~ مجلس الشيخ نايف ~
الشيخ نايف : هذي والله الساعة المباركة جيتك ياتركي عشاك بكره ان شاء الله قل تم
تركي : مايحتاج ياعمي والله ماله داعي الكلافة
الشيخ نايف : لا ابد مامن كلافة جيتك نعطي على البشارة وانا عمك انا قلت كلمة وما اثنيها
تركي : تم ماعاش من يردك ياعم
الشيخ نايف : اجل تم بكره عشاك وانتم ياعيال توزعوا واعزموا الجماعة كلهم
شريان اللي كان بين حازم وبدران : الحين جدي ليه يوزعنا نعزمهم يروح واحد يتكفل بالمعازيم وانتهينا
حازم : لازم كل واحد يروح له جهة يعزم العرب منها عشان لو تكفل بواحد بينسى وهالشيء بالذات ماهو في قاموس جدي ابد
شريان : وشو له الخساير ماهوب لازم يسوي لـ رجل عمتي عشاء ويعزم عليه خلق الله كان حطه عائلي وانتهت السالفة
بدران : اي عشان ينهبل مره وحده مايحب يصير في بيته شي ويطلع مخصص وبس للعائلة
الشيخ نايف : يلا ياعيال فيصل وحازم وشريان ونايف وبدران قوموا اتفقوا لكم على جهات تعزمون القاريب اللي بها
شريان : ابلش ليتك ياجدي ماقلت شريان
حازم : اقول قم لا يعبط خشمك قدام ذولي كلهم
شريان : يليل والله مابي حيل ادور على العرب واعزم
فيصل : قم قم قبل يعلق حبل مشنقتك تدري به مايحب هالسوالف ذي واللي يتحجج
شريان : طيب طيب خلاص بس انا بعزم اللي قريب من بيت جدي الباقي عليكم
نايف : هذا انت من يومك ماتعزم الا القريبين والباعد ماياكلها غيرنا
شريان : ايه ليه اروح بعيد مالي الا القراب بس وانتم بكيفكم عاد
______________________________
~أتصال مركز شرطة الديرة ~
الضابط : السلام عليكم ورحمة الله
فهد : وعليكم السلام
الضابط : معي فهد بن صالح
فهد : ايه
الضابط : انت قبل فترة رفعت بلاغ عن مقتل الشيخ صالح صحيح ؟
فهد : الله الله نعم
الضابط : حاب ابشرك واقول لك انتا القينا القبض عليها وهو الحين بالتوقيف عندنا وتعال تأكد بأي وقت
فهد بصدمة : أسالك بالله صدق !!؟؟ القيتوا القبض عليه
الضابط : نعم وهذا هو عندنا تعال تأكد بـ نفسك بعد
فهد : طيب طيب مسافة الطريق وجايكم
راكان : وش فيه
فهد : بلال مسكوه الكلب ومحجوز عندهم بالتوقيف
راكان : احلف
فهد : ورب البيت مسكوه وعندهم الحين
الجدة سارة : الحمدالله يارب الحمدالله دق على اخوانك بشرهم دق
فهد : ايه يلا بدق عليهم الحين ، اخذ جواله ودق على باسل : هلا وش فيك ؟
فهد : تعالوا الديرة الحين تعالوا
باسل : ليه وش صاير
فهد : بلال القوا القبض عليه والحين هو عندهم تعالوا بسرعة وانا وراكان بنسبقكم للمركز نشوف وش صار
باسل بصدمة وعدم تصديق : ياولد وش قاعد تقول لا تسوي فينا من هالمقالب
فهد : ورب البيت اني ما اكذب ولا هو مقلب توهم دقوا علي وقالوا مسكناه والحين انا وراكان بنروح نتأكد
باسل : طيب طيب احنا الحين جايين يلا مع السلامة
فهد : يلا ياراكان امش معي للمركز
راكان : يلا مشينا
______________________________
~ بيت تركي ~
تركي : مابغيت اشوف هالوجه الحُلو والله
أنتصار : ما احد قال لك اترك شغلك هنا ورح اشتغل برا
تركي ضحك : حدتني الحاجة ولا من اللي به عقل يترك ويروح هاه علميني ؟
أنتصار : انت مابك عقل يعني ؟
تركي : تبين الصدق ولا ولد عمه
أنتصار : ومن اللي يبي الكذب قل لي ما أحدٍ يبيه
تركي : انا مابي عقل وتركتك هنا بالديرة ورحت لكن لقمة العيش صعبة
أنتصار : بترجع ولا خلاص
تركي : والله ماقالوا شي لكن ننتظر الفرج وش ورانا
أنتصار : الله يعينكم والله شغلتكم عويصة
تركي : صدقتي لكن كل شي لجل عيونك يهون
أنتصار : رجعنا على هالسوالف ذي ياتركي رجعنا
تركي : من قال اللي اني تركتها بعدين انتي زوجتي ويحق علي اسوي فيك اللي ابي واتغزل لين يصفى راسي
أنتصار : حركاتك ماتبطلها ابد
تركي : ماني منبطلها دام انتي زوجتي
______________________________
~ الساعة 2 وأنتظار شريان للرد ~
فيصل : لا تتعب عمرك واضح البنت مالها خاطر
شريان : تكفى لا تقولها اكيد انها بترد لي وان ماردت الله يستر عليها وعلي
فيصل : ياولد شف الساعة جت 2 وماجاك منها رد خلاص البنت مالها خاطر
شريان : فال الله ولا فالك ان شاء الله بترد بس اصبر
فيصل : والله انك عنيد من يوم يومك الله يهديك بس
شريان : ياولد شف شف فكت الباب بتطلع اكيد انها كتبت ورقة وبتحطها او تعطيني اياها خلني اروح
فيصل : اصبر شوي لا تفضحنا يمكن تلقى احد ولا تنقفطون ووقتها والله مايرحمكم لا ابوي ولا جدي واهلها
شريان : مافيه احد شف الشارع فاضي وش فيك انت وما به احد صاحي في هالديرة كلهم رقود
فيصل : اسمع انا براقبك وان سمعت حس احد ولا شفت احد بصفر لك وتعال ركض
شريان : ايه كفو يلا راقب لي الوضع
راح شريان لها يشوف الرد ويتمنى انه ماينكسر
قوت طلعت له اول ماوصل : خذ هذي الورقة كتبت لك فيها كلام واذا شفت مني شي ترا مو بيدي
شريان : وش السالفة ليه الالغاز ذي ؟
قوت : ابدا مو لغز ولا شي بس كتبت لك كلام
شريان : طيب ردك ايش هل الورقة فيها رد لو أفتحها
قوت : لا مافيها رد بس فيها كلام لك وردي عطني فرصة ثانية تسارعت بالوقت واحس ما اعرف لسى ما استوعبت
شريان : خلاص طيب بعطيك فرصة لـ بكره هذا الوقت بس انتي انتظريني شوي بروح البيت بكتب لك شي واجيبه
قوت : تمام انتظرك
راح شريان ركض للبيت عشان يكتب لها
فيصل : وش فيك ليش جاي تركض كذا
شريان يلقط انفاسه : جيت بكتب لها كلام واعطيها وبرجع
فيصل : للحين انت ناوي تفضحنا
شريان : ماعليك يابن الحلال خلني اكتب لها وانت بتراقب لي الوضع والله ما احد داري عننا
فيصل : طيب طيب يلا اعجل
شريان اخذ دفتر وقلم وكتب لها وخلص راح يركض لها : خذي هذي الورقة اقريها مليون مره قبل تردين لي وانتظر ردك بكره هالوقت
قوت : طيب
صفر له فيصل بمعنى فيه احد جاء وراح يركض : مع السلامة
______________________________
~ يوم العزيمة ~
الشيخ نايف : يالله حيهم يالله حيهم
الكل : الله يبقيك
الشيخ نايف : تركي وانا عمك هذا والله ماهوب حقك وحقك اكبر لكن اعذرنا على قل الكلافة
تركي : وش هالكلام ياعمي والله ان ذا العزيمة تسوى عندي شيٍ كثير الله يكثر خيرك ويغنيك
الشيخ نايف : الا ياعيال يامعاريس متى نويتوا عرسكم
نصار : الثلاثاء ان شاء الله عرسي وانت اول الحضور
الشيخ نايف : مبروك مبروك الله يوفقك ويبني بيتك ، ان شاء الله ان شاء الله ، وانت ياغزاي متى نويت عرسك وانا جدك
غزاي : والله ياجدي مدري للحين ماحددته
الشيخ نايف : اجل وش رايك نحط عرسك وعرس نصار في يومٍ واحد
نصار : هذي والله ابرك الساعات واسعدها
غزاي : تم ما نقول بعد كلامك لا
الشيخ نايف : مبروك الله يوفقكم ويبني بيوتكم خلاص ان شاء الله عرسكم يوم الثلاثاء ان شاء الله
تعالت الاصوات بالتبريكات والتهاني لهم
فيصل بصوت عالي : يلا ياتركي اقلط على عشاك يلا يالربع حياكم الله قوموا تعشوا
الشيخ نايف : يلا وانا عمك قم يلا يالربع قوموا قوموا
فيصل : حياكم الله هذي والله الساعة المبروكة
الشيخ نايف : اقلطوا وتعشوا زين عشان نسمر ونسولف
الكل : ابشر وانت تعال بعد تعش لا توقف هنا
فيصل : يلا ياجدي اقلط اقلط
الشيخ نايف : نفسي ماهي فيه
تركي فز له : والله ياعمي لو ماتقلط تعشى ان هالعشاء يحرم علي ومايطب فمي
الشيخ نايف : لا لا خلاص بقلط اقعد
أنت تقرأ
كل دارٍ تضمك ليتها صدري وكل عينٍ تشوفك ليتها عيني
General Fictionأن ضايقوك الخاليق وأزعلوك ماعليك الا تزهمين حبيبك وكل ناسك وأبشري بسعدك ياقوت شريان . "رواية جديدة وحكايا جديدة ، أتمنى تنال رضاكم ولا أستبيح أقتباسها " "بعض من أحداث الرواية واقعية" للكاتبة : أمواج
