كل دارٍ تضمك ليتها صدري وكل عينٍ تشوفك ليتها عيني

بارت 30

~ يوم ملكة غزاي والجازي ~
ابو محمد : يالله حيهم تفضلوا
الشيخ نايف : الله يحييك ويبقيك
ابو محمد : وين امي وخواتي ورا ماجوا معك
الشيخ نايف : جايين وراي جاء تركي رجل اختك واستقبلوه جايين وراي هم وياه
ابو محمد : ماشاءالله الله يحييهم
ابو نايف : شلونك يـ اخوي
ابو محمد : بخير دامك بخير وين غزاي والعيال
ابو نايف : رايحين يجيبون المملك وبيجون ان شاء الله
ابو محمد : زين زين
دخل تركي ومن بعده المملك والعيال : السلام عليكم
ابو محمد : وعليكم السلام حياكم الله تفضلوا بصدر المجلس
تركي : شلونكم ياجماعة الخير بشروني عنكم
الشيخ نايف : والله بخير الحمدالله انت شلونك بشرني
تركي : والله بخير في ستين نعمة ياربي لك الحمد عندي لك علومٍ واجد اعلمك بها بعدين سمعت ان غزاي بيتملك قلت لازم اجي واحضر ملكته
غزاي : هذي والله الساعة المباركة جيتك وحضورك
المأذون : تعال جنبي ياغزاي وابو البنت تعال هنا
ابو محمد : ابشر
المأذون : قول معي زوجتك ابنتي على كتاب الله وسنة رسوله وعلى المهر المتفق عليه الشروط المتفق عليها
ابو محمد : زوجتك ابنتي على كتاب الله وسنة رسوله وعلى المهر المتفق عليه الشروط المتفق عليها
المأذون : قول ياغزاي قبلت الزواج منها على سنة الله ورسوله وعلى المهر المتفق عليه والشروط المتفق عليها فـ امساك بمعروف او تسريحٍ بأحسان
غزاي بتوتر وأرتباك :  قبلت الزواج منها على سنة الله ورسوله وعلى المهر المتفق عليه والشروط المتفق عليها فـ امساك بمعروف او تسريحٍ بأحسان
المأذون : بارك الله لكما وبارك عليكما وجمع بينكم في الخير والبركة والسرور ، مبروك
غزاي : الله يبارك فيك
تعالت الاصوات والتهاني لـ غزاي : الله يبارك فيكم جميع وعقبال اللي ما اعرس ان شاء الله
الشيخ نايف : ليه ماقلت عقبالكم كلكم
غزاي : أنتم معرسين عطوني انا والعزوبية ذولي فرصة
الشيخ نايف ضحك : مبروك مبروك وعقبالهم ان شاء الله
______________________________
~ بيت الديرة ~
عبدالعزيز : حنا خلاص لازم نرجع للرياض ونرجع لحياتنا الطبيعية احس خلاص روحي بتطلع
عبدالمحسن : اي والله صدقت وفوقها زواجي متوقف لا انا اللي جهزت ولا انا اللي سويت اللي ابي
عبدالعزيز : انت بس همك زواجك ؟ ماهمك حياتك قبل
عبدالمحسن : اي همي زواجي وش الشيء الاهم منه
عبدالعزيز : فيه اشياء في حياتك اهم منه ترا وبعدين انت تقول بـ شهر 5 وحنا باقي تونا بـ شهر 1 يمديك لو رجعنا الرياض تشتري اللي تبي لـ سنة قدام
عبدالمحسن : حنا اذا رجعوا ابوي وعمي لازم نفاتحهم بالموضوع ونرجع
عبدالعزيز : خلها علي بس انت عزز لي مو تسكت ويطيح كل شي براسي انا
عبدالمحسن : لا ماعليك ماراح اسكت بتكلم بس انت استفتح الموضوع وبتشوف وش بقول
عبدالعزيز : هم الحين عند هزام في ملكة ولدهم غزاي مدري متى بيرجعون اذا رجعوا ان شاء الله بنفاتحهم
عبدالمحسن : ياخي كنت ماني مرتاح لـ جيتنا هنا وكنت حاس اننا بنطول مدري وش اللي خلاني اجي
عبدالعزيز : اللي صار صار مايمديك تتراجع وكلها كم يوم ان شاء الله وارجعين اهم شي الايام الثقيلة راحت
عبدالمحسن : الله يعين ويستر لا يقولون تونا ولا بنمدد معليش والله لو مددوا انا برجع الرياض وهم بكيفهم عاد
عبدالعزيز : ياخي كلنا رايحين رايحين بس انت اصبر شوي ندور لنا عذر يخلينا نرجع الرياض
عبدالمحسن : زواجي هو اللي بيخلينا نرجع التجهيزات يبي لها وقت ويبي لها شغل مو على طول يالله كذا
عبدالعزيز : صح صح شلون راحت عن بالي ذي
عبدالمحسن : وانت اصلاً متى فكرت في شي الله يخلف
______________________________
~ بيت ابو نصار ~
ابو نصار : متى انت حاب عرسك يكون
نصار : اللي تشوفه انت
ابو نصار : وش رايك يوم الثلاثاء هذا
نصار : تم بس مدري عنها هي جاهزة للعرس ولا لا
ابو نصار : اكيد انها بتكون جاهزة بنرسل امك لهم تشوف وش صار عليهم
ناصر : ماتحس انه بدري يبه احس لو تنتظر شوي بعد
نصار : لا لا رأي ابوي زين يوم الثلاثاء العرس
ناصر حس انه فيه شي وهمس : وش فيك مستعجل انت ما خبرتك كذا
تصار : اسكت واللي يرحم والديك انا ماني طايق نفسي
ناصر : خير ان شاء الله عسى ماشر وش فيك انت انهبلت
نصار : اسكت لا تخليني انفجر قدام ابوي خلها بعدين اقول لك ما ابي اقول له عن اللي انا سمعته منها
ناصر : رجعنا على طير ياللي يمكن هي تبي توضح لك ماتبي تعيش نفس العيشة اللي عاشتها
نصار : ليه وش شايفتني هي عشان اعيشها مثل عيشة الكلاب اللي عاشتها هاه ؟
ناصر : صل عالنبي واذكر الله البنت ماسوت شي غلط اركد قبل تجيب لنا مصيبة ما احنا ناقصين ترا
نصار : زين زين يصير خير انا اعرف وش اسوي بعدين
ناصر : لا حول ولا قوة الا بالله اتكلم وكأني اتكلم لي على جدار ماهو أدمي
______________________________
~ بيت الشيخ صالح ~
راكان : ياخالة استهدي بالله ولا تقلقين وبعدين ترا عيال عمي صالح لهم الحق يأخذون الثأر ماتبينهم يرتاحون
الجدة سارة : والله اني ابي لهم الراحة لكن ما أقدر اصبر على فرقاهم فيني نار بداخلي تشب
راكان : اذا عليهم ابشري على هالخشم لو اروح اجيبهم لـ عندك واروح انا اقعد هناك ماعندي مشكلة رحت
الجدة سارة : وانت تبي تحرق قلب امك عليك ماتدري عنك شي ولا تدري عن أخبارك
راكان : امي ماهيب مثلك رهيفة قلب واي شي ينزل دمعتها امي من بعد وفاة ابوي تغيرت 180 درجة وكل ذا عشان من عشاننا حنا صارت قوية من السبب بقوتها ؟ حنا السبب صارت كل شي بحياتنا وانتي قاعدة تمثلين فعايلك الطيبة مع عيالك لا يضيق لك صدر ولا يتكدر لك خاطر شوفي فهد هذا هو قدامك وانا قدامك انتي مو تشوفيني مثلك ولدك وأعز !
الجدة سارة : الا وأعز بعد
راكان : خلاص اجل عشان خاطر ولدك لا اشوف لك دمعة ولا تضيقين على رجال وكل واحد شنبه يغطيه
الجدة سارة بـ ابتسامة : ابشر ياوليدي هاه خلاص
راكان : ايه خليك كذا الله لا يحرمني هالوجه
فهد : الله الله مع راكان الوجه يتشقق من الضحك ومعنا الله عالم بالخفايا
راكان : وش تسوي اذا انتم عيالها مو عارفين لها وبعدين المحبة من الله ولا ياخالة
الجدة سارة : اي اي الا ياحبيبي
راكان : هاه شفت قايل لك المحبة من الله
فهد : لنا الله اجل
______________________________
~ شريان اللي كان طالع ولمح قوت ~
شريان : لو سمحتي ممكن شوي من وقتك بس
قوت ناظرت فيه : هلا ! وش
شريان : انا بخاطري كلام وودي انك تسمعينه
قوت : طيب والمطلوب مني
شريان : انك تسمعيني الكلام يخصك انتي عشان كذا انا ابيك تسمعينه
قوت : انا ؟ وش عندك قول أسمعك
شريان بتردد : انتي تدرين أني معجب فيك ؟
قوت بصدمة : نعم وش قاعد تقول ايش اللي معجب
شريان تضايق من ردها : طيب انا اسف ماكان قصدي عموماً فرصة سعيدة لكن معي ورقة كاتب فيها لك كلام بعطيك وانتي اقريها وفكري واذا ماودك انا بيوصلني ردك بدون ماتردين
قوت : كيف يعني ؟
شريان : انا بنتظرك لـ بكره الساعة 2 فالليل اذا ماجاني منك رد انا عارف ردك بدون ماتردين
قوت : طيب خلاص انا لازم اروح بعدين اشوف الورقة
شريان : خذي راحتك مع السلامة
قوت : تمام مع السلامة
شريان : الله يستر عليك ، مشى شريان للبيت وشافه فيصل ومسكه : ولد وش عندك مع بنت الناس
شريان : بسم الله من وين طلعت انت
فيصل : جاوبني وش كنت تسوي مع البنت
شريان : ماسويت شي بس اعترف لها بشيء
فيصل : وش اعترفت به قل لي
شريان : بحبي لها
فيصل : وش وش عيد ماسمعت
شريان : ايه بحبي لها انا احبها وودي فيها بالحلال ولا ابي اعصي ربي في شي مايرضيه ولا يرضيني
فيصل : صادق انت ولا بعقلك شي شلون تحبها وهي ماتعرفك ولا تعرفها
شريان : وليه الحُب يعرف احد يعرف من بتحب ولا من اللي بيميل له قلبك وتحبه !؟ لا طبعاً
فيصل : طيب وش سوت هي
شريان : ولا شي انتظر الرد بس
فيصل : الله يهديك بس
~ عند قوت بالغرفة ~
فتحت الورقة وجلست تقرأ الكلام : انا مدري اذا انتي تبادليني الشعُور او لا لكن اهم شي ان الورقة الحين بيديك وقاعدة تقرين ومصدومة من جرأتي وجيتي لك لكن انا والله اني ما أكذب بـ ولا كلمة قلتها لك انا فعلاً احبك ومعجب فيك لكن كاتم بقلبي هالشعُور اللي كل ماجاني كذبته الا لين ماجاء اليوم اللي فعلاً اعترف لك بحبي انا قلبي بين أياديك حبيه وصونيه يـ اتركيه وتأكدي حتى لو تركتيني انتي بتبقين بقلبي لين ما الله يأخذ روحي
أنفجعت قوت من فتحة الباب وخبت الورقة : وجع شفيك انتي خبصتي قلبي
جنى : انتي شتسوين هنا هاه ايش عندك لوحدك
قوت : الواحد مايجلس لحاله يعني
جنى : كأني شفتك خبيتي شي وراك ايش هو !؟
قوت : ولا شي خبصتي قلبي تبين اتجمد يعني ما اسوي اي ردة فعل على هالخرعة
جنى : اها اوكييه طيب قومي معاي يلا بنسوي شاي وبنجلس مع نجوى
قوت : طيب روحي بجيك
جنى : لا تتأخرين
قوت خبت الورقة بصندوق وقفلت عليها وطلعت من الغرفة ولا كملت باقي كلام شريان