الحارث

البـارت الرابع عشر

• رواية: الحـارث♡

______________

باجر تعيش السنين الما عشتهم

و الفرح
يترس زواياك الحزينة
و ينملي بيتك اغاني

تكبر انتَ
و تصغر بروحك حسرتك.
_____________

الحارث: شتشوفين

شمس خزرتنة وطلعت وطبكت الباب
بقوة رجت الغرفة

والحارث دفعني بوسط صدمتي وراح عالجرباية

افراح: انتة منو سمحلك تلزمني

تجاهلني وراح للميز طلع اوراق وتلفون من
هذني القديمات الي بيهن دكم وراح للجرباية

غلبني فضولي واخذت المشط وكعدت عالجرباية
من الجهة الثانية ابصبص

جان بالورقة مكتوب ارقام واسماء واحرف هوسة
كلشي مفتهمت
كتب رقم بالتلفون واتصل علي

الحارث: وعليكم السلام..... مو انتة استاذ صادق
.... لا متعرفني بس نطوني رقمك الناس الخيرة
.... محتاجك بشغلة .... الله يسلمك.... والله ليش
اجذب عليك ثكيلة..... احتاجيت دين والمبلغ جبير
كالولي مالك غير صادق... كتلك ناس خيرة ياخوية
... بس مستعجل اريدهن هالفترة .... 300 مليون
... لو مبلغ قليل ماجيتك... ماتوقع هيج موضوع
نكدر نحلة عالتلفون .... صحيح ... انتضر منك خبر

سد التلفون ورجع يسجل بالدفتر واني مصدومة

افراح: شتسوي بهيج مبلغ ويا اثول
ينطي هيج دين وهوة ميعرفك

جاوبني وهوة يكتب: نفس الاثول
الي نطة فلوسة لصاحبة ومعرف وين وداهن

عرفت الحقير قصدة على اخوية احمد

افراح: سؤال طبيعي تكدر تجاوب مثل الاوادم

- سؤال فضولي والموضوع ميخصج

كلبت عيني بملل وكمت سحبت شالي ونزلت

دخلت للمطبخ ولكيت الحجية تصب غدة وتخلي
بصينية

نزل الحارث بسرعة من عالدرج ودخل للمطبخ

الحجية: وين يمة

الحارث: طالع، ليش؟

الحجية: صبيتلك غدة كلشي ماماكل
اكلك لكمة وروح

تقدم عالصينية شال الخاشوكة اكل لكمة من التمن
وشمرهة وطلع بسرعة

الحجية: نيالي

كامت رجعت الاكل ودتغسل المواعين

افراح: عمة

- ها يمة

- ليش هيج تحبي

- الحارث

-اي

- انة ربيتة

- وأمة ميتة

- لا يمة امة وابو مطلكين