الشرقيه
شيخه : اخذي صينية الحلا وانا باخذ الحافظه حقت المعجنات
مضاوي لابسه اجلال الصلاه ومغطيه فيه وجهها ومنسفته على ايديها
-اف انا هالحين كيف اشيل وذا الجلال قروشني اعدله من جهه يطيح من جهه
شيخه : ياربي منك الجلال وش لازمته هالحين قلتلك نمر ماهوب فيه وهذا احنا جينا من بيتكم ودخلنا بيتنا ولالقيناه متقرقشه لهالحين ليه
مضاوي : يابنت اخاف انزله يجي اخوك على حظي الشين
شيخه سحبت الجلال من فوق مضاوي وبين فستانها المورد الجميل
-اقول هاتي بس وشيلي الصينيه خلصيني
مضاوي شالت صينية الحلا الي جايه بشكل مستطيل متوسط الحجم وطلعت هي وشيخه من المطبخ متجهات للحوش عشان يروحن لبيت ام مضاوي من الباب الي في الحوش
مضاوي خايفه يجي نمر ويشوفها كاشفه من كذا تمشي بسرعه اقرب لركض منها للمشي ودب طخ اصدمت بشي ارفعت نظرها بشويش شافت نمر واقف قدامها معقد حواجبه وواضح انه كان بيدخل مع نفس الباب الي هي طلعت معه مضاوي انخرشت من طوله وعرضه مع انه ماكان ضخم بس هي نتفه انخرعت وقامت ترجف ماتدري وش اتسوي ومن الخرشه ارفعت الصينيه الي في يدها وتوب طخ اقلبتها على وجه نمر وانطلقت لبيتهم صاروخ
نمر انصدم من البروده الي اكتسحت وجهه وفي لحظه استوعب الي صارله مسح الحلا الي ترس وجهه ولطخ ملابسه بيده بعصبيه وهو متقرف وفي لحظه فصخ النعال من رجله بسرعه وهو حده متنرفز وحذف مضاوي بس مضاوي قيدها دخلت مع الباب قعد يسب ويشتم ويهاوش وشيخه عنده ميته ضحك على الي شافته
ماتوقعت خرشة مضاوي توصل انها ترمي الحلا في وجه نمر علشان مايشوفها
نمر التفت على شيخه وانتي وش تضحكين منه ياحيوانه قومي نضفي القرف ذا وهو يشر على الصينيه الطايحه في الارض ومحتوياتها متناثره حولها وكمل والحيوانه ذي انا اوريها والله ماخليها لها واتجه للحمام (تكرمون ) علشان يتسبح
شيخه تمشي وراه نمر تكفى لاتزعل ترا الخبله ذي ماتقصد والله ماسوت كذا الامن زود الحياء ماتبيك تشوفها
نمر التفت عليها وهو يطبخ غضب نعم نعم اي حياء الي تكلمين عنه قصدك قلت حياء ويالله تقلعي جيبيلي ملابس باتروش والسامجه ذي انا اوريها
مضاوي دخلت بيتهم تركض ومرت امها ومرت خالها الجالسات في الصاله يتقهوون وتعدتهم وهي مخبيه وجهها بكفوفها وتبكي نادنها بيعرفن وش فيها بس ماردت وكملت طريقها لغرفتها ودخلت وسكرت الباب وراها بعصبيه واقفلته
سندت ظهرها على الباب وقعدت تفكر ودموعها تسيل يافضيحتك يامضاوي الحين نمر بيقول البنت ذي ماهي متربيه وبس تمشي تستعرض عندي اخ انا الهبله وش خلاني اسمع كلام شيخه وانزل اجلالي احسن شي ماعاد اروح لبيتهم وافك عمري ابتعدت عن الباب وراحت اجلست على سريرها بهم
