#كحل_عرب
(الفوضى)
(((بقلم زينب ماجد )))
الحلقة_٧٤
(ورطة مروان )
وكلبت كل ورقة من عمر المحبة
وكلت بلجي ..
ولني بليالي العشك ما يوم عايل
لـِ عريان السيد خلف||
بطة : ولج شسويتيييي عزا العزاج
- محد كاللها تصعد النا ، وتصيح بنص سطحنا ساقطات ، هي الذبت روحها علينا واحنا بس ذبيناها من عدنا .
بعدتني بطة واني احجي ونزلت لام مروة ، ضلت تضرب بيها الفطيرة بلكت تصحى وذيج طايحة حظ عرج ما يطكها سوت روحها فاقدة لحد ما ذبن عليها مي ، فزت وحضنت امها وسوت نفسها مواته.
صف سيارته مأمون ، بطة عافتهن وصعدت واني طبيت ورا بطة : اكبر غبية لو عفتي البيت وطلعتي ، لا اطلعين
- وتريدين اكعدله
- اكعد على عنادها مو اله ، ديري بالج اطلعين هو هذا التريده .
طب مأمون: شمسوين بالبنية شصاير كلولي
بطة : سلامتك ابو الأكبر ، اني عايفة البيت الك والهالبنية ، اخذ راحتك كلش فلا الي غرض بيك .
تحجي وتلم وهي تبجي، كض ايدها وسحب الهدوم من عدها : تخابرين تغلطين وتصيحين غير افتهم شصاير
- من اجيتك البارحة اكلك الست*** المن تصنف علي وتضحك وما تكلي مال مروة ومستغفلنييييي ، هاي تاليتك مأمون تخليني اطلع واطبب هالساقطة البيتي .
- دهدي من ايدج خل نحجي ، عفت ابوي وزلم تارسة الديوان واجيتج ، صدك تحجين ، عوفي .. ست** شنو مال مروة شني فهميني .
- روح لابوك وافزع الهالساقطات وعوفني بحالي .
- بطة لا تكبرينها بعلي ما عدي شي وياها ، جابتلي غدا وصينية الغدا عفتها بالمطبخ .. ما شفتيها ما فرزنتي هالصينية المن .
نانة : اني الغسلت المواعين مو هي بس ما فرزت شي ، ارجع مأمون هي شويه وتهدئ
بطة : لا ما يرجع ، ياخذني لاهلي .
نانة: اهلي كلهم بالفاتحة بطة شبيج ، دكعدي حتى عيب من الاء هي بيا حال وتزعلين
- اسكتي انت
مأمون: ولج بابا والقران ما عدي شي وياها ، مكسرات البنية ما مخليات بحالها شي بعد اني شحجي وشكول ، لفي السالفة وكعدي .
نانة : غير اكلها
بطة : ليش مكتلي اجت مروة
- جابتلي غدا ومشت حتى ما رضيت تكعد ولا خليتها
- اي جا غير نبي ، انت من كل عقلك اصدكك ، صدكتك البارحة ، اليوم لو تموت والله ما اصدكك ، الساقطة نازعة هدومها بنص بيتي وجاي تكلي ما عدي شي وياها .
