~ اليوم المُنتظر يوم عرس غزاي ونصار ~
الشيخ نايف : يالله حيهم يالله حيهم شرفتونا بجيتكم
ابو عبدالعزيز : الله يبقيك ويسلمك علينا حق ولازم نلبيه
الشيخ نايف : ياجعلها ترحب ملايين اقلطوا اقلطوا
الكل حضر العرس والكل مبسوط ووصلت الفرقة واخذ فيصل الراية وصفوا جنبه يعرضون العرضة النجدية
تنحنح شريان بأنتباه وهو يأخذ السيف ويتوسد الساحة وماكان نداه الا دعوة للعرضة النجدية بوسط الساحة
حازم : لعن الله رجالٍ يخليك لحالك ، سحب السيف وراح يعرض معاه والكل بدا يدخل بالعرضة تدريجيًا وصاحوا بالصوت العالي يوم شافوا غزاي يعرض بينهم : حييييك ياعرررييسسسس العب جعل ما احد يلعب غيرك
وبعد دقايق اعتلى صوت الفرقة :
لا بكت نجد العذية تهل دموعنا
واعتلى صوت الحُضور : بالهناوي قاصرينٍ شواربب قومها
شريان بـ ابتسامة : ياكثررر الفخر بس الحمدالله الذي جعلني سعودي من عيال سلمان
حازم : راسيييي من كثر الفخر بيطير للغلاف الجوي
وبعد العرضة النجدية واللعب قام الشيخ نايف : حياكم الله على عشاكم تفضلوا
الكل : زاد فضلك وعساه من يسر ان شاء الله
______________________________
~ بيت ابو راضي ~
راضي : يبه عرسي بيكون عائلي حنا واهل حور بس
ابو راضي : وليه ؟
راضي : بس ما ابي وشف قليلين الحياء ما عزموك ولا قدرونا
ابو راضي : تبي تحضر عرس البنت اللي كانت مرتك انهبلت انت وش جاك
راضي : مهوب لازم انا انعزم المهم انت تنعزم وتروح
ابو راضي : عازميني بس اني تعيبان ومارحت ولا هم ماشاءالله أجاويد يعزمون
راضي : المهم انه عرسي بيكون عائلي ولا اشوف ابن امه لا شيخ ولا غيره تسمع يبه
ابو راضي : زين زين لا تقعد تصايح علي عشان عرس
ام راضي : خلاص ياحبيبي اللي تبي سوه
راضي : بكره بروح اقول لهم ونخلص من السالفة
ام راضي : زين اللي تشوفه بس انت اركد الله يهديك
______________________________
~ مابعد العرس عند الجازي وغزاي ~
غزاي : السلام عليكم
الجازي بأرتباك : وعليكم السلام ورحمة
غزاي قرب لها وباس راسها وجلس : شلونك
الجازي : بخير الحمدالله
غزاي : ياعسى دوم ، ابي اقول لك كلام تسمحين لي ؟
الجازي : اكيد تفضل
غزاي : انتي اكيد تعرفين بـ اصابتي صح ولا لا
الجازي : ايه اعرف
غزاي : وانا عشان كذا ابيك تتطمنين وترتاحين مابشغلك ولا بطلب منك الحاجة الا وقت الضرورة القسوى مو تهاون فيك ولا تجاهل مني لك بالعكس ابي لك الراحة
الجازي بصدمة : ليه تقول كذا ؟ ليه ماتبي انفذ أوامر العرس وأوامرك
غزاي : لا لا ماقصد كذا ابد بس ابي راحتك اخاف اضايقك
الجازي : اذا هذا كلامك اجل عرسنا مابيصير عرس صدقي
غزاي : كيف يعني !؟
الجازي : يعني بنكون مثل الاخوان اذا هذا كلامك معي بليلة عرسنا
غزاي بصدمة : لا يابنت الحلال والله ما اقصد شي بالعكس
الجازي : اجل خلاص لا تقول كلام وتحس احاسيس بـ انك بتضايقني لو صدق بزعل ولا بتضايق ماكان وافقت عليك ولا قبلت انك تكون لي زوج وسند بعد الله واهلي !
غزاي أبتسم : ابشري خلصنا من موضوع الاصابة الحين نجي لـ موضوع عرسنا وحياتنا في مابعد ابيك تعرفين وتفهمين شغلة انه مهما كان ومهما صار بيننا انا زوجك وانتي مرتي لا ارضى عليك ولا ترضين علي اللي واسرارنا ماتبي الا صدري وصدرك ما احد يعرفها غيري انا وانتي وان شاء الله اني اكون لك الزوج اللي تتمنينه
الجازي : ابشر ان شاء الله ويارب اني اكون لك الزوجة الصالحة اللي تتمناها
______________________________
~ بعد العرس عند نصار ونوف ~
نصار : السلام عليكم
نوف بخوف : وعليكم السلام
نصار : شلونك
نوف : الحمدالله
نصار : ماتدرين وش كنت انا منتظر هالليلة منتظرها حيل بس عشان ارد على كلامك اللي قلتيه ايام الملكة لي
نوف طاح قلبها : ايه
نصار : حاب بس اقول لك اني مانيب مثل ماكنتي تتخيلين وانا عارف انك مريتي بتجربة فاشلة لكن هذا مايعني انك بتمرين معي انا بتجربة فاشلة يمكن انا اكون لك العوض يمكن اكون السند لك ! انتي خيبتي ظنوني حسبتيني مثله وانا لا والله اني ماني مثله ولا اتشرف اصلاً اني اكون مثله لو بربع فعايله
نوف : انا بس حبيت افهمك اني ما ابي اعيش الوجع مرتين ولا انا فاهمة وعارفة انك مو مثله ابد
نصار : وعشان كذا انا ما ابيك تظنين فيني ظن لو بخيالك اني بسوي معك نفس اللي صار لك بصفحة انطوت والشيء الاخير ان شاء الله ما اخيب لك ظن ولا تنزل لك دمعة ان شاء الله اكون لك العوض الجميل الذي طال انتظاره
نوف : وان شاء الله اكون انا عند حسن ظنك وما اخيب لك ظنون يارب العالمين
نصار : امين يارب
______________________________
~ مرت الايام وتزوج راضي حور ~
راضي : اخيراً الحلم صار واقع ماني مصدق عيوني والله
حور : اي والله اخيراً صرنا لـ بعض يالله عسانا مانفترق
راضي : كنتي حلم واصبحتي حقيقة يالله عسى هالحقيقة تدوم دهر وسنين
حور : امين امين
راضي : طالعة قمر اليوم
حور بحرج : هذا من ذوقك
راضي : اروح للمستحين فدوة انا
حور : ياحبيبي انت
راضي : ياحلوها من كلمة ياجعل حبيبك فداك
حور : الا بسالك
راضي : عيوني
حور : ليش خليت عرسنا عائلي بس
راضي : انا ماودي بكثرة الناس وودي عرسنا يخلص بدري عشان نلتقي مع بعض وحصل مبتغاي
حور : كان بخاطري اعزم على عرسي
راضي : بيجي لنا عزيمة قريبة واعزمي فيها اللي تبين
حور : بس خلاص دام انت الحين معي هذا الشيء يكفيني
راضي : ياروحي والله الله لا يحرمني منك ومن وجهك
______________________________
~ بيت العم هزام ~
شريان : يبه ودي افاتحك في موضوع
ابو محمد : وشهو قله
شريان : انا نويت اعرس
ابو محمد : ماشاءالله مبروك من تبي تأخذ
شريان : بنت عمي ابو عبدالعزيز
ابو محمد : ماشاءالله زين ما اخترت ياولدي
شريان : وودي بعد الملكة والعرس في يوم واحد
ابو محمد ضحك : وراك مستعجل على العرس
شريان : والله لا اني مستعجل ولا شي بس أحسن من الانتظار خلها بيوم واحد
ابو محمد : خلاص ابشر متى مافضيت انا رحنا وخطبناها لك
شريان : الله يخليك لنا ويطول بعمرك ان شاء الله
همس له فيصل : من قدك انا اكبر منك ما اعرست انت يـ ابو شبر ونص تبي تعرس
شريان : ما احد قال لك اقعد بدون عرس كان اعرست قبلي ولقيت لك مرة
فيصل : المرة موجودة لكن مدري ما احس اني مستعد
شريان : احلف ! منهي بنته ذي طلعت تحب يامروح
فيصل : ليه الحب حلالٍ عليك وحرامٍ علي بعدين انا احبها من طرف واحد ولا بينا شي
شريان : ومنهي ذي طيب
فيصل : ماينفع اقول لك الحين خلنا بعرسك وحوستك بعدها تعال لي اقول لك منهي
شريان : ياشينك انا شلون بصبر الحين
فيصل : لا اصبر ماعليك ماراح تموت
______________________________
~ قوت وشريان بالليل ~
شريان : شوفي انا بجي اخطبك هالاسبوع ان شاء الله
قوت بصدمة : ايش !؟ منجدك ليش ماقلت لي قبل
شريان : ايه ليه وش فيه هذا انا قلت لك الحين
قوت : ويع صدق حركاتك تبط الكبد بعدين انا ماجهزت نفسي ولا سويت شي !
شريان : طيب عادي وش فيها روحي السوق وجهزي نفسك على قولتك
قوت : لا ما ابغى ياخي سوق الديرة كل شي فيه قديم ابي شي جديد
شريان : عادي لو قديم انتي مشكلتك ماتعرفين للتراث النجدي القديم
قوت : اكيد ماراح اعرف انا طول عمري بالرياض ولا نعرف للتراث القديم يمكن بس اهلي يعرفونه
شريان : طيب تعلمي منهم اسألي عن التراث
قوت بضحكة : انا من بنات جيل الماركات والاناقة مو مثلك
شريان : شقصدك يعني انا بدوي ؟
قوت : للاسف انك بدوي قلبي
شريان : هذا اللي يشفع لك عندي انك بعد كل طامة تدورين لك اقرب مخرج يفكك مني
قوت : مشكلتك خفيف وينجاب راسك ياحبيبي انت
شريان : خليني اعرس عليك بس والله ان لـ اطلعها من عيونك والله
قوت : شدعوة طلعت تزعل يازعول
شريان : ازعل من كل البشر ولا ازعل منك
______________________________
~ مريت الايام وجاء اليوم المُنتظر الذي يجمع إبطالنا ~
الشيخ نايف : ماشاءالله ماشاءالله وش هالزين ياشريان
شريان : تسلم يابعد راسي هاه وشلون شايفني
الشيخ نايف : ماشاءالله زين زين لكن انصحك تعرس بالثانية بعد
شريان : عرس وعرسك بيوم واحد
الجدة منيرة اللي كانت وراه : يالمروح تبي جدك يعرس علي
شريان : اووه جدتي طلعتي هنا
الجدة منيرة : اي هنا وش انت شايف مني يوم انك تبي جدك يعرس علي هاه
شريان : ماشفت الا الزين بس يعني يجدد شبابه
الجدة منيرة : شريانوه وقص يقص لسانك
شريان : لبيه عروق قلبي ياجدة سمي
الجدة منيرة : عن الربربة الزايدة ترا بعلم مرتك عليك
شريان : لا تكفين ياجدة لا تقولين لها
الجدة منيرة : اجل اترك عنك هالسوالف ولا تعبي براس جدك
الشيخ نايف : خلاص يلا مشينا نطلع وانتي استقبلي الحريم يلا
الجدة منيرة : زين توكلوا على الله
______________________________
~ خيمة العرس ~
الكل اقبل على شريان يبارك له ويهنيه ، مبروك ، الله يوفقك ويبني بيتك ، الله يسعدكم ، بالرفاة والبنين ان شاء الله ، وبعد ما انتهى من المُهنين وصلت الفرقة قام وهو يفك بشته يأخذ الراية ويصف ويصفون الحُضور حوله
واعتلى صوت الفرقة بالعرضة النجدية : تحت بيرق سيدي سمعاً وطاعة
تزلزلت الخيمة بصوت الحُضور المرددين : ويا دارٍ لنا حقك علينا
وبعد ما انتهوا من اللعب قام ابو محمد وبصوت عالي : حياكم الله تفضلوا على عشاء عرس ولدكم حياكم
فيصل بصوت عالي : ياهلا والله ومرحبا شرفتونا بحُضوركم الليلة على عرس اخوي وعضيدي شريان حياكم الله على عشاكم وان ماشالتكم الارض تشيلكم عيوننا
تجمعوا العيال عند شريان : ماشاءالله مبروك بس هاه نصيحة مننا حنا يالمعرسين لا طلبت منك شي حط رجلك وانحش
شريان ضحك : ليه ههههههههههههه
غزاي : مالقينا الا التعب ومصاريف زايدة وتزعل عالفاضي
عبدالمجيد : انشهد بالله
شريان : انت انت وش قصدك اختي متعبتك ؟
غزاي : ايه بالله مانيب كاذبٍ عليك
شريان : احسن جعلها تفقع كبدك
بدران : اوفف بحق والله
محمد : الله يعينك كلها شهر شهرين وتصف جنبنا هذي البداية وبتكون نايم فالعسل ياحلو وبعدها والله ان تصيح الطويلة وتشق جيبيك
شريان : اهب فال الله ولا فالك لا ان شاء الله مابيصير ذا
العيال : تراهن على الشيء !
شريان : نعم اراهن عليه
محمد : خلاص ياعيال خلوه خلوه نشوفه بعد فترة وش بيقول
______________________________
~ مابعد العرس عند أبطالنا ~
شريان بـ ابتسامة شاقة الوجه : مبروك علي انتي ومبروك عليك انا
قوت : الله يبارك فيك
شريان : ارفعي راسك خليني اتأملك لو شوي بس
قوت رفعت راسها وناظرت شافت نظرات الحُب بعيونه
شريان : وش هالحلاوة ذي انتي متأكدة انك لي انا !؟
قوت : شدعوة عليك اي انا لك
شريان حضنها بقوة : ياحظي وياكبر بختي
قوت صرخت : عورتني ترا بعد شوي اختنقت
شريان : ابيك ياخي شسوي
قوت : ترا ماراح اطير والله فكني شوي
شريان : هاه وش عندك
قوت : ابي اكلمك شوي
شريان : عيوني قولي
قوت : توعدني بـ انك تصون حبي لك وما تزعلني في شي او تخيب لي امل ؟
شريان : انتي وش تقولين هذي يبي لها كلام ؟ حنا هل الكرم والمجد والطيب وحنا للعدو شر سيفين وفي الحُب ياقوت عشاقة ووفين مانخون عذراً هقت فينا هقاوي وأن ضايقوك الخاليق وأزعلوكمالك الا تزهمين حبيبك وكل ناسك وأبشري بسعدك ياقوت شريان
قوت : مدري شقول احرجتني صراحة
شريان : لا تقولين شي عيونك تتكلم وهذا الشيء يكفيني
قوت : تدري عاد كان ودي اسوي زواجنا بالرياض واسوي كل شي بخاطري ؟
شريان : هذا احنا تزوجنا وهل تعتقدين اني بمنعك من اللي بخاطرك !
قوت : لا طبعًا بس كنت اتمنى زواجي يكون بالرياض
شريان بـ ابتسامة عريضة : ياليت كل دارٍ تضمك ليتها تكون صدري وكل عين تشوفك ليتها عيني !
تم بحمد الله وفضلة انتهاء روايتنا نلتقي قريبًا برواية أخرى وأجمل بأذن الله انتظرونا 🤍🤍🤍.
الكاتبة : غزل
أنت تقرأ
كل دارٍ تضمك ليتها صدري وكل عينٍ تشوفك ليتها عيني
General Fictionأن ضايقوك الخاليق وأزعلوك ماعليك الا تزهمين حبيبك وكل ناسك وأبشري بسعدك ياقوت شريان . "رواية جديدة وحكايا جديدة ، أتمنى تنال رضاكم ولا أستبيح أقتباسها " "بعض من أحداث الرواية واقعية" للكاتبة : أمواج
