصير ؟ ال ثجيل .. وعمي سرحان على دوسة البيت .
اتصل مأمون على ابوه جان ابيته الاول بالطالبيه كاله بوية السالفة كيت وكيت .. سرحان شيل التليفون وخابر على جبير ال ثجيل وانطاهم علم وياهم وكال الهم ابوه ذاب جرش وياي ، ان جانكم تكولون عمامة ونفزعله . اكاومنكم على دوسة بيت بتي .. وان ما طلعتوله .. فعباس رداه ابني ساعة التعدى حرمة البيت ودخل على بيت بس نساوين بيه ما بياش زلمه .
