كل دارٍ تضمك ليتها صدري وكل عينٍ تشوفك ليتها عيني

بارت 23

~ بيت ابو ناجي ~
ابو ناجي : حور يابنتي
حور : لبيك
ابو ناجي : تعالي فيه موضوع ودي احاكيك به
حور : سم وشهو
ابو ناجي : جاك خطاطيب وانا وافقت عليهم عشان اشوف من تبين تعرسين به
حور بصدمة : وشهو ليه ما اخذت رايي طيب وليه على الاقل ماقلت لي
ابو ناجي : قلت ما ابي نمرمط فالموضوع وعطيتهم الموافقة لانك مانتيب معيية عنهم لو تدرين منهم
حور : حتى ولو يايبه المفروض اخذت رايي مو تعطيهم الموافقة وانا ياغافل لك الله مدري عن شي وبعدين منهو ذا اللي وافقت عليه
ابو ناجي : سرور ولد ابو سرور وأدهم ولد ابو أدهم
حور : يبه ذا رخمة ولاهوب رجال وشلون تزوجني به وانت خابرٍ انه رخمة وراعي حريم وأدهم الله يستر عليه مالي معه نصيب
ابو ناجي : وش السبب انك ماتبين تعرسين هذولي لا هم اول ناس يخطبونك وترفضينهم انا عطيتهم وعد والله عطاك مهلة لـ بكره بعد العصر لو مارديتي لي الموافقة قصيت راسك الناس كلت وجهي يحسبون بك علة وبك بلا وانتي ماعليك خلافٍ ابد المهلة بدت والله خيرك بين اثنين ياسرور يا أدهم
ام ناجي : صل على النبي وش هالكلام الله يهديك بس تراها بنتك عيب تقول لها كذا 
ابو ناجي : فهمي بنتك وعقليها الناس يحسبون بها علة وهي اللي تخليها ترفض الخطاطيب عمرها عمر العرس خلاص صارت حرمة
ام ناجي : خلاص خلاص ابشر انت هد بس ومايصير خاطرك الا طيب
ام ناجي سحبت بنتها وطلعت من المجلس : انتي وش بلاك صرتي تراددين ابوك ولا تهابينه
حور : يييمه انتي سامعة وش يقول قال انه وافق على اثنين وخيرني بينهم وتبين اسكت واقول ابشر انا موافقة
ام ناجي : ايه تسكتين وماتردين بوجهه جواب لين تهدين وتجاوبين
حور : انا ماني موافقة لا الحين ولا بعدين ووصلي له الجواب انا ماعادني بزر يقرر عني انا اللي القرار يرجع لي وانا اللي اقول موافقة او لا
ام ناجي : مهما كان ماتراددين ابوك بـ ذي الطريقة ابد ذا ابوك عيب عليك
حور : يعني انتي لو مكاني وجدي خيرك بين اثنين وافق عليهم بتوافقين طبعاً لا ترا تعبت انا ارحموني العرس ماهو بيدي اوافق ماهو بيدي افهموني اشمئز من طاريه
______________________________
~ بيت الديرة ~
جنى : توبة اسمع كلامك واجلس معاك توبة كنت بروح بشربة موية حسبي الله بس
قوت : وانا شعرفني انو اذا اللي بيصير على بالي امان ومافيه احد بيطب للبيت وبعدين انا بيتوتية ليش توافقين دامك ماتبين
جنى : كنت بقرة ما ادري وين كان عقلي يوم طاوعتك
نجوى : خلاص يابنات وجع انتوا الحين بخير الحمدالله لا تقعدون تلومون بعض في شي انتوا ماكنتوا متوقعين انه بيصير
قوت : قولي لها فهميها وبعدين لولا الله ثم فزعتي لك وهروبي لـ بيت الناس اطلب الفزعة كل هذا مو عشانك انتي صبت عظامي من كثر البكي عندهم وهم يحاولون يهدوني ومو عارفين ابتلشوا فيني كنت خايفة سوا فيك شي
جنى : لساني ذا يبي له قص جاب فيني العيد توبة اهايط واتفلسف وانا عارفة اني مو الفلسفة والهياط
نجوى : وي ليش وش قلتي هههههههههههه
جنى : قلت اللي قلته تكفين ما ابغى اتذكر احس اني بموت لو ارجع اتذكر الموقف وهياطي اللي كان السبب بموتي
نجوى : هذا درس لك انتي وهي عشان اذا قالوا لكم امشوا معنا ماتتعذرون وتقولون بيتوتين مانبي نطلع
قوت : خلاص توبة بعد هاليوم توبة نتفلسف ونقول بيتوتين وين ماتروحون حنا رايحين ياخي ياحلو الرياض بس مافيه مثلها ابداً ياحلوها بس
جنى : انتظر رجعتنا للرياض على احر من الجمر والله العظيم من اول ماجينا ماني مرتاحة
نجوى : هانت كلها ايام وراجعين ان شاء الله
______________________________
~ نصار وناصر ~
ناصر : من قدك يالعضيد بتعرس ماشاءالله عليك
نصار : شفت شلون الايام تمشي بسرعة
ناصر : ايه والله انك صادق بس ياخوفي تنحاش لـ اهلها من ثاني يوم
نصار : افا ليه
ناصر : والله من سوالفك ومقالبك بتجننها وبتجيب لها الجلطة وهي توها عروس
نصار ضحك : ههههههههههههههه فال الله ولا فالك خلها اول شهرين وبعدها برجع مثل ما انا ولا اقول ليه اتغير او هل بيتغير بي شي من يومني نتفة ماتغيرت تبي اتغير الحين
ناصر : الله الله في الحرمة لا تخرشها من اول الايام وتكرها عيشتها خلك عاقل ورزين السوالف اللي تسويها فيني هذي فيها ممنوعة تسمعني مانبي فضايح
نصار : لا ماعليك ماجاي فضايح الكل يدري اني مزوح وراعي ضحك وما ينخفى عنهم شي واذا على البنت اكيد انها تسمع عني وقد شافتني وبعدين لو ماني حلو وعاقل ورزين ماكان وافقت علي
ناصر : يويل كبدي ويلاه اقول قم قم ارقد بس واترك عن الفلسفة والكلام الزايد
نصار : افا انا فيلسوفي وكلامي زايد
ناصر : لا ابد ياحبيب اخوك بس قم ارقد تأخر الوقت
نصار : لا قل وش قصدك قل هاه
ناصر : يابن الحلال قم ما اقصد شي والله رح ارقد بس واكون شاكر لك وممنون لاني والله دايخ وابي ارقد
نصار : زين انا بخليك ترقد الحين لكن بكره لا تحسب اني بخليك برجع وبسألك وش قصدك
ناصر : ايه على خير انت بس فكني الحين خلني ارقد
______________________________
~ الصباح ببيت الشيخ نايف ~
الشيخ نايف : اسمعي يامنيرة انتي وبناتك ترا بنات الجماعة اليوم بيجون عندنا الله الله فيهم سبب لهم رعب هالخسيس واهلهم امنوهم عندنا
الجدة منيرة : حياهم الله في اي وقت البيت بيتهم والبنات ان شاء الله ماهم مقصرين معهم في شي
الشيخ نايف : اي يلا انا بروح اطلع هالخسيس واحاسبه ولا اكلم الشرطة تجي تشيله وتسجنه وتفكنا شره
الجدة منيرة : اي لا تخليه خذ حقهم ولا دق على الشرطة وتحاسبه لا تبتلي فيه
الشيخ نايف : زين زين انا بطلع الحين وانتي علمي بناتك يكرمونهم ويقعدون معهم
الجدة منيرة : ابشر ان شاء الله الحين اقول لهم
طلع الشيخ نايف ونادت الجدة منيرة بناتها : يابنات تعالوا بقول لكم شي
بدور : سمي يمه وش فيه
الجدة منيرة : البنات قوت وجنى بيجون عندنا اليوم عشان شغل اهلهم وخوفٍ من هالخسيس لا تخلونهم اقعدوا معهم وسولفوا لا تحسسونهم انهم غريبات عننا
بدور : ان شاء الله ابشري على امرك يالغالية
الجدة منيرة : يلا كملوا شغلكم وسوو القهوة وجهزوا الضيافة
أنتصار : ابشري انا اللي بسويها وبدور تخلص شغلها وتجي تساعدني
الجدة منيرة : اي يلا الله يقويكم
______________________________
~ بيت الديرة ~
ابو عبدالمحسن : ترانا بنروح ولكن قبل مانمشي بتروحون لـ بيت ابو طلال وتقعدون عند بناته لين نرجع
جنى : يبه بنروح معاكم ماعاد نبي نجلس هنا ولا عند احد
ابو عبدالمحسن : يابنتي بتتعبون بنفرفر بالاسواق والمحلات خلوكم عندهم لين نرجع
ابو عبدالعزيز : وهالمره نجوى بتقعد معكم وبتروحون كلكم لهم هناك
قوت : يابابا مانبغى تكفون خلونا نروح معكم
ابو عبدالعزيز : خلاص يابابا اتفقنا مع الجماعة انكم بتقعدون عندهم مايصير
عبدالعزيز : خلاص يابزر قال لك اتفق مع الناس ماراح يخليك تروحين اجلسي كل الاماكن رجال
قوت : وش معنى امي وخالتي معاكم وحنا لا
عبدالعزيز : مايخصك انا اقول امشي اوصلك للناس احسن يلا
قوت : عمى ان شاء الله من تكون عشان تتحكم فيني
عبدالعزيز قرب لها ومسكها : بكوني اخوك الكبير ياحلوتي
ابو عبدالعزيز : يلا وصلهم وتعال عشان نروح
عبدالعزيز : طيب
قوت : اوف ياربي اوف
عبدالعزيز : مافيه روحة معنا امشي قدامي يلا
قوت : اكرمني سكوتك يا اخي العزيز ولا تنافخ علي
عبدالعزيز : اسكتي قبل ما اعطيك كوع يعدل وجهك
قوت : كل تراب بس
______________________________
~ بيت الشيخ صالح ~
عبيد : ياولد يـ اهل البيت
باسل : اقلط يالله حيه
عبيد : تبقى
باسل : وين هالغيبات ياعبيد من زمان عنك
عبيد : والله الظروف حكمت علي والحمدالله تيسرت
باسل : الله يعين على هالظروف
عبيد : امين
حسين : وش الدنيا بك ياعبيد
عبيد : ابد والله مامن جديد عبيد اللي على خبرك الا انتم شلونكم عقب وفاة العم صالح وش الدنيا بكم
باسل : انكسرنا من بعده ياعبيد كان سبب نوز هالبيت ومن عقبه هالنور مطفي
عبيد : عسى الله يرحمه ويغمد روحه الجنة الا بسألكم انتم جايبين عاملٍ عندكم
باسل : الله الله بس انحاش ليه
عبيد : ذاك اليوم يوم وفاة العم صالح فالليل شفته طالع من البيت يركض وثوبه دم
حسين : وشهووو
عبيد : اي والله اني ما اكذب طالع يركض من البيت وشطفني واحسب انكم معاقبينه ولا شي
فهد : اجل هو هو ماغيره اللي ذبح ابوي ياعيال
باسل : انا ولدك يـ ابوي يطلع قاتلك العامل ولا ندري
عبيد : معقول ماشكيتوا فيه ولا حسيتوا على شي
باسل : ماشكيت فيه شي لاني انا اللي جايبه له وعطاني الثقة هالواطي ابن الكلب
فهد : حنا وش قاعدين ننتظر قوموا خلونا تدور عليه ونقلب الدنيا فوقه قوموا
باسل : يلا يلا والله ان يكون موته على يدي والله
عبيد : انا جاي معكم لي معارف في الشرطة نبلغ عليه
حسين : ايه تكفى ياعبيد لا تخلينا
عبيد : ماعاش من يخليكم امشوا معي
طلعوا من البيت يتراكضون عشان يرفعون بلاغ على العامل وتبدأ رحلة البحث عنه
______________________________
~ راضي وحور اخر الليل ~
راضي : وش تقولين ياحور على جثتي تأخذين واحد منهم انتي لي وانا لك انتي عن غيري حرام
حور : تكفى ياراضي تصرف سو شي تكفى انا ما ابي ذولي ما ابيهم ابيك انت تصرف حتى لو تجي انت لحالك انا راضية بس تكفى تعال
راضي : خلاص ابشري بكره ان شاء الله وانا عند ابوك طالبك منه وان شاء الله مايردني خايب
حور : لا ان شاء الله مايصير الا الخير يارب ما ابي احد غيرك ما ابي اموت ولا اتزوج واحد منهم
راضي : انا قلت على جثتي تعرسين بـ واحدٍ منهم انتي عن غيري حرام ولا تخافين ولا ينشغل لك بال
حور : اهم شي تجي بكره قبل يصير شي رسمي وساعتها لا انا لي كلمة على كلام ابوب ولا انت بتقدر تمنعه
راضي : انا الحين بروح وانتي ادخلي خليني افكر وش اسوي وان شاء الله خير والله ما اطلع من بيتكم الا انتي لي بس ادعي وقولي يارب
حور : يااااررررررربببب لا تخيب لنا امل
راضي : يلا ادخلي وسكري الباب
______________________________
~ سهرة العيال بمجلس جدهم نايف ~
غزاي : ياعيال والله ان الجوع يقرصني ماودكم تسوون لنا كبسة
فيصل : اي والله احس لي زمان ماكليت كبسة ويبي لنا كبسة مضغوط مضبوطة
نايف : انتم مايهمكم الا بطونكم ماعندكم غير الاكل
غزاي : بلاك مامريت في اللي مرينا فيه ولا كان عرفت وشلون تترك كل شي ومايهمك الا بطنك
فيصل : اي والله مرينا في ايام صعبة تتمنى الموية هي تكون قدامك لكن ماتقدر تشربها من كثر ماتمر فوقك صورايخ وطيارات متفجرات
عامر : انت بتقعد تذلهم ياقم سو لهم يا خلك ساكت احسن
نايف : مانيب قايم مالي حيل ابد ابد شوفوا غيري
بدران : وانا اخلي مسؤوليتي مالي خلق صراحة
حازم : لا تناظروني وانا بعد ماني قايم اسوي
شريان : رخوم عز الله خلاص انا اسوي لكم احلى كبسة مضغوط مضبوطة من تحت يديني
غزاي : ايه هذا الرجال اللي يسواكم يلا تكفى الجوع ذابحني
شريان : ابشروا الحين تجيكم احلى كبسة وجنبها مطحون وشطة
خالد : شهيتني ياولد رح سوها
شريان : انت وش فيك حباب بطنك اي كلام يشهيك
خالد : اتوحم
العيال : وجع ان شاء الله اغد رجال واترك عنك العلوم
خالد : اص اص والله انكم سامجين وماتتحملون مزح
فيصل : امزح مثل العالم والناس ولا ابلع لسانك
خالد عدل جلسته ومرر يده على فمه : خلاص بسكت يانفسيات ما الوم الناس اذا طفشت منكم صدق نفسيات
شريان : انا اقول ارجع انسدح واسكت لين اضبط الكبسة
خالد : انت رح شهيتنا وانت باقي مارحت اخلص ياولد
شريان شمق له : هذا اللي ناقص بعد تتأمر علي
بدران : اسكت لا يهون وترا ان هون انت اللي بتقوم تسويها
خالد : تبطون اقوم مانيب صبي عندكم انا
نايف : اجل انطم ياولد عمي العزيز وخله يروح يسوي ويخلص
حازم : واتمنى تسولف سوالف زي العالم والناس مو سوالف مالك فيها ولا تخصك
خالد : اعوذ بالله ياليتني مامزحت وبعدين انتم تقولون اسكت انتم اللي اسكتوا اول عشان انا اسكت جننتوني ترا اف
عامر : هد ياحلو ورقونا خلاص انتم كلكم سولفوا زي العالم والناس ولا اسكتوا لا تقعدون تتفلسفون علينا ويعنني مانقول كذا تراكم العن منه اسكتوا بس
خالد : ياليت امثالك كثير ياليت كان مرتاحين ومفتكين
غزاي : خلاص ياهوه كلنا ندري انك تمزح لو ما ندري ماكان شفتنا قاعدين ونسمع لك كان قمنا ورضخنا بك الارض رضخ بس ندري في هالشيء وكلنا عيال عم وماقلتها قدام احد غريب عشان يزعل عليك ولا يهاوش
فيصل : اي والله انت قد شفتنا عارضنا على كلامك ولا قلنا شي يكدر خاطرك
خالد : لا
فيصل : خلاص كل اللي يدور بينا مزح وكلنا ندري ابد خذ راحتك وطقطق ولا عليك من احد
خالد : انا داري لو اني جاهل هالشيء ماكان شفتوني مزحت هالمزحة ذي
نايف : اقول ما عزمكم مشاري اليوم
العيال : لا والله ليه
نايف : قابلني فالسوق اليوم ويقول عنده سهرة شباب وسمرة وطرب ووناسه ويقول كأني قدرت اكلمهم كلمتهم واذا لا انت تكفي وتوفي قل لهم بـ لساني انهم معزومين كلهم عندي بكره بعد صلاة العشاء ولا احد يتأخر او يتعذر ماله عندي عذر ابد يجون كلهم
غزاي : ان قدرت ماقلت لا وان ماقدرت عذري معي وان شاء الله ببعذرني
نايف : عاد هالشيء منك له
غزاي : بس والله جلساته ماتنمل ابد ودك انه كل يوم يعزم ويجمع هالشباب
فيصل : اي والله تضحكني سواليفه الله يوسع صدره بالرضى والعافية
عامر : لا تصير سامج تعال وبعدين لو مارحت بتطفش ما احد بيقعد عندك ولا انت بتقعد عند احد
غزاي ضحك : لاحول لله انا ماقلت مانيب رايح قلت كاني ماقدرت
عامر : ايه اشوا