يوم حفلة ابراهيم
اهل الجنوب اوصلو الرياض واتجهو لشققهم يرتاحون
من تعب السفر علشان يروحون للحفله وهم مرتاحين
ابو مطلق مايحب الشقق وعلى طول نزل هو ومصعب عند
ابو وليد حريم ابو مطلق كل وحده مع اعيالها
النايفه جت مع اخوها مفلح وزوجته جوزاء وراحت معهم شقتهم
ابو ابراهيم وام ابراهيم واعيالهم في الاستراحه يشرفون على التجهيزات حقت الحفله ومعهم وليد وراكان وراشد
بعد المغرب بدا توافد الضيوف على الاستراحه
وكان في استقبالهم ابو ابراهيم وابو وليد وابو مصعب واعيالهم التنسيق قمة الروعه خاصه مع وجود ثلاثه من مهندسين الديكور وليد وابراهيم وراشد والضيافه من ارقى المطاعم ومخابز المعجنات والحلويات وريحة العود عند الرجال والبخور عند النساء تفوح في كل مكان
وصل حمود وابوفهد مع بعض واعيالهم معهم
سلمو على الحظور ويوم وصل حمود عند ابومطلق سلم
عليه بحراره واضحه واعياله اقتدو بسلامه اعيال ابومطلق
بمجرد ماشافو كيف حمود واعياله سلمو على ابوهم
انطلقت اوجيهم له وصارو يسلمون عليه بحفاوه
حمود سلم على الجميع وجاء جلس جنب ابو مطلق وصار يسولف معه ويبتسم في وجهه ويقرب له التمر والضيافه
ابو وليد كان جالس بين ابومصعب وابوابراهيم
ابو ابراهيم اشر لبو وليد على حمود شف حمود كيف ايداري ابوي
ابو وليد ابتسم اشوفه فاقدن الوالد الله يرحمه ويغفرله
وتهيض يوم شاف ابوك
ابومصعب : ماشاء الله عليه وجهه منور ويدخل القلب وينك
مخبيه عنا طول الوقت
ابووليد ضحك وش اسوي اخاف لاعرفتوه تسحبون علي
ابومصعب بمزح : انت مسحوب عليك من مبطي
ابووليد بضحكه : افا ياذا العلم
عند ابومطلق وحمود
قام عناد وزياد من جنب محمد وكل واحد منهم اخذ علبة مويه من طاولة الضيافه وراحو لابوهم
عناد : يبه خذ اشرب من جينا ماشربت
حمود اخذ المويه من عناد وفكها وشرب منها ياعساك تسلم تعال اجلس جنبي
زياد مد المويه لابومطلق وهومبتسم وناظر ابوه انا جبت مويه لجدي
ابومطلق اخذ المويه من زياد وجلسه في حظنه يازين الي يسقي جده
رفع اذان صلاة العشاء ومن اول كلمه في الأذان فز حمود
واقف هو واعياله في نفس الوقت وانتبه الكل لهم
وجودهم كان له نكهه مميزه من بين كل الحضور
شافو كيف التفو عليه اعياله محمد اخذ انعال ابوه من الارض وقربهاله وسالم بعد الجزم المرميه في الارض عن طريق ابوه وطلعو للمسجد مع بعض حمود في الوسط واثنين من اعياله عن يمينه واثنين عن يساره
الرجال الباقين الي على وضوء قام راح للمسجد والي ماهوعلى وضوء قام يتوضى وراح الجميع لصلاة
عند الحريم ام ابراهيم الارض ماهي واسعتها من كثر السعاده الي تحس فيها ولدها الوحيد تخرج وصار رجال تفتخر فيه
عند الكل كانت الحفله من اروع مايكون لحد ماوصلت النايفه الي حاولت انها تتاخر على قد ماتقدر حتى تطلع من هالحفله بأقل الاضرار وصلت الساعه تسعه ونصف
ودخلت لغرفه جانبيه تنزل عباتها وتعدل نفسها وبعدهااتجهت لصاله الي مجتمعين فيها الحريم وشافت الرقص
والوناسه الي هم فيها دخلت سلمت وجلست وماشافت ام وليد
ام وليد رحت للمطبخ اجدد القهوه للحريم واول ماجهزت ترامس القهوه والشاي حضرتها في الطوافير ودخلتها لصالة الضيافه لفت انتباهي وجود ضيفه جديده توني انتبه لوجودها اتجهت الها ووقفت لي لاكن الصدمه شلتني
هذي النايفه وش جايبها في حفلة اولدي حسيت نار اشتعلت في جوفي هذي حفلة اولدي واحلى ايام عمري
جايه تخربها علي حسبي الله عليتس انتي وعلي قبلتس
استدرت بصمت ورجعت للمطبخ وخليتها واقفه مكانها
من غير ماسلم عليها حاولت على قد مقدر اني اتجاهل وجودها علشان ماخرب حفلت اولدي ومر كل شي بسلام
وهذا هم الناس سرو ومابقى الاحنا واهل الجنوب وسلمى
وبناتها كنت اجمع اغراضي علشان نمشي وشفتها تدخل
الغرفه الجانبيه هين يالنايفه ان ماخليتك تندمين على انك
فكرتي تعرضين لي
ام ابراهيم ادخلت ورا النايفه وصكت الباب وزلجته
وامسكت النايفه واضربتها ضرب سنه بيوم
النايفه اضطرت انها تدخل معها في المضاربه دفاعا عن النفس لااكثر الحريم اسمعن الهواش والصياح الي ارتفع من الغرفه طقن الباب ومحد فتح والهواش زاد
سلمى اعرفت ان الي في الغرفه ام ابراهيم والنايفه
طقت الباب افتحي الباب يام ابراهيم الرجال جو ام ابراهيم اسمعت ام وليد دفت النايفه على الارض وافتحت الباب واطلعت ام وليد اعرفت ان الحريم ان امسكنها بيذبحنها جرتهها بيدها ودفتها في المطبخ هي وبناتها وبنات ام ابراهيم وقالت لاتفتحن لاحد بروح اجيب اعبيكن
الرياجيل بيدخلون راحت ام وليد تركض واخذت الكيس الي فيه اعبيهن اخذت عباتها البستها وراحت للمطبخ ودخلت الكيس مع الشباك ام ابراهيم والبنات اخذن كيس العبي والبسن اعبيهن وانقبتهن
عند النايفه اول مانفتح الباب ادخلن عليها جوزاء وحريم اخوانها يتفقدنها وينشدنها عن الي صار
كان ودهن يمسكن ام ابراهيم ويكسرن اعظامها لاكن ام وليد كانت اسرع منهن وهربتها للمطبخ
