لم يكن ذنبي

البارت العشرون

صباح الورد والياسمين 🌺

ملاحظة (من البارحة كتبت البارت بس صار عندي ظرف ومكدرت انزله بدون تعديلات)

لم يكن ذنبي

للكاتبة حوراء الموسوي

البارت العشرون

#ذوله وآدم لو لگو بلكعده عانس...!

يصير كل موضوع عدهم بي عرس 💔

ولو لگو أعمى بطريق...

واحد يحاجي صديقه..

شوف يالون الشمس.. 💔

# ناس ماعدهم ضمير...

حنين : خالاتي وعماتي شالن العزه طبخ وجاي ويخدمن بلنسوان ومعصبات ولابسات اسود تحسهن الحنية تنكط منهن
اني زغيره كله عمري 13 عندي حجي كومه بكلبي اتمنى اكوم اطردهن او املخهن بيدي بس ابقى طفله بنظرهم ويلزموني يموتوني وانام بصف نور الدمها راح هدر بس عد الله ميضيع وحوبتها ان شاء الله متتعداهم وتحركهم حرك لا وهي عايشه رحموها
ولا من ماتت الناس رحمتها

محد رحم بنور وصارت سالوفة الدرب والنسوان والمنطقة وكل واحد يالف عليها قصة شكل
وحتى شرفها تهموها بي خليهم دم نور يجي يوم ويحركهم والزمن كفيل..

نور عاشت مرار وضيم وقهر وذل وفقر وكلشي بالكم مؤذي فهي عاشته هاي من غير الكتل مالت ابويه لان جانت طبعها ساكته ومن يرزلها متجاوبه وهو يتوقعها متجاهلته فيركض عليها يدكها دك خطيه حتى متصرخ او تعيط من يكتلها تبقى بس تتوسل بي يعوفها ان شاء الله الله ياخذ حقها ويرحمها برحمته

خلصت الفاتحة وكلمن رجع لحياته بسام رجع للانبار وحتى ماأخذ من خاطرنه احنا امه وأخواته وأصلا يمشي ويصيح لبستنه عار وكأنما نور ماتت بملهى!
بسام صار حزام ظهر لمرته وأهلها وصار واحد منهم واحنا حتى ميعرف شصار بحالنه شلون عشنه بسام يظهر فقط وقت المصايب او اذا يريد يأذي احد بينه يجي يصير رجال وهو عار ولو العار احسن منه..

غبت عن المدرسة لحد يوم سابع وره السابع قررت اداوم لان اني عندي مدرستي أغلى من روحي ولازم اعتمد على نفسي لان بعائلتنه اذا معتمدت على نفسك تصير ضحية ويجوز نهايتي تكون اسوء من نور..

صاحتني امي الي صار حالها يقهر ويكسر الخاطر وصارت جنها عمرها ٦٠ سنة وهي بعدها زغيره مو كلش جبيره وتلوم بروحها وبعديش فات الأوان ونور غطاها التراب وين جانت امي من احتاجتها ورادت حظن ام دافي

سهاد : حنين تعاي يمه

حنين : ها يوم كولي تقربت منها جرتني باستني وجان تكول

سهاد : لا تخلين موت نور يأثر على دراستج اريدج تدرسين واذا شفتي الأسود ضايقج نزعي بعدج زغيره انتي ومحد يعتب عليج