بعد وفاة ابوي كلشي انطفه بحياتنه وحالة علي الصعبه اثرت اكثر وامي الي انهارت مره تبجي على علي ومره على ابوي نسوان عمي وجناينهم مالين البيت وشايلين كلشي عنه
هو عم واحد متزوج ثنين وعنده ولد ثنين وثلاث بنات ثنين متزواجات و وخده عمرها 14 سنه بعدها طفله اسمها زينه
ابنه الجبير اسمه اسد متزوج ثنين وفهد بعده ممتزوج
خلصت الفاتحه وشالوا الجادر
امي كالت جيبولي التليفون وتصلولي على انور
راحت في اخذت رقمه من امه واتصلت بي
طمنها علي كعد بس بعده حالتة مو زينه
عمي سالم راح هو و ابنه يشوفه رجع وهم طمنه
ناقل علي بمشفى اهلي ودافع التكاليف
امي ما قبلت بس هم ما اعترضت
ظلت كل شويه تتصل على انور يطمنها عنه ومره كاعدين اتصلت ايمان سلمت علي امي وطلبت وحده من عدنه
راحت في تحجي وياها شويه وشفت لونها تغير سدته واخذت التليفون وطلعت بره تحجي رحت وراها ما فهمت شي بس تبجي كل الي فهمته جانت تحجي ويا انور
* في بربج صاير شي علي بي شي
في* لا اساور مصاير شي بس ظال يبجي روحي مني بعدين افهمج
* شنو ظال يبجي شنو جاي اتخربطين في طمنيني على علي
ما ردت عليه بس شفتها حيل منهاره الدنيا ليل جان كلت يصير الصبح وافهم منها
صادف خميس وثواب للمرحوم عمي فرش بالشارع وحتى جماعتهم اجو وسوه قرايه اشكدها ولدهم اتولو الطبخ وطبعا ببيت ابو انور
خلص كلشي وهم الصبح يطلعون عمي طلب ننجمع وحتى امي
بس امي بالعده كعدت بالغرفه والباب مفتوح يعني تسمع
سالم * شوفو بويه كل هاي السنين واحنه محد يدري بالثاني وبسبت الشيطان دخل بينه اخوي راح وما متباري ويا الذمه واله حگ بركبتي
ام علي * سالم سد هذا الموضوع بالاخره انت ويا تتصافون وكلمن ياخذ حگه
سالم * لا يا ام علي اولاده احگ بورث ابوهم انتي جنتي حاضره وشفتي وسمعتي وتعرفين منو بينه الغلطان
ام علي * اي كلشي اعرف لهذا اكلك انت واخوك تتصافون الورث الي انحرم منه ابوهم الله الغني عنه تعب سنينه كلهن يبيع جاي وانتو تتنعمون بالخير هسه من راح تردون تنطون اولاده لا يا سالم يحرمن عليهم
سالم * اذا هذا ردج لعد كلامي ويا علي لو طلع صاح على ولده امشونه هسه نطلع للعماره
وصدك طلعو بنص الليل للعماره كفينه كلشي ورتبنه ونمنه ما سئلنه امي شنو الي جان صاير بالضبط بينهم وصدك ليش كل هالسنين اتكاطعو
