لم يكن ذنبي

مشهد

مساء الخير حبايبي
اليوم جمعة وتعرفون ضيوف مكدرت اكتب بارت

وهذا مشهد مستقبلي لعيونكم

:: امشي بالكليه بملابسي الجديده اخخ واخيرا

اشتريت مثل البنات شي جديد وملبست فضالة العالم اليوم حسيت نفسي بشر مثل العالم الطبيعية التلبس وتاكل وتشتري

طايرة من الفرحة وبودي اصيح بأعلى صوتي اي اني

بت سهاد وعبد الرحمن القضوا على مستقبلنه وخلونه سالوفة للمجتمع بت عبد الرحمن الخلاني جدري بيدي واوكف انتظر سرايه باب الاعراس او الفواتح حتى يترسولي الجدر تمن نشبع بي ويخلصنا من وجبة من الوجبات والا نموت جوع اي هاي اني كسرت القواعد ورسمت طريقي وعشت أصعب الظروف وحاربت حتى اوصل الحلمي واحققه وأثبت لكل بنية انو رغم فقري وحتى لگمه اكل ماعندي ومن غير الكوارث الوكعت على راسي وهذا ممنعني احافظ على نفسي واكمل دراستي واوصل بشرف وعفه

حجاية خالتي نغم ترن براسي وخلتني اجاهد حتى اوصل لهذا المكان

نغم : خاله انتو لا تفكرون بدراسة بطلي وتعيني منظفه عاد راتب تاكلون بي لگمه خبز طالبين عاملات خدمة بمدرسة ريم الأهلية وكلت انطيج خبر
انتو هم ياله تشبعون بطنكم وينكم وين الدراسة ينطبق عليج مگدي وعلاكته حرير انتو بلقاع وتبقون بلقاع وضحكت..

وهاي اني اليوم أعلى من شهادة بتها الرادتني اصير عاملة خدمة بمدرستها وهسه تحلم تدخل هاي الكلية لو تحط رجلها بيها..

هذا الكلام جان حافز خلاني اوصل واكمل رغم الفقر اليوم بت سهاد طالبة كلية وتحقق حلمي ومبقيت بلقاع مثل موعدتني خالتي نغم امشي ووصلت الافتت الكلية

جامعة بغداد

((كلية القانون))

يعني صار اسمي المحامية..........عبد الرحمن عبد الله

وان شاء الله أحقق باقي أحلامي

هاي وحده من بنات سهاد 😁♥️

تصبيرة الباجر انزل بارت كلش تعبانه جانوا عندي ظيوف والكتابة تريد وقت
تحياتي ♥️♥️♥️