#كحل_عرب
( احضان باردة )
((( بقلم زينب ماجد )))
الحلقة_١٩
(كلادة ذهب )
مالة وكتي وياي ورطني بعشگ چذاب
لــِ عريان السيد خلف ||
عباس : يمه اني اريد اعرس الناس ياهو مالتها بيه ؟
ايمان : ابوك ما صاله ٣ اشهر على وفاته عباس .. عدة بعدني ما مخلصة انت شنو من كلب شايل امي
- يمه ياهو ماتي بيج ، كعدي هنا وهي زفة لا صفكة ولا علهولة نجيب البنية وانتهت ليش مكبرتها
- شلون ما اكبرها كلنا حزنانين على ابوك ، شلون تريد نحضر عرس
- جا هسه ما اضحكن وتسولفن ، لو بس من توصل لعرسي حزنانات .
كواغد : شماله هاذ يذربن ؟
عباس : محد يمج انت
كواغد : احترم روحك واحج عدل لا اديرن فجك والله
- رايد اعرس انت اكرميني بسكوتج
- اكرمنك وكت التفج من هالبيت وتفارك ، شوفلك خيسة ومزبلة بعيد عنا عرس بيها .
- الخيسة الج انت والمعوقات ذني الحاويتهن
- يمن تروحلهن فدوة يالنذل ، اخير منك ذني لهساع ما فجن حزنهن اعلى جدهن ، مت عين حاكم يوم الفرح عداله راح يصيرله ولد وعزوة ، تاليها تمرض و مات من حدر راسك .. الله لا يطيك ان شالله بجاه الزهرة .
ظل يغلط ويتجاوز عليها ، وايمان تصيح عليه وادفعه من البيت ، وكف وصاح : والله الا اعرس وغصبا ما عليكم ... بعد .
على صوت صياحهم ، اندكت الباب ، طلعت ريحانه تفك الباب ، علاء بالباب : ها السلام عليكم
- هلا وعليكم السلام
- بس اجيت على الاء ، موجودة هي .
- اي
بالباب وسمع صوت الصياح ، طلعله عباس : هلا علاء ، فوت للاستقبال
- خير اكو شي
- لا هيج سالفة اني والاهل
- خير ان شاءالله
طب للاستقبال ، اجته الاء كوة تمشي ، سلم عليها وحبها : تسودنت من عرفت صاير بيج هجي والعباس ، ما عولت بس احصل اجازة وارد ، شلون صرتي ؟
- وصلت الموت والله ، ما ادري شلون طلعت منها .
- شكلتي متكليلي
- شكلت مو تغديت وياك ، وتعيشت اني وجهالي لو بيه شي جا جهالي تسمموا وياي اسم الله بس كلشي ماكو .
- وهسه
- شهسه ، جسمي كله بايد وما اكدر اشيل روحي انتهيت .
- اخذج دكتورة ؟
- اليوم عود كلت اروحن
- اني اخذج ، تروحين وياي لو اظلين هنا ترتاحين
