عوده ل راكان وصيته ووليد واسبوع مابعد
الوصيه
راكان في ذاك اليل سهر عند رائد وكانو يتكلمون
عن كل شي الا الوصيه من بعد مانتهى كلامهم عنها
اول ماوصل راكان ماعاد افتحوه مره ثانيه
رجع راكان للبيت متاخر اشوي وماشاف سيارة
وليد دخل البيت لقى البنات سهرانات في الصاله
يتفرجون على فلم جلس معهم
راكان : وليد وين
هلا : من يوم طلع من بيت عمي ماجاء بس كلم امي
بعد صلاة العشاء وقالها بينام في الاستراحه هو والشباب
راكان حس بضيق جده حطهم في موقف لايحسدون
عليه خاصه وليد بعد ماكان رايح يملك يلقى نفسه
مقيد بشرط ماله سنع وفوقها يمكن خطيبته تطير
من يده الصراحه شي يقهر ولوكان هو في مكان وليد
مايدري وش ممكن يسوي يمكن من القهر يروح
يخطب وحده ثانيه ويتزوجها ويدخل عليها في
نفس اليله والا انه يرضخ لهالوصيه
صحى من هواجسه على صوت حلا
حلا : افرض وليد ماقدر يجمع المهر وش بتسوي
راكان وقف وابثقه : راح اجيب المملك واملك على صيته
وتركهم وصعد لغرفته
والبنات اشهقو من الصدمه توقعو انه يرفض
يعصب يسوي اي شي الاانه يقولهم بكل بساطه
انه راح يتزوجها
هلا : يارب تساعد وليد ويقدر يجمع المهر ماني
متخيله صيته مع احد ثاني غير وليد
حلا : المصيبه انه موب اي احد هذا راكان اخوه
يعني مره قويه سالفة ان خطيبتي تروح لاخوي مره
صعبه
حلا : وليد مستحيل يسمح ان المهزله ذي تصير
حتى لو ماجمع المهر مستحيل يتنازل عن صيته
هلا : الله يستر لايتهاوشون اخواني على درب هالوصيه
وليد في الاستراحه يتضاهر انه طبيعي وماهو متأثر
بالوصيه ومن بعد كلامه مع ابراهيم وراشد عن الوصيه
اول ماجاء سكر هالموضوع والاعاد افتحه
بعد ماتعشى مع الشباب راح ينام وصحيو من النوم
مالقوه يضنون انه راح للبيت وفي البيت يضنون
انه مازال في الاستراحه واستمر طول الاسبوع
اهله مايشوفونه الاوهو طالع لدوامه الصبح
ومايرجع الا في وقت متاخر وهو تعبان ومهموم
واذا اسئلوه وينك قال في الاستراحه
عند اخوياه في الاستراحه يمرهم بعد مايطلع
من دوامه يجلس معهم يجي ربع ساعه ويمشي
ويتحجج ان ماله نفس يشوف احد وبيرجع للبيت
فعطوه جوه وقالو نصبر عليه كم يوم لين يهدا
اما لو احد اسئله عن المهر فلجواب دائما
لاحد يكلمني في الزفت المهر لاني قايل
لكم من البدايه باكبر المخده والاني جامع شي
يوم السبت ثاني يوم بعد الوصيه
راكان نزل يتقهوى مع امه وابوه الضهر
ولقاهم يتكلمون عن احد محلات ابوه الي اخلاه المستاجر
وفي ذالك الوقت كان الاستثمار الاشهر عند اصحاب
المال من غير التجار العماير السكنيه فتقريبا كل من جاء
معه فلوس راح بناء عماره فيها عدد من الشقق واجرها
بنسبه لابطالنا حمود عنده مجمع شقق كبير واسفل
الشقق محلات تجاريه واحد منها مكتب الxxxx الي
يشتغل فيه هو واعياله محمد عنده عماره مكونه من ست
شقق واسفلها محلات تجاريه وصار لها سنتين معاه
ام وليد نفس الشي عندها عمارتين وحده قديمه من خمس
او ست سنوات وهي مكونه من ست شقق بدون محلات
والثانيه حديثه وتوها تحت التشطيب وهي مكونه
من ثمان شقق وتحتها محلات
راكان لفت انتباهه الكلام
: يبه اي محل الي اخلاه المستاجر
ابو وليد : المحل الكبير الي في النص
راكان جاء في باله فكره
: طيب انا بأستاجره منك بكم بتعطيني اياه في الشهر
ابو وليد : وانت وش حاجتك فيه
راكان : موب ولدك يقول باكبر المخده وماني جامع شي
وجدي قال لو ماجاب وليد مهر صيته اتملك عليها
انا خلاص اجل لازم اشوفلي شغله من الحين
موب اذا طاح الفاس في الراس جلست على بابك
اشحذ مصروفي ومصروف المره
ابو وليد ابتسم ماتوقع ان راكان عنده احساس بالمسؤليه
لهادرجه : طيب والمحل وش بتشغله فيه
ام وليد سعيده بالي تسمعه من ولدها وتراقب
كلامه مع ابوه بصمت تبي تشوف وش يفكر فيه
راكان تحمس : بافتح مكتبة قرطاسيه وادوات مدرسيه
الحاره مافيها خدمات طلاب ابد والي يبي شي
للمدرسه او الجامعه لازم يروح يدور المكاتب البعيده
ام وليد : فكره ممتازه صدق البنات كل يوم والثاني
رايحات لمكتبة جرير علشان اشيا تافهه
ابو وليد اعجبته الفكره
: خلاص اجل من اليوم المحل لك ومن غير اجار
وراس المال من عندي وزين اني قيد جددت
المحل وسنعته يعني جب ابضاعتك واعرضها سيده
