تحت جناح الشيخ //

تحت جناحه//البارت ..9..

رجعت كعدت وحضنت بيبيتي الى ان اجه عمي كال خلي تطلع تروح ويه الشيخ..سمعته هيج كال ونزلت دموعي من الخوف من الم الفراق والم الظلم والم زواجي الصار سكته
التمت علي جروحي كلهه بقيت ابجي بحركه بحضن بيبي ولازمتهه..

بيبي راح اشتاقلج بيبي لا تنسيني وتعالي زوريني دائما لا تحرميني منج انتي وجدو اهلي البقوله بهالدنيا لا تحرميني منكم بيبي..

بيبي: ببجي...يروحي انتي يريحه الغالين ماعوفج صدكيني ازورج حتى لو بسكوت ومحد يدري بيه لا تخافين بنيتي وصيري حبابه واحترمي زوجج واهله وحبيهم واعتبرهم اهلج حتى همه يعتبرونج بتهم بالمقابل بنيتي..

علياء: انشالله بيبي ..
بقيت ابجي واناشغ بحضنهه كوه ياله فكتني مرت عمي عنهه وطلعتني بره غسلت وجهي ورحت يم الشيخ واني اناشغ ودموعي تصب سكته

رحت ابوس ايد جدي بس ماقبل ابوسهه بعدهه عني اعرف بي زعلان مني وضايج بس شلون اريد احضنه اخاف ماشوفه بعد

خليت ورحت واني خايبه الامل ..اخذني سايق الشيخ وكلي كعدي بالسياره ..كعدت وشويه واجه الشيخ كعد يمي ..

الشيخ عزيز_
بعدما وصلت لبيت علياء اني والسيد دخلنه شربنه كهوه بعدهه اخذ موافقتي الشيخ وتالي طلب يسمع موافقتهه ويكون جدهه وعمهه شاهدين على زواجنه بعدما وافقت البنيه كمت سلمت على الموجودين وطلعنه بره ننتضرهه تطلع وبقيت اسولف ويه جدهه وعمهه..

الجد: شيخنه هاي بنيتي من ريحه الغالي وليدي المات مهما تسوي تبقى غاليه وعزيزه وانت تعرف ماكو اغلى من الولد غير ولد الولد

وهاي البنيه غاليه على روحي اني وبيبيتهه ديربالك عليهه وحطهه برموش عيونك واعرف ماراح تقصر بس اوصيك حتى يطمن قلبي..

الشيخ عزيز: لا تهتم ياحجي بنتكم بالحفظ والصون وتنحط على راس وبين العيون واني كلامي هذا اخذه وعد شرف مني طالما بنتكم على ذمتي وتحت جناحي باذن الله ماراح يوصللهه اذى ولا يكدر شخص ياذيهه ..

الجد: تسلم شيخنه تسلم الله يجازيك ويرزقك الصحه والعافيه ويديمك لاهلك ..

الشيخ عزيز: ويديمك ويحفضك حجينه..
بقيت احجي واسولف ويه الحجي لحدما طلعت الله واكبر هيج بنيه حرام تطلع عليهه هيج سمعه وحرام ينضحك عليهه وتروح بين الرجلين ..بنيه بهيج رقه وبراءه شلون كدرت تتحمل الي صارلهه امس بدون ماتنهار ..بقت عيني عليهه لحدما صعدهه سجاد للسياره ..التفتت على جدهه وعمهه وسلمت عليهم ورحت للسياره كعدت بصفهه وتحركنه بقيت ساكت ماعرفت شحجي وياهه وشكللهه ..

علياء: _ بقينه ساكتين ماطلعت مني غير كلمه ..صباح الخير شيخ ..

الشيخ عزيز: هلا صباح النور ..
حتى الصوت بي براءة مثل شكلهه ...

علياء: رد علي وبعدهه جان الهدوء سيد الموقف الى ان وصلنه للبيت وجان مو بيت عباره عن قصر بس بشكل مصغر مو جبير كلش تقريبا بكد بيت جدي العشت بي بس هذا ارتب وافخم..