في الجنوب ارض الخير والخضره وبتحديد في بيت مفلح اخو النايفه
في جلسه جميله قدام بيتهم النايفه وجوزاء باسطات لهن فرشه صغيره على الثيل والورد موزع حول الجلسه بطريقه فنيه جميله
كانت جلستهن هاديه يتقهون وياكلن حلا ويسولفن
سوالف متنوعه وبينما هن على هالحال شافن مفلح مقبلن عليهن واول ماوصل عندهن قامت النايفه من مكانها وخلته لاخوها وكانت متكيه على مركى بينها وبين جوزاء وجلست مقابله لاخوها ومرته وجرت طوفرية القهوه يمها واخذت منها فنجال وصبت فيه قهوه ومدته لاخوها
مفلح اخذ الفنجال من يدها وتوجه لها بكلامه
مفلح :يالنايفه ترا اليوم جاك خطيب رجال والنعم فيه خويي من اسنين واعرفه زين
النايفه قاطعته تعرف رائيي في هالموضوع يامفلح ولاعاد تفتحه معي
مفلح عقد حواجبه بغضب ونهرها بصوت عالي بافتحه يالنايفه وبابت فيه وانهيه وبكره ملكتك انتي وسعود وغصبن من ورى خشمك
النايفه وقفت بغضب قلت زواج ماني متزوجه لاسعود ولاغيره وهذي حياتي وانا حره فيها
مفلح فز واقف وفزت معه جوزاء ووقفت بينه وبين النايفه
جوزاء تعوذ من بليس مافيه شي بالغصب
مفلح يطبخ من الغضب اخته صكت الاربعين وباقي ماتزوجت وهو ماهوبدايم لها المشكله انها تنخطب كل شوي حتى مع كبر سنها وهي ترفض والناس قامت تألف عليها قصص اشكال والوان
مافي نخوه يالنايفه ان خليتك كذا علك في حلوق الناس وانتي شيخه بنت شيخ
دف جوزاء من غير شعور وخم النايفه بشعرها اسمعيني زين يالنايفه انا شبعت من هرج الناس الي ماله سنع ولاعاد في صبرن عليك وصار ينفظها بشعرها سمعتي بكره الملكه وخليني اسمع لك حس
النايفه تنتحب افا يخوي تصدق فيني هروج الناس وانا اختك رابيتن على عينك وانت اكثر واحد يعرف ان العيب مايطلع مني
مفلح ادري ادري بس الناس ماتدري وبعدين انتي وش الي رادك عن العرس علميني ابي افهم عطيني عذر مقنع اواجهبه الناس وانا اتركتس بدون زواج العمر كله
النايفه من غير اعذار انا مالي رغبه في الزواج تكفى يامفلح داخلتن على الله ثم عليك وتعلقت في صدر ثوبه بيديها وهي تبكي وصارت ترجاه بعيونها الي تصب دموع داخلتن على الله ثم عليك يامفلح لاتغصبني على شين كارهته نفسي تكفى رجيتك ياولد ابوي
مفلح ماعاد لرجاوي نفع يالنايفه الرجال عطيته كلمه وانتهى الموضوع
جوزاء فزت من مكانها الي طاحت فيه وهي تبكي وخمت ايدين مفلح تبوسها تكفى يامفلح لاتغصبها ونفسها عايفتن الزواج
مفلح وصل حده من الغضب والقهر وده يعرف وش الي مانعن اخته عن الزواج ولاهو مقتنع ان رفظها من غير سبب وهذا الي زاده عناد وصرخ فيهن خلاص انتي وياها لاعاد اسمع طاري هالموضوع بكره الملكه يعني بكره وتركهن وطلع من المزرعه كلها
النايفه انهارت في الارض منكبه هلى وجها وتصيح وتبكي جوزاء تبكي معها وتحاول تواسيها خلاص يالنايفه قطعتي قلبي تكفين لاتبكين ورفعتها من الارض بصعوبه وسندتها على صدرها وقامت تمسح على شعرها بيدها بس خلاص ذبحك البكى قومي معي قومي ادخلي غرفتك النايفه قامت معها وهي تسند عليها ومازالت تنتحب بقهر
