اخذت لفه كامله
على الاغراض ماتدري وش فيها اليوم عندها طاقة
سخافه لامحدوده اول مخذت لفه على الاغراض وصارت
مقابله لباب المشب اشهقت بروعه من الي طاحت
عينها في عينه اختبصت ماتدري وش اتسوي احذفت
خيشة البصل الي على راسها جهته واهي تتمني انها
تصيبه لاكن لثقل الخيشه وضعف الرميه يادوب تجاوزتها
بمتر وطاحت في نفس الوقت الي احذفت فيه خيشة البصل بعدم وعي اصرخت الله ياخذك يالسربوت واركضت
داخل اوصلت غرفتها ادخلت واصقعت الباب وراها وتسندت عليه وبدت تستوعب وش صار عماد شافها
واهي مخلقنه وملابسها كل قطعه من ديره ولابعد
شافهاواهي تستظرف نفسها ياربي اهي اهي اهي
وبدت تبكي بفشله الحين وش بيقول عني هبله وماتفهم
عوده لحظات ورى في نفس الوقت الي اطلعت فيه
شيخه للحوش كان عماد جالس مقابل لباب المشب
باتفاق مع نمر علشان يشوف شيخه وهذا الي خلى
نمر ينزل الاغراض قدام باب المشب بالتحديد
اما نمر كان واقف ورى شباك المشب ويراقبها من الشباك
عماد بعمره ماشاف شيخه وكان وده يشوفها لولمحه
على الاقل يكون عنده فكره لوبسيطه عن الانسانه الي ارتبط فيها ويرتاح من القلق الي عذبه
عماد ياترى كيف شكلها طويله قصيره نحيفه دبه
اهم شي راح ارتاح لها لاشفتها اولا قطع تفكيري
الظهور المفاجي لبنت مدري وش اقول عنها لاني
انشغلت بالي قاعده تسويه كانت واقفه تتامل الاغراض
وفجأه بدت تعد عليها حقره بقره ياربي اول مره
اشوف بنت بظرافتها والاخبصة الملابس الي لابستها
شي ثاني كنت اتأملها برواقه لحد ماشافتني
انفجعت مسكينه واحذفت البصل الي على راسها
وانا ونمر انفرطنا ضحك بس والله كان ودي اقوم
احضنها على الفجعه الي صابتها
صحى من افكاره على صوت نمر الي اخيرا قدر يسيطر
على نوبة الضحك الي صابته
نمر : وهاذي حرمتك الرجه وشفتها عسى مافجعتك بس
عماد : هههههه والله انها خطيره بنت عمي انا خلاص
باعرس
نمر : اقول تركد بس مافيه عرس تدري انها متاخره في
الدراسه عطها سنتين ثلاث
عماد بجديه : الدراسه تكملها في بيتها زين اذا صبرت
لين تجي العطله الطويله يمكن استعجل واخلي العرس
في عطلة منتصف العام الدراسي
نمر : والله عاد منك لعمك مالي دخل بروح اشوف شيوخ
هالحين تلقاها حاقده علي
عماد رجع يضحك على شكلها وقام قعد عند الوجار والقهوه
نمر دخل يدورها وقالتله امه انها ادخلت تركض وصكت
غرفتها عليها
وقف في الصاله يناديها : شيخه ياشيخه
شيخه ماصدقت اسمعت صوته امسحت دموعها واطلعت
اول ماشافت نمر قامت تلقط من الشباشب والجزم
وتحذفه : ياحيوان ياوصخ فشلتني طيحت وجهي
هالحين وش تبي الرجال يقول عني والله انك مخفه
تتكلم وتحذفه واهو يرواغ ويبعد عن طريق قذايفها
واهو يضحك ويركض في الصاله واهي تركض وراه
وتسبه
نمر واهو باقي يتنحش عن شيخه
: ابشرك اعجبتيه حتى يقول نادها الي بنسري لبيتنا
شيخه عصبت زود : مالت عليك انت وياه
واحذفته بالشبشب الي اخيرا اصابته في ساقه
انحاش للمشب واهو يحك ساقه
: الشرهه على الي يسعالك في شي حرمتك اكسرت رجلي
بنعال
عماد فرط ضحك وهو يشوف نمر يحك ساقه
: ياعساك فدوه لحرمتي
