تحت جناح الشيخ //

تحت جناحه//البارت ..20..

علياء_
بعدما دخل عزيز يسبح رحت نشفت شعري ولفيته وخليت مكياج مناسب ولفيت شالي وطلعت

نزلت للمطبخ وصرت احضر الضيافه ويه لمياء فجاتا اخذتني على طرف وحجت بصوت ناصي...

لمياء: اكلج علياء اني صار وياي شي واخاف احجي لعزيز وتصير مشكله..

علياء: احجي حبي شصاير خوفتيني

لمياء: اكلج خيه اني صار شهرين من اروح للدوام يلاكيني ابن خالي ويراقبني من بعيد بالبدايه تالي بيوم اجه وكلي اني اريدج وراح اطلب ايدج من اخوج..

كتله ماريد اتزوج من بعد التجربه الفاشله العشتهه بعمر صغير بعد نسيت سالفه الزواج..بس بقه مصر ضل يوميه يجي يفتح الموضوع وياي واني ارفض الى ان قبل اسبوع كلي حضري نفسج حاجيت ابويه وكال انه اروح اطلبهه الك..

كتله ماريدك ورفضتك بقيت اصيح عليه انت مريض ماتفتهم اكلك ماريدك ماعدك رجوله ترفضك مره وتلزك بيهه ..

جان ينب يكلي اذا ماقبلتي عدي حساب ثاني وياج اخذج بالحلال لو غصب بغير الحلال..يعني يهددني يخطفني اذا ماقبلت.

علياء: يا هذا اكيد مريض وتالي شكتيله.

لمياء: ماكلت شي خليت ورجعت للبيت وحتى الجامعه مارحتلهه بعد صارلي اسبوع اخذ
محاضراتي من الزميلات..

علياء: تردين اروح احجي ويه الشيخ عزيز وهوه يحل الموضوع..

لمياء: لا خيه اخاف يسوي مشكله ويتاذه بسببي

علياء: لا لاتخافين اني عندي خطه انتي مالج علاقه لا تحجين شي وخليهه علينه اني واخوج ماشي..

لمياء: علياء فدوه انقذيني ماتحمل بعد الخوف..

علياء: لا تخافين حبيبتي خلي اروح احجي ويه عزيز قبل لا يجون ماشي..

رحت شفت عزيز توه طلع من الغرفه..

_ااا شيخ اكدر احجي وياك كلمتين قبل لا يجون الخطار

عزيز: اي اكيد ..

دخلت للغرفه واني اشوفهه وجهه اصفر ومتوتره ..
_قلقتيني شصاير

علياء: بالاول توعدني ماتعصب وتتهور لان الشغله بيهه عرض ممكن باي لحضه يروح..

عزيز: علياء خبلتيني احجي بسرعه ..

علياء: ااا لمياء..
اشو بعدني ماكلت لمياء وكف على حيله

عزيز: شمسويه شبيهه لمياء

علياء: مامسويه شي بس صاير وياهه شي..كعدت وبقيت اسولفله الصار وياهه واشوف عيونه صارن حمر وعروك ايده نطن ..

عزيز: ايا ابن الكل.ب اني اله يتعرض لاختي ويهددهه بشرفهه اني ابن خالي يهدد عرضي وشرفي اليوم اذبحه واشرب من دمه اليوم..

علياء: لا دخيلك مانريد فضايح صدكني اذا حجيت ويا راح تنتشر السالفه وسمعه اختك تروح واذا سويتله شي

اختك راح تطيح بيهه راح يضل يفتر وراهه حتى لو تزوجت وخلفت يبقى وراهه لحدما ياخذ اليريده منهه..

عزيز: ولج يهدد اختي بشرفهه اليوم كلهم احركهم من صغيرهم لجبيرهم حتى محد يطلع يطالب بثارهم..

علياء_
شفته واكف معصب واني لازمته من بطنه حتى لا يطلع ويسوي مصيبه اباوعلهه صار مثل التنين الهايج احس يطلع منه نار مو عصبيه خفت عليه يصير بي شي من العصبيه حضنته وكمت ابجي واتوسل بي...

_عزيز لخاطر اختك لخاطر اطفالك لا تسوي شي للرجال لخاطري اهده لا تسوي بروحك هيج لا يصير بيك شي

وين نروح من بعدك احنه امك اختك ابنك وبنتك واني مافكرن وين اروح..

عزيز: علياء عوفيني خلي اروح علياء ابتعدي لا تتاذين..

علياء: ميخالف اذيني بس لا تطلع تعال اكعد واهده صدكني اني عندي حل وخطه تفكنه من شره بس اكعد خل افهمك

عاوني الله يخليك كله هذا علمود سمعه اختك وعلمود لا تنضلم بهيج واحد
كعدته كوه عل جربايه وكعدت يمه ..

_شيخ انت حكيم وواعي وتعرف الصح من الخطا لا تخلي عصبيتك تطغى على حكمتك مو كلشي ينحل بالصياح والقتل والمهادد ..اسمعني شيخ اني عندي خطه بس اتمنى ماتمانع ..

عزيز: احجي بسرعه علياء

علياء: شيخ اني اكول تنطيهه للسايق سجاد ..

عزيز: شنوو شكاعد تحجين انتي

علياء: اعرف ان هذا الشي خطا بس صدكني ماكو غير هل حل ..اريد تحاجي سجاد وتكله خطبه شكليه واني اقنع لمياء حتى تقبل

وراح يكون عقد على ورق ويطلكهه بعد فتره يم السيد وراح نسويلهم فيديو وهمه يلبسون المحابس والشيخ يعقدلهم وانطيهه حلقتي تلبسهه وانت انطيه حلقتك لان مانلحك نشتري جدد

ولمن يجون ويطلبون ايدهه كلهم اختي عاقد عليهه سجاد واذا ماصدكو طلعلهم الفيديو وانه راح اخلي الفيديو يبين وكانهم عقدو سكته بدون معازيم وبحجابهه يعني تكدر تطلعلهم الفيديو كدام الزلم ..ها شكلت شيخ

عزيز: ماعرف علياء ماعرف حاليا انه بعقلي شي واحد اكض الكل.ب هذا واموته جوه ايدي..

علياء: يالله ..شيخ فكر باختك اذا ماسويت هاي الخطه اختك تنداس بالرجلين

عزيز: افاا واحد يتعرضلهه وراسي يلوح الهوه ادوس على راسه اليفكر يدوسهه

علياء: اعرف والله اعرف بس هسه اختك بوضع صعب اذا ماساعدتهه انت منو يساعدهه..

عزيز: خلاص ماشي احجي وياهه انتي واذا قبلت كوليلي حتى احجي ويه سجاد..

علياء: ماشي يله ننزل احاجيهه واكلك بقرارهه..
نزلنه اني وياه راح كعد بالصاله الصغيره واني رحت للمطبخ تلكتني لمياء..

لمياء: ها خيه بشري شكال اخوي شو هدوء

علياء: خيه تعاي احجي وياج اريد اخذ رايج بشي واريد ماتفكرين باي شي غير سمعتج وارادتج ماشي..

لمياء: ماشي كولي..

علياء_
سردت عليهه الخطه وفهمتهه وانطتني الاجابه ورحت للشيخ احجي ويا...