ام صالح مازالت حاظنه نوير وتمسح على ظهرها وفكرت انها تفرحها شوي قامت واقفه واخذت انوير بيدها
تعالي يابنتي تعالي اوريتس غرفتس الي بتسكنين فيها تعالي وجرتها معها وهي تحس بفرحه الها اسنين ماحست بزيها
ام صالح فكرت وين تحط نوير شافت ان اجمل مكان في البيت جناح ولدها الصغير هالجناح عباره عن غرفة نوم كبيره وصاله جانبيه متوسطة الحجم وحمام الله يكرم القارئي وهالجناح له باب يفصله عن باقي البيت وهو حاليا خالي مافيه احد لانهم بانينه عشان لاتزوج صالح يحط مرته فيه وصالح حاليا له غرفه خاصه بعيده عن هالجناح
ام صالح دخلت الجناح وهي تقول شوفي يابنتي شوفي هذي غرفة نومك وذي الصاله بحطلك فيها كنب وتلفزيون وبعد مكتب صغير علشان تدرسين عليه هاه وش رايك
نوير حست من شكل الجناح انه مبني مخصوص علشان يكون لولدها اذا اعرس (كثير من العوائل السعوديه خاصه قديما اذا بنو بيوتهم يعملون احساب زواج اعيالهم وهم يبنون )
نوير ماله داعي ياخاله انا انام في اي غرفه متوفره لاتكلفين على عمرك وتفرشين علشاني وبعدين هذي اكيد حقة الضابط
ام صالح :لااسمعك تقولين ياخاله ناديني يمه والضابط ماعليك منه البيت بيتي وانا الي اقول من يسكن هنا وانا اعطيتك هالغرفه وماني متراجعه في كلامي والاتعارضيني بشي
بعد الظهر من نفس اليوم رجع الضابط من دوامه لقى ابوه يتقهوى في المجلس السلام عليكم
ابو صالح :وعليكم السلام هلا الله حيه
صالح :الله يبقيك يبه وين الوالده عنك اليوم
ابوصالح :امك من يوم ماجت هالبنيه وهي متولجتها زين يوم جابتلي القهوه
صالح :هههههههه اجل نفرتك ام صالح وصاح بعدها يمه يام صالح
ام صالح اسمعت ولدها ينادي وراحت له دخلت عليهم المجلس وكل خليه في جسمها تنطق فرح
كان صالح واقف قريب من ابوه يوم شاف امه ادخلت واستغرب من الفرحه الظاهره عليها وبقوه وتذكر كيف ان امه من اخر حمل خسرته وهي حزينه ومكسوره وكيف انها اذبلت ولاعاد تنشاف الضحكه على فمها
ام صالح دخلت وتوجهت لصالح مباشره وصارت تكلمه بلهفه وهي ماسكه يده اسمع ياصالح ابيك توديني السوق باشتري غرفة نوم لبنتي نوير وباشتريلها بعد كنب وطاوله تذاكر عليها وبعد ابي اشتري تلفزون علشان لاطفشت تلقى شي تسلابه وبحطها في الجناح الصاد عن البيت علشان تاخذ راحتها كانت تكلم وتلعب بيد ولدها والفرحه ماعاد تلقالها في نفسها محل من كبرها
صالح انصدم صدمة عمره جناحه الي عاش عمره ينتظر متى يشوف فوز عايشه معه فيه هالحين امه بتعطيه هالبنت الغريبه الي مايدرون من وين جايه
ولابعد بتأثث لها اثاث جديد وبعدين وش كل هالفرحه الي يشوفها في وجه امه علشان هالبنت الظاهر انك غلطت غلطت عمرك ياصالح يوم سمحت لبنت غريبه تدخل بيتكم
صالح :يايمه ياحبيبتي هاذي بنت غريبه وكلها يومين ونلقى اهلها وترجع لهم تكفين يايمه لاتعلقين نفسك فيها
ام صالح حست كلام ولدها سكين وانغرست في وسط قلبها سالت دموعها ورا بعض كنها السيل وقالت وصوتها يرتعش من البكى بس اسكت اسكت ماعاد ابي منك خير بس لاتقول بترجع لهلها وين اهلها من طول هالمده وين نوير من هالساعه بنتي انا انت توحي نوير بنتي
ابو صالح تأثر من حالت زوجته واشر لولده يسوي الي هي تبي
صالح ضم امه لصدره وباس راسها خلاص يالغاليه تكفين لاتبكين وينقطع الساني كاني زعلتك بشي ومايصير خاطرك الاطيب ابشري العصر اوديك لسوق واشتري كل الي تبينه ياجعلني فدى لتراب ارجولك يام صالح
ام صالح مسحت دموعها وهي للحين موقادره تسيطر على مشاعرها
ابو صالح حزن على حال حرمته وخايف عليها من الجاي ياترى لالقو اهل البنت وش بيصير فيتس يام صالح
