..
يوم ثاني زواج رافد رحت بغداد احاول ارجع علاقتنه ويا التجار
ظليت يومين ورجعت للبصره صادف ظهر وقت انتهاء الدوام لان انا طلعت من بغداد الفجر
رحت للكليه وكل عاده ما بينت البنيه كملت طريقي للبيت صعدت فوك سبحت بدلت نمت كلتلهم ما اريد غده نعسان وتعبان
كعدت العصر كلش نزلت للمطبخ جوعان لجين ما قبلت تنزل امي مهان عليه اصخرها
دخلت شلت كلاص ماي اشرب وجان تدخل عليه
شافتني وكفت صفنت بوجهي وبتسمت
ما ردت افهم الفهمته ولا استوعب ان معقوله هيه نفسها الي راافد .....
طاح اكلاص الماي من ايدي وهيه فزت مخروعه اجت يمي اتريد تشوف شبيه وتسئلني بيك شي
اختنكت عفت المطبخ وطلعت وخليتها وراي محتاره
امشي بالسياره ادك على الستيرن واصيح بعلو صوتي ليش الا هيه ليش ماكو غيرها عفتهن كلهن ركضت على حلمي ليش رافد ليش انقهرت اخواني مو بس اخذو راحت بالي اخذو حلمي والشي الوحيد الي جنت افكر بي وابتسم لو شنو صاير وياي
جنت اسوق بكل سرعه عندي
وجان تجي كبالي سياره تشخط اجيت اوازن سيارتي مكدرت فلتت مني ونصدمت بسياره ثانيه انجعص الباب عليه وفقدت الوعي
فزيت انا بالمستشفى واهلي يمي شلون ومنو جابني ما ادري
شفت رافد واكف وعيونه بيهن حيره اشكد اتمنيت اكوم وسئله سؤال واحد شمعنه هيه
جان عندي رضوض بكتفي ما ظليت بالمستشفى يوم واحد وبدت الناس تهل عليه وهيه كل شويه جايبه مقدمه شي ورافد يصيح عليها لو يأذيها بالحجي
* رافد ليش هيج اتعاملها
رافد* وشلون تريدني اعاملها وهيه الي فرضت نفسها عليه
بلعت ريك وحجيت بصوت ناصي
* شلون فرضت نفسها عليك فهمني
رافد* اي فرضت نفسها لعد انا اتزوج بنت الجايجي
سيف غير السالفه كلي شبيك شجاك شلون سويت حادث
* ساعة شيطان .
يعني هذا الوجه البريئ طلع حاله حال الباقيات
ضجت وكرهت كلشي وحسيت نفسي جنت مخدوع ببرائت وجها وحرمت على نفسي افكر بيها بعد صارت مرت اخوي ومن ناحيه ثانيه حالها حال الي يعرفهن رافد بس الظاهر هالمره راح زايد و لبسوها براسه ظليت قليل اجي للبيت بس كد اكل شرب نوم
لجين صايره تصرفاتها ممله وحسيت بيها تغار من هاي البنيه ظلت اتمللني مرت اخوك ومرت اخوك مكافي جان امك خواتك هسه كملتها مرت اخوك
ظليت اعيط بيها وارزلها لبست ثوب مو ثوبي انا ما احب اتطاول على مره ولا احب اضرب مره المره ضعيفه جسد
