في بيت عم مضاوي
ابو نمر : يابو لافي حنا جايينك نخطب مضاوي لولدي
نمر
ابو لافي اتسعت ابتسامته بخبث
: هذي الساعه المباركه مير انا عندي شرط
ابو نمر : وشهو شرطك
ابو لافي : تحط في يدي ثلاثين الف ريال حقي ياعمها
ابونمر ونمر تبادلو نظره غاضبه وفي نفس الوقت نمر
اشر لابوه بمعنى اتركه علي
نمر ركز انظره في عيون ابولافي وهذاك بدى يهرب
بعيونه يمين يسار فهو يعرف قوة هالعائله زين
وماشرطه الامحاوله انه يكسب من وراهم شي
برضاهم والا لاعودة للغصيبه يدري زين انهم
يقدرون ياخذون بنت اخوه وغصبن عنه
خاصه الوحشين الي ماجو ابو سعود وابوعماد
وهالوحش الصغير طالع عليهم الله يكفينا شره
نمر :اعطيك الثلاثين بس بشروطي
ابو لافي: ووشهي اشروطك
نمر : عندك نصف ساعه بس علشان تجيب المملك
في بيت عمتي وتعقدلي وفي نفس الوقت انا بروح
اسحب الفلوس من البنك
بس سالفة الفلوس تبقى سر بينا حنا الثلاثه وبس
واذا جاء المملك انت مالك دخل في اي شي
عمتي وبنتها يشرطن الي يبن ماتدخل في شي
ابد تحضر توقع تاخذ فلوسك وتمشي بسكات
ابو لافي : موافق بس تعطيني الفلوس قبل التوقيع
وش يضمن لي انك تعطينيها لاوقعت
نمر : مافيه والافلس قبل توقع وضمانك الوحيد
هو اني انا نمر بس انت لاعطيتك الفلوس قبل
توقع مالك ضمان وببتسامت سخريه لانك ابو لافي
ابولافي اسود وجهه وهو عارف المقصد زين
بس ماعليه خل اسوي الي يبي واخذ الفلوس
بارده مبرده
بعد ماطلعو من عند ابو لافي
ابونمر وهو حده متنرفز : انت من جدك بتعطيه
الفلوس ليه وش حضرته يتشرط على روسنا
نمر يقاطعه : يبه الله يهداك انا ماني بعجزان
اعلمه قدره واخذ بنت اخوه غصبن من ورا خشمه
بس باعطيه الي يبي واخليه يذلف من غير
فضايح موب علشانه علشان مضاوي
وش بيكون موقفها وهي تسمع ان عمها
يبيع توقيعه على عقد زواجها بفلوس
تكفى يبه السالفه ذي لاحد يدري عنها
والاحتى امي وعمتي بندفن ردى الردي
ونقول ماشفنا الا الطيب
ابو نمر ابتسم بفخر بولده : انا اشهد انك راعي الطيب
نمر وصل ابوه للبيت وتوجه للمصرف يصرف الفلوس
الي طلبها ابو لافي
دخل ابونمر يدور امرته في البيت مالقى احد راح
لبيت اخته لقاهن كلهن في المطبخ يرتبن المواعين
في الدولاب
مضاوي اول ماسمعت صوت خالها اندست بين الدولاب
حق المطبخ والثلاجه وهي تنتفظ من الحياء والتوتر في نفس الوقت
ابونمر لمحها وهي تخبى وابتسم يعرف بنت اخته تستحي
بزياده علشان كذا سواء نفسه ماشافها تذكر كلام نمر
وحب يرفع معنوياتها شوي
: ابشركم رحنا لعم مضاوي والرجال ماقصر يقول
ماني بلاقن لبنت اخوي احسن من نمر وااوعدنا
يجيب المملك ويجي يملك لها في بيت ابوها
