عَقيديّ

تَلَهَّي

كانَ يهربْ منهُ، ويسعى إليهْ في وقتٍ واحِد

.

.

.

"هذا عصيرك"قال إيهاب وحطه گدامه،وهو الي عقله كأنه مضروب بسبب الي سمعه من ديانا شرطه تلاحقه ماتوقعها، وكل الي چان بباله انه اذا يصير شي لـ رائف راح رائد يجيبه

"اشرب وانسى هسه، ولكل حادث حديث"اخذت ديانا  الگلاص مال العصير وحطته گدام عيونه،

سحبه من ايدها ويباوع بـ ضياع كل مايحس نفسه تخلص وبدا يطلع من المستنقع الي چان بي يرجع لـ نقطة الصفر والمهرب مابي منفذ

شرب شويه ورجعه على الميز وعيون ديانا وإيهاب عليه،"رماد اذا ماتشربه احطلك فودكا كمله"قال بصوت عالي

وآسر الي مااهتم اله وعينه على الناس الموجوده،جسمه هنا بس عقله وفكره بمكان ثاني وبعيد عن كل هالأجواء
،رجع شرب من العصير،وهو يهز رجله بتوتر وعيونه على الگاع

ديانا الي چانت گاعده على الكرسي مقابيله ووجهها للباب،ونظراتها على إيهاب، باوعت على آسر الي عيونه بدت تخمل

وگع الگلاص من ايده ونكسر وكون صوت الاغاني عالي مابين صوته،باوع عليهم وعيونه خامله على الاخير ومو گادر يفتحها قال بالگوه وثگل بـ لسانه عبالك سكران"شنو حطيتولي بالعصير"واول ماكمل غمضت عيونه وقبل ماميل جسمه ويوگع سنده إيهاب عليه

اشرت ديانا لأثنين من الي يشتغلون عدها"تعالوا شيلوه بسرعه لسيارتي وطلعوه من الباب الخلفي"قالت وباوعت على إيهاب

مشت بسرعه هي وإيهاب قالت وهي كل شويه تلتفت وراها"تاخذه للبيت الي قريب على المصيف وعيونك عليه"

"ديانا خاف شافونا شلون هيج"قال إيهاب بخوف وهو طالع من المكان متوجه للسياره الي بيها آسر،والبرد يطگ بالعظم

ضربته ديانا على ظهره بقوه وقالت بصوت حاد وناصي"خايفه منك تروح تسلمه الهم على هالخوف، اتصخم واخذه للبيت گلتلك ماكو احد يدري"

هز راسه وركب السياره بمكان السايق،شغل السياره وتقربت عليه الثانيه من يم الجامه وقالت بجديه"راح التقي بـ رائف وافهمه السالفه بس مااگوله عليه لحد مااجيبه للبيت وانت اذا گعد وسألك گوله مثل ما فهمتك "

"تمام"رد ايهاب وابتعدت الثانيه،حرك السياره وطلع بسرعه من المكان،

مسحت على جسمها من البرد ودخلت المكان بسرعه،وقبل لتروح لـ غرفتها حتى تبدل وتستعد لـ ليلتها قال واحد من حراسها"سيده ديانا اكو ناس سألت عليج بالبار"