تحت جناح الشيخ //

تحت جناحه//البارت ..2..

علياء: فكيت عيوني كوه طك ضوه قوي بعيني وجسمي ماحس بي وراسي ثكيل عرفت نفسي بالمستشفى شويه ودخلت مرت عمي .

ساجده: ها ولج علياء واخيرا كعدتي بشنو حاسه كليلي..

علياء: بصوت ناصي..ماحس بشي جسمي كله خدران

ساجده: اي طبعا لان مخليلج مسكن بالمغذي حاولي ترجعين تنامين منا ليروح مفعول المسكن..

علياء: حاضر ..
رجعت نمت وبعدهه رجعت فكيت عيوني وجانت الممرضات يمي يفحصوني ..

ممرضه: ها علياء تسمعيني بشنو حاسه

علياء: ماحاسه بشي

ممرضه: يعني ماكو الم بطنج

علياء: لا ماكو

ممرضه : هاذهو لعد مدام صرتي احسن صار وقت ان ترجعين لبيتج اكيد اهلج قلقانين عليج واريدج تلتزمين بالعلاج الي وصفته الج مده شهر ماشي

علياء: ماشي

ممرضه: يله الحمدلله على سلامتهه عن اذنكم..

ساجده: مشكوره حبوبه

ممرضه: لا العفو واجبي

ساجده: يله كومي بنيتي خل نرجع للبيت مادري شلون سويت بيج هيج انه عذريني جان عبالي تدلعين علينه بس حتى تشردين من الشغل

علياء: لا عمتي ماصار شي لا تتاسفين..

طبعا عشت عمري كله وياهم واني احسهم كارهيني اول مره مرت عمي تحاجيني بنبره لطيفه وهادئه والعجيب اكثر انهه من بعد اليوم راح تصير تعاملني بلطف..كمت عدلت ملابسي وكفنه تكسي ورجعنه للبيت ...

ساجده: من شفت علياء طايحه عبالي وموجوعه وتصيح يمه ويمه حسيت بتانيب الضمير كلت الي سويته مايصير وحرام

هيه يتيمه والله وصانه باليتيم هيه بعمرهه ماسوتلي شي بس جنت اضوج منهه من وره حجي نسوان حمويني بس هسه تاكدت انهه بريئه وطيبه حتى من غلطت وياهه سامحتني ومازعلت مني

لهذا السبب قررت اوكف بصفهه واعتني بيهه مثل ما اعتني ببناتي.. اخذتهه وطلعنه من المستشفى ورجعنه للبيت تلكتنه عمتي ونسوان حمويني..

مرت عمي"سندس": هاا وين جنتج ليكون البزره هاي جانت شارده مو من عوايدج تتاخرين بالمزرعه..

ساجده: شهلحجي شنو شارده البنيه صار عدهه نزف واخذتهه للطوارئ هيه هاي السالفه

بيبي: يمه بنيتي تعالي صدك تحجي مرت عمج

علياء: اي بيبي ..

بيبي: سوده علي وشلون صرتي هسه

علياء: اي احسن انطوني علاج ومسكن

ساجده: نعم الله على الشيح عزيز ودانه للمستشفى ولا جان ماتت بالمزرعه وابتيلت بيهه

بيبي: كله منج كتلج البنيه موجوعه لا تاخذيهه ماتردين

ساجده: قابل اشم ايدي انه يا عمه عبالي تدلع علي بس انشالله ماتنعاد ..

بيبي: انشالله..يله يمه كومي صعدي لغرفتج ارتاحي واذا احتاجيتي شي صيحي لمرت عمج ماشي..

علياء : انشالله

ساجده: تعالي خلي اصعدج فوك خاف ماتكدرين..

علياء : مسكتني مرت عمي وصعدتني لغرفتي نزعتني حجابي وعبايتي ونومتي عل جربايه وغطتني

ساجده: يله نامي ارتاحي واذا تردين شي هاي صيحيلي او اتصلي علي ماشي

علياء: ماشي شكرا عمه تعبتج وياي

ساجده: لا بنيتي من اليوم اعتبريني امج اي سي تحتاجين كليلي  اوك

علياء: اوك انشالله..
طلعت مرت عمي وبقيت صافنه سبحان مقلب القلوب الصبح جانت كارهتني وهسه تكلي مثل امج ..بقيت شويه ونمت ماكعدت الا على دكه الباب..

ساجده: علياء بنيتي كعدي تعشي ودنيا المغرب مو زين عليج النوم هسه..

علياء: اي عمه كايمه

ساجده: يله كومي غسلي وجهج ورتبي نفسج ونزلي تعشي سويتلج كبده شوي ولبن حتى يصير بيج دم كالت الممرضه فقدتي هواي دم

علياء: اي ..شكرا عمه

ساجده: لا تشكريني بنيتي الصار وياج بسببي لازم اتحمل المسؤليه

علياء: لا لاتكولين هيج عمه ماسويتي شي انتي اني اصلا امس كله مانمت من الوجع وماكلت لاحد عبالي شي طبيعي

ساجده: منا ورايح اي شي تحتاجي واي شي يصير وياج كليلي بي حتى لو مايسوه

علياء: انشالله حبيبتي

ساجده: يله كومي غسلي ولج لا يعيط بينه جدج..

علياء: اي كمت..

رحت للحمام غسلت وعدلت نفسي ونزلت لكيت العائله كلهه ملتمه عالاكل مسيت عليهم وكعدت ..

جدي: ها بنيتي شلون صرتي

علياء : الحمدلله جدو احسن

جدي: بنيتي من يصير وياج هيج بعد احجي كولي لبيبيتج او لوحده من نسوان عمامج حتى نعرف نتصرف مو هناك وصار بيج شي واحنه غشيمين عنج ..

علياء: انشالله ..اسفه لان خليتكم تقلقون علي

ساجده: عمي لا تخاف اني وصيتهه اي شي يصير وياهه تجي تحجي لعمتي او تحجيلي ماتنعاد بعد..

جدي: اي .يله كملو اكلكم

سندس: بصوت ناصي ..منين نزلت عليج المحنه يابعد امج

ساجده: سكتي اني من زمان اصلا ماراضيه على تصرفاتجن وياهه البنيه يتيمه وخطيه حرام عليجن التسونه بيهه

وخلي يكون بعلمج ماسمح لاي وحده بعد تحجي وياهه بكلمه واليحاجيهه اروح كبل اشكيهه لعمي وهوه يتصرف وياهه فضبي بناتج عنهه احسلجن.

جدي: اشش ماريد احد يحجي عل اكل احترمو النعمه..

ساجده: انشالله عمي..