~ بيت مقرن بن نافل ~
نجلاء : جلل من خلاااك غييير وانت سيددد هالغراام
موسى : بووووو
نجلاء بصراخ : يممممه ، عمى خرعتني ماتعرف تتنحنح انت
موسى بضحكة : لا ما اعرف علميني كيف
نجلاء : يع سخيف مررره روح بس خلني اكمل شغلي احسن
موسى : الله واكبر من متى صرتي تشتغلين بالعادة نايمه تقول نفاس متحرولة
نجلاء : انت بتذلف ولا بـ هالكوب على راسك يعلمك حق الله
موسى : اكسرها لك والله المهم ماعلينا امي ونريمان وينهم وماجد الشلة عامة وينهم ماشاءالله كثيرين ماتنعدون
نجلاء : قل اعوذ برب الفلق تحسد نفسك وتحسدنا ، شوفهم يـ بالصالة يـ فوق
موسى : زين زين كملي اغنيتك يـ ام غرام انتي
نجلاء : اذلف بس يلا
_______________________________
~ بيت ابو عبدالمحسن ~
جنى : ان شاء الله ارتحت لما خطبتها وصارت حلالك
عبدالمحسن : أهخ ياجنتي بالحيل مرتاح يارب تكتب لنا حلو الايام
جنى : امين يارب ، دلعها وأياني وإياك تزعلها بجلدك ترا سعيت وغامرت لجل اجمعكم
عبدالمحسن : ايش ! هو انا اقدر ازعلها ! هو قلبي يطاوعني على تنزيل دموعها ! لا والله مايطاوعني وان طاوعني جعله من ضيقته يشكي
جنى ضحكت : ومن الحُب ماقتل بسم الله عليك لا تقول كذا تزعلني ترا
عبدالمحسن : من عيوني ياجنتي ابشري والله مايصير شي يزعلك
جنى : اي كذا خلك حبيب مو مهووس بجنون لدرجة مستعد تدعي على نفسك ودعيت للاسف
عبدالمحسن ضحك : من عيوني ياجنة فؤادي وتم وحاضرين
ابتسمت جنى حُباً لـ اخوها وعيونها تحولت قللوبب من كثر الحُب
_______________________________
~ بيت ابو راضي ~
راضي : السلام عليكم
ابو راضي : الله لا يسلم فيك عظم وش جابك بيتي
راضي : اسمع اسمع انا ماجيت ادور رضاك انا جيت اقول لك اني بطلق نوف ولا عاد انت ولي علي
ابو راضي : مايشرفني تكون انت ولدي بعد سواياك في نوف وزين فكها الله منك ماهي على اللي مثلك ميتة بيجيها اللي ينسيها ويعوضها يستر عليها ويحنها
ام راضي : وش هالكلام وراك تقول لـ ابوك كذا وانا امك عيب اقعد واطلب رضاه وتعوذ من الشيطان
راضي : هذا ماهو ابوي ولا انا ولده بعد سواياه فيني كفاية انه حرمني من البنت اللي انا ابيها وزوجني نوف
ابو راضي : لو بيدي قصيت رقبتك ماحرمتك منها وبس
ام راضي : تعوذوا من بليس يامنصور تراه وحيدنا مالنا غيره لا تسوي معه كذا
راضي : وتلوميني يايمه يوم اقول لك هو متغير علي كل هذا عشان اسماء مارضتتت فيه وتبيني
ام راضي : خلاص ياحبيبي خلاص هد لا تتعب نفسك وروحك
ابو راضي بعصبية : اطلعع ياكلللبب برا ولا عاد توريني وجهك وياجعل غضب ربي يحل عليك
ام راضي : لا تكفى يامنصور لا وليدي وحيدي لا
_______________________________
~ عند الشيخ صالح بالليل ~
الشيخ صالح : هاه وش بتسوون علموني
فاضل : مبارك برا ينتظرنا عند المسجد جينا بس نعطيك خبر ونروح
جواد : واذا كان في شي تبي نسويه في اهل راكان علمنا
الشيخ صالح : لا لا اهله خلوهم علي هم ضعيفين من دونه وماهم مسويين لي شي
فاضل : والله لو طلع بيدي قتله لـ اذبحه
الشيخ صالح : كفو والله هذي الرجال ولا بلاش
فاضل : كفوك الطيب وان شاء الله اننا عند الهقوة ونعطيك الاخبار اللي تسر خاطرك
الشيخ صالح : انتم قدها يلا روحوا ولا تطولون علي بالاخبار لو واحد منكم يجي يقول لي وينحاش
جواد : ابشر يلا مع السلامة
الشيخ صالح : الله يحفظكم ويستر علي وعليكم
طلعوا فاضل وجواد وقام الشيخ صالح يدور بالحوش وانحاء البيت وكان يراقبه بلال ويخطي وراه وهو متلثم وطعنه مره ومرتين وثلاث لما حس انه فقد وعييه وفارق الحياة ترك السكين وهرب
_______________________________
~ حازم وشريان ~
شريان بذهول : الحين هذا بيت مقرن اللي يقول عنه جدي ماشاءالله
حازم : اللهم لا حسد لكن مدري هو ذا بيته ولا لا
شريان : الوقت متأخر ما اظن احد صاحي
حازم : جرب دق الباب يمكن يفتح احد
شريان تقدم ودق الباب وفتح لهم ماجد : هلا والله
شريان : هذا بيت مقرن بن نافل
ماجد : الله الله من أنتم
شريان : شريان بن هزام بن نايف ال سلمان وهذا ولد عمي حازم بن علي بن نايف ال سلمان
ماجد : ونعم والله أمروني وش بغيتوا
حازم : ماعليك زود قل للوالد أحفاد الشيخ نايف يبونك وبيعرف وش حنا نبي
ماجد : طيب طيب حياكم داخل اقلطوا
شريان : لا والله ماشين بنأخذ الغرض وبنمشي
ماجد : والله ان تقلطون انتم الحين ضيفونا وتبي نخليكم برا اقلطوا ، طريق ياولد طريق تفضلوا الله يحييكم
حازم : زاد فضلك ماودنا نثقل عليكم والله
ماجد : وش تقول انت ؟ حازم هنا حس بخوف لكن ارتاح لما قال ماجد : مانخليكم برا وأنتم ضيوف مقرن
حازم : والله ونعم وسبعة انعام
ماجد : ماعليك زود
_______________________________
~ رجال الشيخ صالح قدام بيت الشيخ سعد ~
مبارك : كنت حاس اننا ماراح نقدر نسوي له شي
جواد : عادي ننتظرهم لين يروحون ونمسكه
مبارك : ما اظن من يوم رحتوا وانا انتظر واخر شي طلع وطلعوا ذولي معه
فاضل : انا اقول خلونا نرجع لـ مكاننا دام مبارك يقول انه يراقبه وطلع وطلعوا ذولي معه يعني ماراح نقدر نقرب لو حتى لـ بيته
جواد : وصالح طيب وش نسوي له وش بنقول
مبارك : ماراح نقول شي بنرجع وبكره بنشوف لنا صرفة ولا بنقول له الحقيقة
فاضل : كأنك بايع عمرك قل له الحقيقة خبل انت تبيه يذبحك
مبارك : خله يذبحني تعبت من هالشغلة ياخي هو يطلع من السالفة وحنا اللي نأكلها
جواد : معك حق خلاص امشوا وبكره يحلها الحلال لو نكدب عليه بتمشي كذبتنا ماعليكم
أنت تقرأ
كل دارٍ تضمك ليتها صدري وكل عينٍ تشوفك ليتها عيني
General Fictionأن ضايقوك الخاليق وأزعلوك ماعليك الا تزهمين حبيبك وكل ناسك وأبشري بسعدك ياقوت شريان . "رواية جديدة وحكايا جديدة ، أتمنى تنال رضاكم ولا أستبيح أقتباسها " "بعض من أحداث الرواية واقعية" للكاتبة : أمواج
