السلام عليكم
توضيح بسيط قبل لا اروح اكتب
بخصوص تساؤلكم .. ليش مأمون سكت ببيت الأستاذة وبأي حق يدخلون ببيعة البيت .
بالعراق .. المغفل اللي ما يحميه القانون تحميه العشاير .
ام مروة لما انخطف زوجها باعت ذهبها وسيارتها وفلوسها واملاكها والعدها و الما عدها في سبيل تدفع فدية زوجها ويرجع ، اخذوا الفدية وقتلوه .
هنا ما صفالها غير البيت اللي كاعدة بيه
اكتشفت من بعد موت زوجها انو هو متزوج مرة بدون علمها ، والزوجة هاية عنده منها ابناء اولاد ٢ وبنية .. وحصة الولد بالورث كاملة مو مثل البنت نص ، فلو باعت البيت تتهجول ، وهي خسرت كل املاكها في سبيل زوجها ، بالمقابل اهل زوجها وزوجته الثانية ما ساهموا بفلس بالفدية ولا سعوا حتى يدفعوا وياها .. لما مات سنوا اسنانهم عليها يريدون منها البيت اللي ما بقالها غيره .. أستخدموا كل الطرق الخبيثة حتى يجبرونها على بيعة البيت .. هي هنا التجأت للعشاير .
شتريد ؟
اتريدهم بس يصدونهم حتى ما يجبرونها تبيع البيت ويكفون عنها ، ما نكرت حقهم بالبيت ، بس هي ما تريد تبيع البيت لإن بيتها وما عدها غيره ... ادخل سرحان وردهم وكاللهم البيت المرة ما تريد تبيعه واحنه وياها ومتكفلينها .. وهالأمور بسنن العشاير معروفه ، من يحطون ايدهم على شغلة تصير بكفالتهم .
عيالها اجو من باب ثاني .. وكلفوا جماعات من اللي خارجين عن القانون حتى يجبروها تبيع البيت ، هنا سرحان طرح فكرة ان مأمون يأجر الطابق الثاني بسعر مادي من الأستاذة ويسكن بطابق خاص وباب خاص ، يعني مو بتماس ويا النسوان .. بس بنفس البيت .
ليش لإن المرة تنختهم وتريد حماية لنفسها وردع ذوله عنها، فسكن مأمون .. تصديه للمغرضين وحماية للاستاذة وبنتها .
ما اعرف اذا وصلتكم الفكرة
بس لازم توصل .. لإن هالموضوع اصل الإنفجار اللي تنبئنا بيه بالجزء الثاني ..
اروح اكمل كتابة وارجعلكم بالحلقة ٦٩
كثفوا التصويت ع الحلقات السابقة حلقة حلقة .. نلتقي بالليل ... بوثاتي 😘 (بصوت فليح )
