Am I in The Wrong Novel?

Casmin 8: May nagbago

Hindi na muling dinalaw ng antok ang dalawa kaya naman naghanda na lamang sila ng almusal at nagluto ng pagkain para dalhin ni Casmin sa hospital.

"Ano'ng nangyari sa inyo at ang laki-laki ng mga eyebag niyo?" Tanong ni Aling Janina makita ang dalawa na nangingitim ang paligid ng mga mata.

"Nagpupuyat na naman kayo sa pagbabasa ng online novel ano? Naku, kayong mga bata kayo, tigil-tigilan niyo iyang kakabasa niyo ng ganyan. Magkakasakit pa kayo, mapapabayaan niyo pa ang pag-aaral niyo."

"Opo Auntie." Nahihiyang sambit ni Belle, si Casmin naman napanguso.

"Di naman kami nagbasa, maaga lang kaming nagluto." Katwiran ni Casmin.

Siniko siya ni Belle na tila sinasabing di na siya mangatwiran pa na ikinanguso niyang lalo.

"Kumusta na nga pala si Papa?" Tanong ni Casmin sa ina.

Nagbuga ito ng hangin bago sumagot. "Ewan ko kung ano ang nangyari sa kanya. Sabi ng Doctor maayos na ang kalagayan niya ngunit hindi pa rin siya nagigising."

Matapos makausap si Aling Janina ay nagpaalam ng muli sina Casmin.

Nag-file ng leave of absence si Casmin at siya na namang nagbabantay sa kanyang ama na nasa hospital.

Pagkatapos ng klase, pinupuntahan siya ni Belle at nakikipagkwentuhan sa kanya.

"Casmin, nabasa mo na ba ang revised version ng you're my miracle?" Excited nitong tanong sa kanya.

"Bakit? Anong nangyari?" Tanong niya bago kumagat sa baon niyang tinapay.

"Binago ng author ang kwento. Hindi na namatay ang ina ng ikalimang prinsipe. May bagong karakter din ang dumating. Isang misteryosong karakter. Teka? Di mo pa alam?" Nagtatakang tanong ni Belle.

Hindi siya sumagot. Kumuha siya sa mansanas na nasa basket at kumagat.

"Himala? Dati-rati ikaw ang pinakaunang naa-update sa kwento ngunit ngayon di mo alam?" Di makapaniwalang tanong ni Belle.

"Ano? Binago na niya na di man lang ipinaalam sa mga readers?" Mabilis siyang naglog-in sa website at hinanap agad ang you're my miracle.

"Iyon nga e. Bigla na lamang nagbago ang isang chapter ng kwento. Nakapagtataka nga e." Sagot ni Belle.

Muntik ng mabitiwan ni Casmin ang hawak na cellphone dahil nakasulat na sa kwento ang anumang nangyayari sa panaginip niyang iyon. Kung panaginip lang ba iyon o talagang ginawa niya, hindi na siya sigurado.

"Sana babae ang misteryosong nilalang na ito at magiging partner ng ikalimang prinsipe. At sana hindi na siya mamamatay sa season one." Sabi ni Belle na halatang natutuwa sa pagbabago ng takbo ng kwento.

Napakunot ang noo ni Casmin dahil nasa chapter one pa lamang siya. Tiningnan niyang muli ang title.

"You're my miracle 3: Side story 2? Sabi mo revised version e side story naman yata to sa kwento nina Seo Yiu at Sayuri e. Pustahan tayo, heartbreaking pa rin ang ending nito promise."

"Hindi iyan. 'Yong isang kwento ang basahin mo bago ang ongoing side story na iyan. Tingnan mo kasi ang season 3 chapter 1. Hindi na namatay ang ina ng ikalimang prinsipe kaya posibleng di na siya magiging kalaban sa future di ba? Mukhang ongoing pa ang pag-i-edit ng author kaya gan'yan. Hindi pa niya nabago ang ibang chapter."

Napakunot naman ang noo ni Casmin. Iniisip kung binago nga ba ng author ang takbo ng story o kusa itong nagbago dahil sa kanya?

"Di kaya dahil sa bagong labas na kwento na The Last Saintess? May bagong labas kasi na kwento at halos lahat ng side character sa Mysterious Empire na di binigyan ng pangalan ng author, nandoon e. Pati ang idol kong si Raiden nandoon din."