كعدت الصبح اول ما فتحت عيني اجه وجه ذيج البنيه كبالي ليش وشمعنه ما اعرف بتسمت وكمت وانه عندي نشاط الكون كله
سبحت ونزلت كل عاده رافد كاعده ومحضر نفسه يروح للكليه
الي يشوفه يكول ماكو منه ثنين
*صباح الخير
نجوئ* صباح الخير يما جاي كهوه
* كهوه يمه خلي تعدل راسي
نجوى* اي صار وقبل لا تطلع اريدك بسالفه
*الله يستر اخاف من سوالفجن
نجوى * اها تقصد منو انه ومرتك مو هم تحجي علينه شوف يما مرتك مصختها ويانا بالبيت
صح وداد تجي وتنضف وتسوي بس هيه جنه ومرت الجبير واجبها تكعد وتشوف احوال البيت ذيج بيبيتك وروح اسئلها عني شلون جنت
حطيت ايدي على راسي وغمضت منتضر امي اتخلص قوانة الصبح كل يوم على هذا الحال
مرتك ومرتك واصعد يم مرتي امك و اخواتك لجين دلوعة اهلها وعمرهم مكايلين الها على كلاص ماي وامي هسه تريد اتشغلها بلبيت
ابو سيف * بسج يا مره بسج ما مليتي وانت كوم بويه وصلنه لشغلنه
نقذني ابوي اخذت السويج وطلعت وخليت العيطه وراي حتى كهوه ما شربت
دقايق و اجه ابوي وشفايفه صايره بيضه صدك خفت علي محجه حرف
صعد وطلعنه للمعرض
عدنه معارض مال اثاث بيت و غرف نوم وافرع اجهزه كهربائيه والكل يعرفنه باسم بيت حجي سلمان
بس وصلت للمعرض ركضت للصيدليه اشتريت جهاز سكر و وصيت واحد من العمال على ريوك
قست سكر ابوي وفعلا مرتفع بس درجه بسيطه
ابو سيف * بويه امك راح تقضي عليه دلالها لهذا الولد من صفحه وخراب البيت من صفحه ماكافي وليد عزل نفسه اتريد اتهججك انت هم
بست راسه
* يابه اطمن ما اعوفك انه لو مو مشاكل نسوان والمره الما تحمل امي مالها كعده عندي
ابو سيف * بس بويه
* لا تكمل كلشي اعرف بس امي وغصب عني
دك على كتفي وباوعلي بعين مدمعه وجر حسره
...
ايام الكليه حلوه وتعرفت على بعد بنات رهف ونوره وصرنه شله
نوره كلش منفتحه ورهف حيل ملتزمه وندى العاقله الفاهمه وانه جنت السكوتيه
اكثر من ولد حاول يتقرب مني وميشوف مني غير الصد
لحد اخر مره اجه واحد جان كلش جريئ
جنت واكفه انتضر علي شفت ولد انه اعرفه وشايفته اكثر من مره يتردد على قسمنه
