كل دارٍ تضمك ليتها صدري وكل عينٍ تشوفك ليتها عيني

بارت 20

~ عزيمة الجدة سارة وصلح العيال ~
الجدة سارة : ياهلا ومرحبا شرفتونا الله يحييكم
ام راكان : الله يحييك ويبقيك ياحبيبتي
الجدة سارة : انتم عارفين وش سبب عزيمتي لكم اليوم
ام راكان : لا والله وشهي له صدق ماكان له داعي تكلفون على انفسكم
الجدة سارة : انا الليلة شعوري غريب انا الليلة خاطري مسرور العزيمة هذي عشانكم وعشان صلح عيالي ووليدي راكان
ام راكان : عسى خاطرك ياوخيتي دايماً مسرور ، والله اللي ابرك الساعات صلحهم والله اني اضيق اذا شفتهم كذا بعيدين عن بعض ولا لهم صلة وسوالف
الجدة سارة : يلا ياعيالي قوموا اعتذروا لـ اخوكم وولد عمكم راكان يلا خلوا هالليلة تصير ليلة عيد
قام باسل ووراه حسين وفهد : انا اسف على كل شي صار بيني وبينك ياعلها اخر المشاكل والاحزان يـ اخوي
راكان : وشو له تتأسف ماكان له داعي قد شفت اخو يزعل على اخوه ويتضايق منه
حسين : ادري اني زعلتك بكلامٍ واجد واكيد انه ضايقك وزعلك انا طالبك ياولد العم انك تسامحني وتدمح خطاي
راكان : شدعوة ياحسين والله انك عزيز وغالي وتمون على هالرقبة افا عليك بس لا يدخل قلبك شك اني زعلان منك
فهد : الله يبارك بـ هاليوم اللي جابه الله وجاء ان كان بدر مني شي ولا كلمةٍ جابت لك ضيقة الصدر انا داخل على الله انك تسمح لي وتسامحني
راكان : هلا بالعضيد ياهلا ابد والله ماشلت عليك بقلبي مثقال ذرة ولا يدخلك الخوف ابد ابد انتم اخواني وتمونون على هالرقبة افا عليكم بس
الجدة سارة : كلللللوللليييشششش ابركها ساعات ساعة صلحكم ياحبايب قلبي انتم ياجعل الصلح دايم يالله
ام راكان : لولاك ياسارة ماكان شفناهم متصالحين وداحرين الشيطان يالله عسى أمثالك كثير
الجدة سارة بـ ابتسامة عريضة : اللهم امين ويالله عسى حنانك يامزنة يدوم
______________________________
~ بيت ابو نوف وزيارة ام نصار ~
ام نوف : ياهلا ومسهلا بـ ام نصار
ام نصار : ياهلا بك زود ياحبيبتي شلونك وشلون نوف عساكم بخير وطيبين
ام نوف : والله بخير الحمدالله لكن هالنوف حالتها والله ماتسر الناظرين ضايقةٍ لها مدة
ام نصار : بسم الله عليها عسى ماشر ياوخيتي وش فيها
ام نوف : من عقب اللي سواه معها ولد ام راضي يالله حسبي عليه وهي تعبانة
ام نصار : ياعلها ماتشوف شر ان شاء الله واليوم انا جايتكم مخصوص عشان موضوع وان شاء الله ماتردوني خايبة
ام نوف : اطلبي وتمني ياحبيبتي ماعاش من يردك خايبة
ام نصار : اليوم انا جاية اخطب بنيتي نوف لـ ولدي نصار
ام نوف : اييه بس ولدك يعرف انها مطلقة ويعرف وش هي مرت فيه
ام نصار : اي يعرف كل شي وشاريها ويبيها انا قلت اجيكم لحالي بدون ابو نصار والجماعة عشان تشاورون البنت وتأخذون رايها وان كانت ماهي موافقة مانفشلكم ولا نتفشل قدام الجماعة
ام نوف : على خير ان شاء الله يجي ابوها واشاوره واشاورها ونرد لكم خبر تدرين مانبت بحرف من غير شوره
ام نصار : ابد ياوخيتي اخذوا راحتكم وردوا لنا ما احنا مستعجلين على شي
ام نوف : ان شاء الله على خير
ام نصار : يالله انا استأذن بمشي
ام نوف : وراك ياوخيتي ما ابطيتي عندنا ولا عشان خذيتي مرادك بتروحين
ام نصار ضحكت : الله عليك للحين ماتغيرتي وعلى حالك والله ياحبيبتي اني مشغولة واليوم بيجيون رياجيل لازم اروح اسوي قهوتهم وعشاهم مع السلامة
ام نوف : الله يعين ياوخيتي ، الله معك
______________________________
~ جلسة ابو عبدالعزيز وابو عبدالمحسن ~
عبدالمحسن : يبه متى بنرجع للرياض عشان نجهز للزواج
ابو عبدالمحسن : والله ماندري للحين لكن مايتحدد الزواج الا بعد مانرجع
عبدالمحسن : بس انا ناوي احدده
ابو عبدالمحسن : ومتى ناوي ؟
عبدالمحسن : الود ودي بكره لكن مابيدي حيلة لكن شهر شهرين بالكثير
عبدالعزيز : اووف مايمدي وراك مستعجل على رزقك
ابو عبدالعزيز : عبدالمحسن وانا عمك لا يهمك شي واذا طولنا هنا بالديرة زوجناكم ماعليك بس
عبدالمحسن : صادق ياعمي ؟
ابو عبدالعزيز : اي صادق وماعليك من احد انت حدد وحنا نقول تم
ابو عبدالمحسن : ياعبدالإله ليش تقول له هالكلام بكره يقروشنا يبي الزواج قريب
ابو عبدالعزيز : طيب عادي وش فيها خله يستانس وينبسط حنا مايندرى متى بنقعد هنا واذا رايي انا
عبدالعزيز : بس يبه مو لازم بالرياض عشان اهلنا وقرايبنا يشاركوننا الفرحة
ابو عبدالعزيز : هو ان شاء الله اننا راجعين لكن انا اقول ان كاننا طولنا اكيد بنزوجهم لا ينتظرون كل هالمدة
ابو عبدالمحسن : خلاص اللي يشوفه العريس تم
عبدالمحسن : خلاص اجل الزواج بشهر 5
الكل : على خير ان شاء الله والله يتمم
______________________________
~ بيت ابو نوف ومحاولة اقناع نوف ~
ام نوف : نوف حبيبتي انتي لازم تشوفين حياتك ونصار ونعم فيه رجال ولد اجاويد وان شاء الله انه مايخيب لك امل
ابو نوف : الرجال ونعم فيه رجال من ظهر رجال ماهو مثل بعض الرخوم ومثل هذاك الخسيس وانشهد لو خذاك انك بتعيشين حياة سعيدة وكريمة في بيته
نوف : انا انكسرت مره ما ابي انكسر مره ثانية وبعدين هو كيف يبي يتزوجني وانا مطلقة اكيد انه مايدري
ام نوف : نوف يابنتي نصار يعرف كل شي مريتي فيه وشاريك لا تضيعينه من بين يديك ياحبيبتي
نوف : اكيد انه بيعايرني يـ المطلقة وبيقول خذيتك بعد ما هو طلقك
ابو نوف : ياوجع قلبي ياروح ابوك انتي لا تظنين ان كل الناس مثل راضي الناس ماهي مثل بعضها ونصار انا اشهد له رجال ونعم فيه وينشد الظهر فيه وطيب وحنون وهو شاريك لا تضيعين الرجال منك
نوف : انتم تشوفون انه خير لي ؟
ام نوف : ايه رجال كل الرياجيل تشهد له بطيبة وكرمة وحنيته
ابو نوف : الله الله نشوفه خير وعوض لك عن اللي مريتي فيه
نوف : عطوني مهلة افكر واستخير وارد لكم خبر
ام نوف : خذي راحتك ياحبيبة قلبي الجماعة ماهم مستعجلين
نوف : ان شاء الله