~ بيت الشيخ صالح ~
الشيخ صالح : وينه وراكم ماجبتوه وراكمم خليتوه حي
باسل : ماقدرنا نسوي له شي
الشيخ صالح : وليه ماقدرتوا مانتوا رجال وتقدرون عليه
باسل : الا رجال وعيال رجال لكن قال لنا كلام وخلنا نرجع
الشيخ صالح : وش قال لعب بعقولكم يالمصاخين وصدقتوه يالدلوخ انت وياه
حسين : قال لنا ان هالحلال كله لـ عمي رحمة الله عليه وانت مالك الا هالبيت
فهد : وانك اخذت الورث اللي ورثوه من عمي سعد
الشيخ صالح : وشهوو عساكم صدقتوه هالكذابب
باسل بتوتر وخوف من ابوه : لا وش دعوة نصدقه وحنا ما اخذنا العلم منك
الشيخ صالح بقلق : طيب طيب خلاص روحوا انا بتصرف ما احد يعتمد عليكم انتم يلا
حسين : أبشر يلا ياعيال مشينا
الشيخ صالح : صدق انكم دلوخ واغبياء ما احد يعتمد عليكم في موضوع وتحلونه
فهد : يبه ...
الشيخ صالح : اص اص اذلفوا عن وجهي يلا
_____________________________
~ الرياض ، بيت أبو عبدالعزيز ~
نجوى : ياربي تكفين متوترة مرره اف يارببب احس ما ابي
قوت : شفيك ياقلبي هي خطبة ماراح يأكلونك ترا
نجوى : الله يرزقني فضاوتك وفلسفتك ذي
قوت : بسم الله عليك خلاص بعدين من قدك بتتزوجين حُب الطفولة
نجوى : يع ما كنت احبه وجه القرد يقهرني كثيررر
قوت انصدمت وضحكت : ههههههههههههه وه ياربي قتلتيني وجه القرد مره وحده ،
نجوى استوعبت العيد : ههههههههه امبيه ما اعرف كيف طلعت مني
قوت : يلا يابنتي عادي دام عندي مو مشكلة أخوات مافيه شي تستحين منه نجوى : طيب المهم شوفي بالله شكلي حلو الميكب الفستان شكلي بـ شكل عام حلو ؟
قوت : تجننين ماشاءالله يابخته فيك والله
أم عبدالعزيز دخلت : يلا يابناتي وصلوا
بسم الله ماشاءالله عيني عليك باردة تهبلين
نجوى حضنت أمها : متوترة مرره
أم عبدالعزيز : بسم الله عليك ياروحي يانجواي يلا خلينا ننزل
______________________________
~ رجال الشيخ صالح ~
فاضل : الشيخ يبينا في مهمة جديدة ولازم ننفذها
مبارك : وش مهمته اذا نقدر عليها يبشر والله
فاضل : نقدر ولا مانقدر لازم ننفذها ولا بيموتنا
جواد : حنا وش هدفنا من شغلنا عنده الهدف أننا نسحب منه فلوس وبس وكل مهمة نضبطها مثل مايبي لها مبلغها الراهي
مبارك : اي بس مو كل شي نقدر عليه وخصوصًا هالفترة وضعنا مشكوك فيه ويمكن في اي لحظة نروح ورا الشمس
جواد : يابن الحلال ماعليك دام الشيخ مستعد ومتكفل بـ كل شي مابيجينا ضرر هو اللي بيروح فيها
فاضل : لا تنسى ان حنا لنا عقوبة بعد لو هو اعترف
جواد : ياغبي انت وياه حنا رجاله ما احد يعرفنا واكيد لو صار شي بننحاش وابن امه يجيبنا
مبارك : صح والله كيف مافكرنا فيها ذي ، المهم يافاضل دق عليه شوف وش هي المهمة
فاضل أبتسم بخبث : لـ عيونك ادق وبفتح سبيكر بعد
______________________________
~ راضي ونوف ~
نوف : ليش تسوي فيني كذا وش ذنبي انا
راضي : ماسويت لك شي وهذا انا من زمان وهذا طبعي
نوف : لا ماكنت كذا لا تلعب علي انت صرت كذا لما تزوجتني وانت ماتبيني
راضي : الحين انتي وش تبين قولي اللي عندك وخلصيني
نوف : ابيك تطلقني والحين
راضي : ياليت وابرك الساعات والله لكن مابيدي حيلة ولا اقدر انطقها وابوي عايش
نوف : أهخ لو يدري بسواياك معي ماكان تركني عندك دقيقة
راضي : يليلللل خلاص يابنت الحلال بتروحين روحي تبين الطلاق بـ سعى لـ طلاقك بس فكيني
نوف نزلت دموعها وبحرقة قلب : يالله عساك ماتتهنى ويالله عساك تذوق مر الشعُور ويالله عسى امك من حر بلاوك تشق الثوب
راضي انصدم من دعوتها : ياكلبة هالكلام لي انا
نوف : ايه لك بروح بيت اهلي وورقتي توصلني
طلعت وهي حزينة ومكسورة مو عارفه وش تسوي وكيف بتقول لـ ابوها
______________________________
~ قهوة ابو ناجي ~
ابو سرور : السلام عليكم
الكل : وعليكم السلام
ابو سرور : جايكم بعلم يالرجال
ابو ناجي : وش علمك
ابو سرور : الشيخ صالح يقولون يبي يزوج بنات اخوه المرحوم عشان يأخذ الفلوس اللي بتجيهم
ابو ناجي : وش قاعد تقول انت ؟ كلامك صحيح ؟
ابو سرور : اي صحيح ما اجيب العلم كذب
ابو أدهم : لا حول ولا قوة الا بالله هذا وش جاه انهبل
ابو ناجي : الفلوس وانا اخوك تعمي الواحد وتخليه طماع
ابو سرور : ياسبحان الله فرق كبير بينه وبين الشيخ نايف
ابو أدهم : الشيخ نايف لو بنتكلم عنه الكلام قليل في حقه كريم وطيب وخيره سابق ولا همه الفلوس ليت بعض الناس يتعلمون منه ويصيرون رياجيل مثله
ابو سرور : الشيخ نايف ما احدٍ بيصير مثله ومثل طيبه وكرمه ماكل رجال يـ ابو أدهم رجال وقول وفعل
الكل : اي والله صدقت صالح ظالم والناس ماعادها تتحمله من سواياه في اهل بيته وعيال اخوه
______________________________
~ مجلس الشيخ نايف ~
الشيخ نايف : ياهلا ومرحبا تفضلوا امروا وش بغيتوا
ام سامي : والله وياشيخ ودنا بـ شغل لوليدي ماعندنا شي نترزق الله فيه جيتك من بين هالناس تكفى لا تردني خايبة
الشيخ نايف : ماعاش من يردك خايبة ابشري على هالخشم ، تعال ياسامي وأنتي تيسري على بيتك ، جبر ياجبر
جبر : سم
الشيخ نايف : رح وصل ام سامي لبيتها وتعال
جبر : أبشر تفضلي ياخالة ام سامي : الله يفتح عليك ابواب رزقه وينور دربك ويحفظك انت وعيالك من كل مكروه ويمدك بالصحة والعافية يارب العالمين
الشيخ نايف بـ ابتسامة : امين وياكم ان شاء الله ، هاه ياسامي وش تبي تشتغل سامي : شغلني بالشغلة اللي تبي وتشوف انها مناسبة لي
الشيخ نايف : تفهم بالتجارة وتعرف لها
سامي : من بعدك اكيد
الشيخ نايف ضحك : خلاص من اليوم ورايح انت بتشتغل عندي وفي احد محلات التجارة
سامي : الله يجعلني عند حسن الظن والهقوة
الشيخ نايف : قدها وانا عمك قدها
أبتسم سامي بجبر خاطر وفرح ويدعي من قلبه ويحمد ربه
أنت تقرأ
كل دارٍ تضمك ليتها صدري وكل عينٍ تشوفك ليتها عيني
General Fictionأن ضايقوك الخاليق وأزعلوك ماعليك الا تزهمين حبيبك وكل ناسك وأبشري بسعدك ياقوت شريان . "رواية جديدة وحكايا جديدة ، أتمنى تنال رضاكم ولا أستبيح أقتباسها " "بعض من أحداث الرواية واقعية" للكاتبة : أمواج
