ترفه قالت كلامها وقامت اجلست قدام ابومطلق
وحطت اكفوفها في اكفوفه وكنها بنت تطلب من ابوها شين
تبيه
: يابومطلق انا طالبتك حاجه قل تم
ابومطلق الي ماينقصه مكر والادهاء وذهنه دوم حاضر
رغم كبر سنه اقتنص المعنى وحب يسد الباب من قبل
لاينفتح
: ابشري بعزك وكل غالٍ يرخص لك الا الطلاق
محدٍ يجي في ضنه انه يرزق بحفيد من بنت القناص
ويفرط فيه
ترفه : ماعندي غير هالطلب طلب وماهقيت انك تردني
بعد ماحطيت رجاي بعد الله فيك وابو مطلق يشيل
الناس باسمه وصيته وماهو في عازت احد يشيل
اسمه على اكتافه وانا اشهد ان ابوي ماحطني
في ارقبت ولدك الا على صيتك
علي : مايصير اطلقك وابوك حاطك امانه في رقبتي
ترفه سافهه علي ومتوجهه بكلامها كله لابومطلق
هالرجال مادخل مجال نظرها والاهو الشخص
الي يلفت انتباهها
: يابومطلق ابوي ماحطني في رقبت ولدك الاوهو
يبي يتطمن ان وراي من يقف في اظهري ويساندني
وقت عوزه وانا اشهد ان ابو ابراهيم ماقصر
وقام بالحمل ووجهه ابيض وعقده علي الحاله
تمم وصية ابوي وادى امانته وانا هالحين
ماني بوحيده والي في ال مطلق ابو وولد
من يعترض لي طريق وابومطلق ابوي
ومن يتبعلي اثر وهالنشمي اولدي
قالته واهي تاشر على ابراهيم
ابراهيم اول من رد : ابشري بعزك والك علي مثل
مالامي الا ان جاء في خاطر امي عليك شي
امي ماقبلها والابعدها احد
ترفه : والنعم وهذا الهرج الصحيح الي مافيه خير
لامه مافيه خير ل الناس وامك مالها عندي الاالتقدير
والاحترام ومن هالساعه عدها اختي الي ماجابتها
امي
علي من البدايه ماحب هالحرمه والاارتاح لها ابد
ومن بعد ماعرف قصة ابوها وشاف اسلحتها
عافها زود الحرمه مستقويه وباسها شديد
وش حاجته في وجع الراس يكفيه ام ادميعه
الي ناشبه في حلقه وام راس يابس الي
شكلها اقفت عنه وهالنوبه بيبلش في قائد الجيش
الا هذي قائد القوات الخاصه على سن ورمح
ابومطلق كان طول كلامها يفكر ويقلب
الموضوع في راسه البنت ماخلت له حجه
وبمحاوله لإجاد مخرج
ابومطلق : وش سبب طلبك لطلاق اقنعيني
علشان اقدر اتغاضى عن الحفيد الي انتظره منك
ترفه : طال عمرك انا ترفه بنت القناص وابو ابراهيم
عنده غيري حرمتين وانا ماني بالي تاخذ ثلث رجال
انا ياما خطبني ارجال نصيبي فيهم وافي
من الي يعدنهم بنات الرجال مكسب
والاواحد فيهم رقى هنيا قالته واهي تأشر
على محجر عينها ماهو قصور فيهم لاكن لزودٍ
في عن باقي الحريم ومابعد شافت عيني
الي اقول هذا هذا
وهالنوبه تبيني ارضى برجال مالي فيه الاثلثه
علي اندبلت كبده من عنطزتها وش شايفه عمرها
ذي تكفين يالانوثه الي منصبه بين اظلوعك
اقرب مالك حارس على بوابة الحاير ( الحاير سجن
موجود في مدينة الرياض )
