ဧည့်ခန်းကျယ်ကြီးထဲတွင် လူစုံတက်စုံ။ ရိပေါ်တို့ သားဖသုံးယောက်လဲ ရောက်နေသလို၊ အဒမ်တို့ သားအမိလဲ ရှိသည်။ ဆိုဖာ၏ ထိပ်ဆုံးတွင် မားက ထိုင်နေကာ ညာဘက်ဘေးတွင် ဦးက ထိုင်၏။ ဦး၏ ဘေးတွင်တော့ အန်တီလီက နေရာယူကာ၊ အနောက်ဘက်က ဆိုဖာတွင် တီလျဲ့က တစ်ယောက်ထဲ ထိုင်သည်။
ဦးတို့၏ မျက်နှာချင်းဆိုင်ဆိုဖာတွင် ရိပေါ်တို့ သားဖသုံးယောက်နှင့် အဒမ်က ထိုင်၏။
*တရုတ်ကို ပြန်မလာတာကြာလို့လား မသိဘူး အများကြီး ပြောင်းလဲသွားတယ်နော်*
*ဟုတ်တယ် လျဲ့ရေ..ဒီမှာ ငါတို့ငယ်ငယ်တုန်းကဆို ကားတဝီဝီနဲ့ ရှုပ်ယှက်ခတ်နေတာ။ အခုများတော့ ကြည့်ပါအုံးအေ*
မေမေက တီလျဲ့စကားကို ထောက်ခံကာ အန်တီလီကတော့ ရယ်လျက် ခေါင်းညိမ့်သည်။ ရိပေါ် မသိမသာဖြင့် ဦးဆီ လှမ်းကြည့်လိုက်သည်။ T-SHIRT fit sizeအဖြူအား စတ်ုလ်ပန်အနက်ဖြင့် တွဲဝတ်ထားကာ လက်တွင် တန်ဖိုးကြီး လည်သာနာရီတစ်လုံး ဝတ်ဆင်ထားပြီး စကားဝိုင်းကို နားထောင်သူ တစ်ယောက်အနေနှင့်သာ နားထောင်နေပုံပင်။
*ဒါနဲ့..ရိပေါ်လေးတောင် ဒီအရွယ်ရောက်လာပြီနော်။ ငါပြန်လာတုန်းက အသက်၁၃လောက်ပဲ ရှိအုံးမယ်။ အသက်လေးသာ ကြီးလာတယ် လူကောင်လေးက သေးသေးလေးပဲ*
*ဟုတ်ပါ့ကွာ..နင်တို့တူက အစားအသောက်ဆိုလဲ ရှောင်တာတွေက များနေတာလေ*
ရိပေါ် လူကြီးတွေ စကားဝိုင်းတွင် ပြုံးနေရုံသာ။ တီလျဲ့က စကားပြောတာ အရင်ကထက် သွက်လာ၏။ ဇာပိတ်ဖြင့် ချုပ်လုပ်ထားသည့် ရင်ပြတ်အနက်အား ကုတ်အနက်ဖြင့် ခြုံထားကာ အောက်က စကပ်အတိုလေးဖြင့်။ ခြေချိတ်ထိုင်ထားပြီး ဆိုဖာနောက်မှီတွင် ထားရှိသော အရုပ်ခေါင်းအုံးလေးအား ပေါင်ပေါ် လှလှပပလေးတင်ထားပုံမှာ အတော်ကို စမတ်ကျနေ၏။
*ညကျရင် ပါတီပွဲရှိတယ်နော်။ အိမ်ပြန်မနေကြနဲ့တော့လေ သားငယ်တို့က ဒီမှာပဲ နေလိုက်ကြ*
တီလျဲ့သည် မား၏ စကားအား ဝင်ထောက်၏။
*မရဘူးလေ မားရဲ့။ အိမ်ပြန်ပြီး ရိပေါ်လေးတို့လဲ အဝတ်အစား လဲချင်မှာပေါ့*
