عَقيديّ

تَجْريم

كانْ البُعد يزيد الحُب حُباً،اَما كانْ بُعدي لكَ اَشبهَ بالملاذَ يا بعيديّ..؟

.

.

.

فز من نومه على صوت الجهاز الي يدگ من دقايق معدوده وبسبب سهره ونومته المتأخره ما حس عليه،وبدون مايحرك جسمه سحب الجهاز من على الطبله باوع على الاسم وتعكرت ملامحه

انطاه رفض وشمره الجهاز على الجهه الثانيه ورجع مكمل نومته بس رجع دگ مره ثانيه مخليه يغمض عيونه بقوه من الصوت الي ازعجه

دفع الغطى بقوه من جسمه ساحب الجهاز،راد بكل حده"شفتني مدااجاوبك ليش تلح عثمان!!"

"مراح اعيد سؤالي وينك؟!"جاوبه عثمان بكل برود واصابيعه تضرب على ستيرن السياره بوتيره سريعه،

تنهد آسر وطارت نومة عينه گعد وتحرك نازل من الجربايه وخطواته اخذته للشباك،"ليش حتى تاخذني لـ قاعتك وتحجيلي قصص العصور القديمه الي عقلك ساكن بيها؟!"رد وتخللت الوقاحه بين كلماته ونظراته جانت تراقب حركة الناس من ورى الشباك

ابتسم عثمان بسخريه وبـ لحظه تبدلت ملامحه وقال بصوت عالي وحاد"لتلعب وياي رماد وتستفزني حتى اسد الخط، وينك الچلاب السايبه الي عايفهم وراك عبالهم اني ضامك عندي"

"رائد يدري بيه طالع من البيت لأيام وسلام گال هالشي للعقيد يا چلاب هاي؟"رد عليه بسخريه وكل الي تلقاه هو الهدوء من عثمان الي مرت ثواني وردد كلامه بهدوء"لتگول ميحتاج"وسد الخط بوجهه آسر الي مااهتم

ورجع للجربايه وهو يمسح على صدره من الالم الي صار فتره يتراودله بصوره خفيفه وويا الايام بدت تزيد الحده مالته

مسح على عيونه بقوه ،ورجع ماخذ علبة المسكانات الي تخفف من هذا الالم، شرب حباية مرت الثواني وهو مغمض عيونه لحد ما حس بالوجع راح

وويا وگفته ندگت باب الغرفه مالته،جعد حواجبه وتحرك من مكانه للباب، باوع بالعين السحريه ومشاف احد، ابتعد خطوه فاتح الباب، وتغيرت ملامحه الهاديه لثانيه منزعجه من شاف عثمان واگف مقابيله وچف ايده على حلگه ويباوعله بغضب

"شسوي بيك هسه؟!" قال بحده وهو يباوع لآسر الي گلب عيونه بملل ورجع للغرفه تارك الباب مفتوح للثاني الي دخل وهو اعصابه على آخرها

طبگ الباب بقوه ملحوظه مخلي الثاني يلتفت عليه،

"عثمان واضح عندك مشكله ومزاجك مو بمكانه واني واگف على الزله فـ اشوف لو تروح احسن، وبعد واضح انك مراقبني ليش تسأل اني وين؟!"قال من بين سنونه بملامح جامده وهو مو متحمل عصبية عثمان الي مالها مبرر بعيد عن نفسه واعصابه التالفه من ايام