#كحل_عرب
(الفوضى )
((( بقلم زينب ماجد )))
الحلقة_47
( رجوع احدهم )
عِــشكـَـْــتك حلم
بالوحشة البعيده اتسامر اجفوني
وعِــشكـَـتكَ
_عريان السيد خلف
بعد ما صحت بغداد في يوم ٩ نيسان على خبر سقوطها بيد الأمريكان ، هجم بعض العراقيين اللي يصح القول عليهم الا بكلمة (همج ) على الدوائر الحكومية ونهبها ..
صار الزغير و الجبير يطب ع الدائرة يبوك الكرسي والرحلة والباب والطاولة .. وحتى الشمعة اللي معلكة بحايط الدائرة باكوها ...
ليتسائل السائلة ، الناس اللي بطيحت بلدهم بدل ما يحفظوه ويصونوه ويرجعوه لحيله ، سرقوه ونهبوه ، شراح يسلط عليهم ربهم من حكام بعد ما سقط الصنم ؟
في بيت ابو علاء
رجع ابو علاء الصبح لبيته و هو يشوف الحال المأساوى للعراقيين ، والفرهود السايد بالشارع ، رجع للبيت حتى يشكي هالوضع لزوجته : الله اكبر الله اكبر ، ما تعرف تبجي تلطم على راسك والله مصيبة.
شكرية : شنهي جا مو كالو فضت بعد ماكو حرب
- اطلعي شوفي الوادم تسودنت فرهدوا المدارس الجوامع الدوائر ، حوسموا كلشي ، هاي الوادم ما تخاف الله ما تعرف الله ولكم مصيبة ... ولدج وين ؟
- احمد طلع من الصبح ، و حمزة ماهو ، وعلاء ذاك هو .
وكفت كوثر مرت علاء : خالة اسويلكم اريوك لو لا
- اي يمه سوي
جاي يحجون طب احمد وهو شايل باب على ظهره دخله للبيت ، وهو يصيح : يمه يممممه
كامتله امه، وابوه يعاين يريد يشوف احمد شبيه ، فزت امه ( يااااا شنهاي ولك )
- باب جبته من المدرسة الكبالنا ... ما تحتاجينه
فز ابوه : ولك انت ما تستحي على روحك ؟ اخذه من البيت بساع لا احركك انت وياه ، ييييييله
- بوية الوادم كلها خذت ، جا احسن ما تاخذها امريكا .
- تاخذها عسنها عليهم بالزهر ، البيتي ما اطبب حرام ، طلعه منا
- بوية هو باب شوف الناس شخذت مبردات و مكيفات ومراوح ، انا ماخذت غير هالباب
- جاي اكلك شيله منا بسرررررعه
طلع علاء على صياح ابوه واخوه ، تعاركوا و احمد يكله : لا تبيع دين براسنا هي الدنيا كلها خذت .
وابوه يصيح : بوك هاذ حراااام ما ما احطن ابيتي حرام .
اشتد الصياح بيناتهم وصل الحال بابوه يطك ابنه ويطرده من البيت ، جيف حوسم المدرسة ، و سد الباب عليه ومرتفع ضغطه و ام علاء تصيح : ولج كوثر سوي نومي البصرة العمج راح يروح من اديه .
