كل دارٍ تضمك ليتها صدري وكل عينٍ تشوفك ليتها عيني

بارت 29

~ بيت الشيخ نايف ~
الجازي : ابشركم نجوى طلعت وهذي هي جاية بالطريق
قوت : احلفي ؟ قولي والله
الجازي : والله العظيم تو اخواني قالوا لي اقول لكم
قوت : يمه يمه اختي انا برجع تسمحون لي ؟
الجدة منيرة ضحكت : اكيد يابنتي دربك خضر روحي
قوت : مع السلامة ماقصرتوا يعطيكم العافية يارب
طلعت تركض من فرحتها ووراها جنى ما انتبهت للحدايد وعلقت عبايتها وطاحت صرخت جنى : قووووت جاك شي
فزوا العيال : اخو العيال وش هالصوت
قوت : مافيني شي مافيني شي ساعديني اقوم بس
طلع بدران : فيكم شي عسى ماشر
جنى : لا بس بنت عمي طاحت ومافيها شي
بدران : توجعت ؟
جنى : لا الحمدالله ماجاها شي
بدران : اني والله حاس انه بيصير شي من ورا هالحدايد سامحونا وجعلها ماتشوف شر
قوت : حصل خير يلا ياجنى مشينا
رجع دخل بدران للعيال : بنات الجماعة وحده منهم ما انتبهت للحدايد وطاحت
نايف : جاها شي
بدران : مدري والله بس انه اللي معها تقول ماجاها شي
عامر : الحين هالحدايد وش سنعها ابي اعرف وش فايدتها
خالد : جدي يقول بيجيب بيت شعر يحطه فالحوش وركب الحدايد ذي عشان تثبته
عامر : جدي ياعليه مسكات مدري من وين تجيه فيه احد يحط بيت شعر في عز الصيف والحر
______________________________
~ بيت ابو ناجي ~
راضي : جيت احدد موعد العرس ياعمي واشوف هو يناسبكم ولا لا
ابو ناجي : ياهلا بك عطنا علمك متى تبيه
راضي : الخميس الجاي ان قاله الله يناسبكم
ابو ناجي : الله الله يناسبنا الله يتمم لكم على خير ان شاء الله
راضي : امين اجل لنا موعد ان شاء الله قبل العرس عشان تجهيزاته والعزومة
ناجي : المعازيم خلوهم علي انا اللي بعزمهم ولكن ابو أدهم وابو سرور وعيالهم هاه مالهم محضرٍ على العرس
ابو ناجي : من اللي يقول اني بعزمهم ولا بخليهم يجون بعد هالسواة والله ماعاد يطبون علي لا في عرس ولا في غيره
راضي : دام هذا اللي يريحكم سووه وانا اقول تم مالهم جاية على عرسي ولا غيره
ابو ناجي : انت ياولدي بصرك تبي تعزمهم عقب تبي تروح عزايمهم رح لا تربط عمرك معنا
راضي : ياعمي انا من اول ما ادانيهم تبي الحين ادانيهم واروح لهم واجي
ابو ناجي : على هواك لكن اول من تعزمون الشيخ نايف وعياله بعدها اعزموا اللي تبون
راضي : اكيد ياعمي مايبي لها كلام ذي هو كبيرنا وهو اللي لازم يحضر كل المناسبات في هالديرة
ابو ناجي : على بركة الله والله يتمم على خير ان شاء الله
______________________________
~ ابناء الشيخ صالح وعبيد ~
عبيد : ابشركم البلاغ جاب نتيجة قرب الفرج ياعيال قريب بنلقاه
باسل : اللهم لك الحمد والشكر اللهم لك الحمد
حسين : عطنا اللي قالوه لك وش قالوا بشرنا
عبيد : قالوا في كذا مكان مشتبهين فيها وانه هذا مو اول مره يجي عليه بلاغات دايماً تجي لكن اول مره يجي بلاغ عن قتل هو المتسبب فيه وان شاء الله بيلقونه
باسل : ياخي الله يبشرك بالخير نذرٍ علي لو يطلع اني لـ اعطيك اللي ودك واللي تبي من فلوس ولا غيره سواً كان لك عندي شي ولا لا
عبيد : انا ما سويت شي ولا ابي منكم شيٍ ابد اللي ابيه دعوة منكم ترضيني وتسر قلبي بس ما ابي غيرها شي
باسل : ان قاله الله ولقيناه اننا ننولك مرادك واكثر بعد بندعي لك الحين وبعدين
عبيد : وهذا اللي ودي به ماودي بشيء غيره
حسين : لولا الله ثم انت ماكان عرفنا غريمنا ولا كان دورناه وخذينا حق ابوي منه
عبيد : ولا انا كنت اتوقع انه هو اللي قاتل العم صالح شكيت في الموضوع لكن ماعندي دليل وكان الوقت عزاء مايمدي وجيت عقب وثبتت الادلة عليه وان شاء الله بينطرح
باسل : الله يسمع منك ويلتقى ونذبحه
______________________________
~ بيت الديرة ~
قوت : الحمدالله على سلامتك ياروحي انتي
نجوى : الله يسلمك ياقلبي
قوت : مره ثانية بعيد الشر عنك ياويلك تسكتين هالمره نفذتي مني لكن المره الجاية لو صارت ياويلك
نجوى : لا ان شاء الله ماتصير كفاية علي تهديد اليوم
جنى : الحمدالله على سلامتك يانجوانا
نجوى : الله يسلمك ياروحي
عبدالعزيز : كفاية عليها تهديد اليوم من بقى ماهددها ؟
عبدالمحسن : اختي جنى هي الوحيدة اللي باقي ماهددتها اختي العزيزة هل لك تهديد لديها ؟
جنى : فيه لكن مو تهديد تهديد تحذير بس ماراح اقوله الحين
نجوى : قوليه صفي معاهم علي الحين
جنى : لا ماينفع الحين لازم على انفراد ينقال
عبدالمحسن : الله واكبر وش هالتهديد اللي لازم على انفراد ليش مو علانية نسمع فيه كلنا
جنى : وانتوا شدخلكم كيفي انا ما ابغى اقوله قدامكم غصب الشغلة
عبدالمحسن : لا حشى كيفك كيفك لا تقولين انتي الخسرانه ترا
جنى : لا مو خسرانه وش بخسر الله يخلف عليك بس
عبدالعزيز : أوحح كأنها نسفت جبهتك هههههههههههه
______________________________
~ بيت مقرن بن نافل ~
ابو موسى : تراني ماني رايح للديرة تعبان شوي
موسى : سلامتك وش فيك
ابو موسى : والله هالحرارة والزكام
ماجد : ياليته فيني ولا فيك ياحبيبي وش تحس فيه تعب قوي مره ولا ؟
ابو موسى : بسم الله عليك لا ياحبيبي تعب خفيف وان شاء الله يخف مع الوقت
نجلاء : اسوي لك عصير وفطور يغذيك
ابو موسى : لا مالي نفس ما ابي اتعبك معي
نجلاء : وش هالكلام يبه تعبك راحة بالنسبة لي
ابو موسى : انتم كنتوا جاهزين عشان نمشي ؟
ماجد : اي لكن دامك تعبان نكنسل روحتنا لـ بعدين اهم شي راحتك وصحتك
ابو موسى : خلاص اجل قوموا نمشي للديرة دامكم جاهزين مانبي نكنسل
موسى : يبه والله مانمشي وانت تعبان وحالتك حالة تتأجل روحتنا وش مستعجلين عليه
ابو موسى : ما ابي اكسر بخاطركم انتوا امس تقولون تبون تشوفونها
نريمان : شدعوة يبه انت تمون عليهم مستحيل يزعلون على شي مو بأرادتك قضاء وقدر يمكن ربي كاتب لك شي احسن وروحة احلى من هالروحة اجلس وريح راحتك اهم
نجلاء : صح اهم شي راحتك لا تتضايق على شي انت تقدر اذا تعافيت تروح له واكثر من مره بعد
______________________________
~ بيت العم هزام ~
ابو نايف : جايين نخطب بنتك الجازي لـ ولدي غزاي على سنة الله ورسوله
ابو محمد : هذي الساعة المبروكة يوم غزاي يأخذ الجازي
لكن تعرف يـ اخوك لازم نشاور البنت ونأخذ رايها
ابو نايف : حقكم وانا اخوك شاوروها وردوا لنا خبر
ابو محمد : ان شاء الله
نايف همس بأذن غزاي : ماقلت لك ابوي بيخطب لك من بنات عماني
غزاي : اسكت تكفى وربي اني متوتر مدري وش اسوي بعمري اخاف اجيب العيد
نايف : هد يابن الحلال وش فيك ترا خطبة مابعد صار شي رسمي للحين اجل وشلون لو صارت الصدقية وش بتسوي
غزاي : مدري مدري اسكت تكفى لا توترني زود
دخل ابو محمد : مبروك الجازي موافقة متى مابغيتوا جيبوا الشيخ عشان يملكون والله يكتب اللي فيه الخير
الشيخ نايف : مبروك ياولدي ياغزاي مبروك الله يوفقكم
غزاي : الله يبارك فيك ياجدي
ابو نايف : مبروك ياولدي الله يتمم على خير
تعالى المجلس بصوت التبريكات والتهاني لـ غزاي
غزاي : الله يبارك فيكم وعقبالكم ياعيال
الشيخ نايف : متى ناوين على الملكة
ابو نايف : بكره ان شاء الله اذا ماعندهم مانع
ابو محمد : على خير ان شاء الله ماعندنا مانع البيت بيتكم والبنت بنتكم متى مابغيتوا الله يحييكم
ابو نايف : اجل الملكة بكره ان شاء الله بعد صلاة المغرب
ابو محمد : على خير ان شاء الله في أنتظاركم يـ اخوي